¹ Cunung, Pharisee gui la Jerusalem mango ungka lawk ciah Cacim pyang saya amshah gui cu Bawipa ma ah ng'bum law u ne, ² Angdüihpüi amshah gui cu kä theing ciah kut, käcung, kä mi m'shi ah ami kut awn ei ami ei cu hmuk ci gui. ³ (Pharisee gui ung tün ne Jew pakhui ami van naw cau ami pupa guiah thumcam gui cu läk u ne ami kut cu thungman ah mäih ah kä m'shi pang ah ei kä ei man ci gui. ⁴ Hlumleinak ungka ami law ba ung phi ami kut kä m'shi pang ah ei kä ei man ci gui. Cunkawnah mä, k'am, khap, k'kyei eikbei la ipnak ah ka-tin gui hngaw m'shi vaiah ami läk ah a hei thumcam gui akda om ci.) ⁵ Cunung Pharisee la Cacim pyang saya gui naw, "Na ng'düihpüi gui naw ikyasei acau pupa guiah thumcam kä läk pang ah kä theing ciah ami kut awn ei ami ei ma?" ciah Bawipa cu ng'shik ci gui. ⁶ Bawipa naw phi, "Isaiah naw chang man ah ng'she ciah nami mawngma gui profet ng'thu a pyein cu k'cang hman hman ci. 'Shin ah chang gui naw ami m'gong awn na kyih-a ci gui. Cunte, ami m'lung cu kei awn a ng'lak thuuk aih ci. ⁷ Ngami naw chang guiah thumcam gui cu ng'theithang vaiah ng'thu vai süah m'theimthang u ne, kei cu a kholä ah na khawihnah ci gui' ciah Cacim ung a ng'guk ah mäih ah, ⁸ Nangmi naw Khanpughi ah ng'thumkhän cu nawit-heng u ne chang guiah thumcam gui düt nami läk ci" ciah pyein na gui ci. ⁹ Cunkawnah, ngami awn, "Nangmi naw nami mät ah thumcam gui a khänhtek vaiah Khanpughi ah ng'thumkhän gui cu akghuih ah nami nawit-heng ci phäih nei. ¹⁰ Ikyaseiciung, Moses naw 'Na nu la pa kyih-a ä. A nu, käcung, a pa pyeimshek cicu ngonnak gah khai' ciah pyein ci. ¹¹ Cunte, nangmi naw 'Chang tumat naw a nu, käcung, a pa awn, "Keimi ungka nami gah khin cu ng'langkha ne pettu ah kami ng'khanglang nak ah kya pyi ci" ciah a pyein ung ng'gah ci' ciah pyein u ne, ¹² Ani awn a nu, käcung, a pa ah phäh ah a i phi kä nami bi sak ba ci. ¹³ Ashikcha ah nangmi naw nami mät ah thumcam awn Khanpughi ah ng'thu cu nami phyek ci. Acun ah mäih ah mamawng gui akda phi nami bik ci" ciah pyein ci. ¹⁴ Cunkawnah, Bawipa naw chang k'hli cu khü ba gui ne, "Nami van naw ka ng'thu ng'ngai u ne k'shinghmat vä. ¹⁵ Chang ah akpung ungka naw akkyong ah lut ne chang m'shemshai sak ciah a i tumat phi kä om ci. Chang ah kyong ungka lut lawk ci gui naw nei chang cu m'shemshai sak ci. ¹⁶ A ng'yak nak ah akhnga om ci phung naw ng'ya sä" ciah pyein ci. ¹⁷ Bawipa cu chang k'hli ungka lut law ne imkyong ah a va lut law ung, angdüihpüi gui naw cunah m'tumtängnak ah mawng cu Bawipa awn ng'shik ci gui. ¹⁸ Cunung, Bawipa naw, "Nangmi cun phi shin hlawk ah nami awit-ang ne ma? Akpung ungka naw chang ah kyong ah lut ci phung naw chang cu kä a m'shemshai sak hlawit ah mawng kä nami hmat ne ma? ¹⁹ Ikyaseiciung, acun cu chang ah m'lungkyong ah lut ciah kä kyak ci. A pawi khui ah lut ne ng'no-im ah gawk ci" ciah pyein ne ei-awk avan a theing ah mawng m'dang ci. ²⁰ Cunkawnah, Bawipa naw, "Chang ah kyong ungka lut lawk ci naw chang cu m'shemshai sak ci. ²¹ Ikyaseiciung, kä nik ciah ng'ngaktüh tängpang nak gui, kä thungman ah ng'chungla nak, m'guknak, chang ngonnak, ²² Kyongkhui ung be kä khüt ne kyoikatnak, ng'yakhlü aih ne, shetkhatnak, thuvi nak, Shisa tuhlimnak ung ng'lülawknak, m'thümkhangnak, pyeimshetnak, m'lung m'hlünnak la gugaknak gui cu chang ah kyong, chang ah m'lungkyong ungka lut lawk ci gui. ²³ Shinah shekhak ci avan cu akkyong ungka lut law ne chang cu m'shemshai sak ci" ciah pyein ci. ²⁴ Cunkawnah, Bawipa cu cunah hmun ungka ng'düi law ne, Taira mango ah pei ah om ciah kho guiah hteit ne im tumat ah lut ci. A u naw phi kä hmat vaiah a ng'yakhlü pang ung phi, kä ng'thup hlawit ci. ²⁵ Shemshai ciah kho naw a kaai nak ah htahnumi tumat ah nu naw Bawipa ah mawng ng'ya ne, a ng'ghit ah law neta, a khaw peiah ng'bolawk ne, ²⁶ khokshe cu a htahnumi ungka aktäm pe vaiah Bawipa cu ng'hungpa nak ci. Cunah hnumi cu Siriaphonician kho k'chang, khuihei tumat ah kyak ci. ²⁷ Bawipa naw phi, "Htahmaw gui naw ami phü ah ei cang u sä. Htahmaw guiah ei cu la ne, uihta gui awn m'bei cu kä nik ci" ciah pyein ci. ²⁸ Cunah hnumi naw, "Bawipa Khanpughi, eikbei ah k'kaa ah om ciah uihta gui hngaw naw htahmaw guiah ei ng'theh hta gui ei tu man ci gui" ciah pyein ba ci. ²⁹ Bawipa naw, "Shinah ng'thu ah hmawk ah hteit ba ä. Khokshe cu na htahnumi ungka lut law pyi ci" ciah pyein ci. ³⁰ Cunung cunah hnumi cu amät ah im ah hteit ba sei, a htahnumi cu ipnak ka-tin khan ah ng'daang ne khokshe lut law pyi ciah mawng hmuk ci. ³¹ Cunkawnah, Bawipa cu Taira mango kho gui ungka lut law ne Sidon mango hlun pah ne, Dekapolis kho a ng'lung ungka naw Kalilee kho ah hteit ci. ³² Cunung chang gui naw akhnga k'pang ne ang ciah chang tumat cu a pei ah ng'khah law püi u ne, ani ah khan ah a kut a taih pet vaiah Bawipa cu ng'hungpa nak ci gui. ³³ Bawipa naw ani tumat bäng cu chang k'hli ungka ng'khah püi ne, a kutpyang goi cu ani ah ng'hngakoi goi ah khui ah thun ci. Cunkawnah, a m'shi m'sha ne a m'lei phi a m'shitui awn tawk ci. ³⁴ Cunkawnah, khankho han dan ne, ghäi-ai neta, "Ephphatha" ciah pyein ci. Cunah a suilam cu "Ng'hmawng sä" ciah kyak ci. ³⁵ Acun ah ng'ghit awn ani ah k'hnga cu ng'hmawng law ne, a m'lei k'thang-guui gui phi ng'phyen law ne a ng'khai ah ng'thu lawk ci. ³⁶ Bawipa naw shinah mawng cu a u awn phi kä mi m'thein ein vaiah m'cäi gui ci. Cunte, ngami awn acun ah m'cäi gui pang sei phi, ngami naw pyein pi ci gui. ³⁷ Chang gui naw aknui leng leng ah cäicam u ne, "Bawipa naw apängvan cu akni ah bi pyi ci. Akhnga kä ng'yak ci ng'yak sak ne ang ci phi ng'thu sak pyi ci" ciah pyein ci gui.