¹ Cunkawnah, Jesuh cu acunah hmun ungka lut law ne amät ah mango ah hteit ba ci. Angdüih pui gui naw a hnu ah läk ci gui. ² Kyinhnüp gawk law sei ng'bum-im ung m'cumcäi gui ci. Chang akda naw ng'ya u ne cäi u neta, "Shinah chang naw shin gui cu a hawi ah ka maa a gah? Shinah hmuhmatnak gui cu a i mäih hmuhmatnak gui maa? Shin hlawk ah huham gui cu ihawkcha ah a m'dang hlawit ang? ³ Ani cu cokyang k'chang ah kä kya ne ma? Mary ah hta kä kya ne maa? James, Joses la Judas, Simon niah ami phäi ah kä kya ne ma? A be gui phi mi pei ah om ci gui kä kya ne ma?" ciah pyein u ne Bawipa cu kä yeikyai nak ci gui. ⁴ Jesuh naw phi, "Profet cu amät ah omnak ah mango, a mät ah ng'hnget guiah ng'lak la amät ah imkyong guiah kawnah a hawi ah phi a hmai k'kyang nak om ci" ciah pyein na gui ci. ⁵ Kä gai ci amshah ah khan ah akut k'taih ne a m'gai guiah kawnah acunah hmun ung a i huham phi kä m'dang hlawit ci. ⁶ Cunah chang gui naw kä ami yum cu cäicam ne a pei pigo gui ung hteit shüi shüi ne m'cumcäi gui ci. ⁷ Cunkawnah Bawipa naw angdüihpui ghaleigoi khü gui ne ng'hnih ciah ng'toi sak gui neta, mümcha she gui m'khütnäng sak gui ci. ⁸ "Nangmi cu tuilam ung nami ng'shohtung tumat ah kawnah a i phi kä nami hteh pui vai. Ng'ya, eiawk la shawm-guui ung ngui gui kä nami hteh pui vai. ⁹ Kho-dawk ng'leh vä. Htu ng'hnih kä k'phawh vä" cine pyein na gui ci. ¹⁰ Cunkawnah, "Nangmi cu a hawnah kho a u ah im ung nami om tu ungphi kä nami hteh ba pha güt, acunah im ung nami om tu vai. ¹¹ A u naw bawh kä ning dochang gui ne, nami ng'thu kä ng'ngai khai. Ngami ah im ungka nami luh law ba yah ung, ngami täng ah hmukshing tumat ah a kyak vaiah nami khopha ungka m'but cu khawk vä. Akcang ka pyein cu ng'thumcha nak hnüp ung cunah mango cu Sodom mango la Komorrah mango ah ta mä, tä pi khai" ciah pyein ci. ¹² Angdüihpui gui naw lut law u ne, ng'yu nak ah ng'thu cu ng'shä ci gui. ¹³ Khokshe gui k'täm ci gui. Kä gai ci gui chang akda cu si awn hlüp u ne gai sak ci gui. ¹⁴ Bawipa ah ng'ming cu ng'lawngthang law sei, Herod ghangpughang naw ng'yak ci. Chang amshah naw, "Tuihnim Johan cu shik ci gui ungka thawh law ba pyi ci. Cunkyasei, ani ung huham gui ng'dang ci" ciah pyein ci gui. ¹⁵ Amshah naw phi, "Ani cu Eilijah ah kyak ci," ciah pyein u ne, amshah naw läi, "Acau profet gui ungka profet tumat mat ah mäih ah lawk ci" ciah pyein ci gui. ¹⁶ Herod naw ng'ya ne, "A lu tupit ne ka ngon ah Johan cu thawh law ba pyi ci nei" ciah pyein ci. ¹⁷ Cunah a pyein ah mawng cu, Herod naw amät ah nau Philip ah chu Herodias ah hmawk ah amät naw chang gui tüi ne, Johan cu pha neta thawng khui ah khit ne chum ci. Ikyaseiciung, Herod naw cunah hnumi cu k'chu na sei, ¹⁸ Johan naw, "Na nau ah chu na guit cu upatei awn ng'hnungtuk ci" ciah a pyein nak ah hmawk ah kyak ci. ¹⁹ Cunkyasei, Herodias naw Johan cu thüi nane ngon hlük ci. ²⁰ Cungphih, Johan cu ng'düng ne theing ci ciah mawng Herod naw hmat neta, Johan kyih-a ci. M'htei ne ghung ci. Ami ng'shungchak ah mawngma gui ung, ani ah ng'thu cu ng'ngai thei ne yekyai ciah m'lung awn phi ng'ngai thei ciah kyasei cunah hnumi naw i kä ci hlawit ci. ²¹ Cunte, Herod naw a mät ah a ng'tüi nak hnüp ung akchang bawi ng'vai gui, tat-hmu ng'vai gui la Kalilee kho khawngmang ci guiah phäh ah mü-ei a m'bei law khin ung a ng'yak hlü a bi nak hlawit vaiah ng'hloihlap lawk ci. ²² Herodias ah htahnumi cu va ng'lam tu seih, Herod ung tüin ne apüipaw gui, ami m'lung cu yeikyai hngip-awi sak ci. Cunung, ghangpughang naw, "Nang ng'yakhlü phung na ng'yoi yä. Kaning pek khai" ciah cunah hnumihta cu pyein nak ci. ²³ Cunkawnah, "Ka khopäng amcawit khüt khai ah na na ng'yoih phung kaning pek khai" ciah ng'phyun ne pyein ci. ²⁴ Cunah hnumihta naw lut law ba ne, "A i ka ng'yoih vai ang?" ciah anu ng'shi sei, anu naw, "Tuihnim Johan ah lupum ng'yoi yä" ciah pyein seih, ²⁵ Hnumihta cu a ng'ghit ah ghangpughang ah va hteit ne, "Tuihnim Johan ah lupum shinah eikbei ung na na pet vaiah ka ng'yahlük ci" ciah ng'yoi ci. ²⁶ Ghangpughang cu anaa ah a thüisei pang ung phi a ng'thu khän phi kya, a puipaw guiah hmai phi kya, ng'ngai ba ne hnumihta phi kä maa na hlü neta, ²⁷ "A lupum law püi vä" ciah akchangshäm tumat cu a ng'ghit ah tüi sei, akchangshäm naw hteit ne Johan ah gawn cu thawng khui ah tupit ci. ²⁸ Lupum cu eikbei awn law pui ne acunah hnumihta awn a pet kawnah ani naw anu awn pek ci. ²⁹ Johan ah ng'düihpui gui naw shinah mawng ami ng'yak law ung, law u ne a gook cu la u neta, hteh pui u ne m'kyim-hmun ah k'phuh ci gui. ³⁰ Angdüihpüi gui cu Jesuh ah pei ah ng'bum law u ne, ami bi gui phung la ami m'theimthang gui phung m'thein law ba ci gui. ³¹ Bawipa naw phi, "A u kä om nak ah k'pya ah law u ne ashäng ng'düm vä" ciah pyein na gui ci. Ikyaseiciung, chang akda hteithton u sei ngami cu ei ami ei vai hngaw ah kä ng'büün u sei kyak ci. ³² Cunkyasei, ng'hleiko ng'cum u ne a u kä om nak ah k'pya ah hteit ci gui. ³³ Ami hteh cu chang akda naw hmu u ne Bawipa ah akyak ami hmat law ung mango gui pigaw gui ungka lut law u ne, acalam ah k'kawnglam awn k'dawng u neta, angdüihpüi guiah ma ah gawk u ne apei ah ng'bum ci gui. ³⁴ Jesuh cu ng'hleiko ungka kyum law ne chang akdanu a hmuh law ung ngami gui cu lamshüm ci kä om ciah htome gui mäih ah ami kyak cu m'gein gui ne akda ah m'cumcäi gui ci. ³⁵ Kho a mü law ung angdüipüi gui naw et law u ne, "Shinah hmun cu k'pya ah kyak ci. Kho pi mü lawk ci. ³⁶ Chang gui cu pigaw guiah hteit u ne eiawk ami k'hleih vaiah tüi ba gui ä. Ngami ung ami ei vai kä om ci" ciah pyein u sei, ³⁷ Bawipa naw, "Ngami ah ei vai nangmi naw pe vä" ciah pyein na ba gui ci. Angdüipüi gui naw phi, "Keimi hteit u ne, danaris 200 awn m'htut hleih u ne eiawk kami pet gui vai ma?" ciah pyein ba ci gui. ³⁸ Bawipa naw phi, "Nangmi ung m'htut a i chü om ne ma? Hteit ne va teng vä" ciah a tüitäk gui mäih ah ami hmat law kawnah m'htut phe ng'lung hma la, nga ng'yun goi om ci" ciah m'thein law ba ci gui. ³⁹ Cunkawnah, Bawipa naw chang van awn, k'taa m'kyim guiah khan ah a ng'bum phäh phäh ah ami ngawh sak vaiah angdüihpüi gui awn pyein na gui ci. ⁴⁰ Ngami cu phya ci-ah ng'bum ät, hmakip ciah ng'bum ät, a ng'bum phäh phäh ami ngawh law ung, ⁴¹ Bawipa naw m'htut phe hma la, nga ng'yun goi la neta, khankho dan ne abäkhäknak a m'hlümtai kawnah m'htut cu k'bou ne, chang gui awn ami teipai vaiah angdüipüi gui awn pe gui ci. Nga ng'yun goi cun phi chang avan awn teipai gui ci. ⁴² Chang avan naw ei u ne, ami phü kawn ah, ⁴³ M'htut la nga akpawih gui m'cun u seih, gang ghaleigoi akbe ah gah ci gui. ⁴⁴ M'htut ei ciah pami tänkhei ung phya hmakip lawk ci. ⁴⁵ Cunkawnah Bawipa naw angdüihpüi gui cu ng'hleiko ah khan ah ng'ghit ah kai sak gui ne capikam täng Bethsaida pigaw ah hteh sak ma gui ci. Cunah a khin ge ung, chang gui phi tüi ba gui ci. ⁴⁶ Chang gui a tüih ba gui kawnah Bawipa cu k'taigü khai ah khomhtung ah hangkai ci. ⁴⁷ Kho amü law ung ng'hleiko cu tui lukhyung ah om ci. Bawipa cu kho k'kawng ah amät bäng om ci. ⁴⁸ Kho naw a ng'lat ah khi gui sei angdüihpüi gui cu tui väk u ne, ami bawngbai hmu gui ci. Ai khon htük a khin hlawk ung tuili khan ah hteit ne, phlän gui khai ah pawng ci. ⁴⁹ Angdüihpüi gui cu tuili ah khan ah Bawipa a hteh hmu law u ne, m'cha nei ciah ng'ngai u ne vuvik ci gui. ⁵⁰ Ami van naw Bawipa hmu u ne, ami kyikyawk ah hmawk ah kyak ci. Cungphih, Bawipa naw a ng'ghit ah ngami awn, "Kä ng'ä vä. Kei nei. Kä kyi vä" ciah pyein na gui ci. ⁵¹ Cunkawnah ami om nak ng'hleiko khan ah hangkai sei, khokhi cu ng'düm ci. Ngami cu aknui leng leng ah cäicat ci gui. ⁵² Ikyaseiciung ngami cu ami m'lung m'li aih sei, m'htut awn a m'dang ah huham kä k'shing hmat u ne kyak ci. ⁵³ Cunkawnah ngami cu tuili hei-kat u ne, Kennesaret mango ah gawk u neta, ng'hleiko cu m'düm ci gui. ⁵⁴ Ng'hleiko ungka ami kyum law ung chang akda naw a hmai cu ng'ghit ah k'shing u ne, ⁵⁵ Acunah kho avanah dawng u neta, Bawipa a om nak ah ami ng'yaknak ah hmun ah, gopyam ci gui cu ihphak mah mah ah law püi ci gui. ⁵⁶ Bawipa a hteh nak ah mango ungphi kya, pigaw ungphi kya, gopyam ci gui cu chang gui naw lam pei ah m'shän u ne, ngami gui cu Bawipa ah a suinu m'dawng hman, a tawn tu sak gui vaiah Bawipa ng'hungpa nak ci gui. Bawipa va tawn tuk ci phung phi gai ba ci.