¹ Tuinu hei ga Kedarenes kho ah gawk u ne, ² Jesuh cu ng'hleiko ungka a kyum law ah ng'ghit ung, mümcha she ah k'pan ah chang naw, m'kyim hmun ungka lut law ne, Bawipa ana douchang lawk ci. ³ Cunah chang cu m'kyim-hmun ung om thei ci. Ani cu m'shi-guui awn phi a u naw khitkhon ne kä gah hlawit ci. ⁴ Ikyaseiciung akutkhaw m'shi-guui awn khitgai u seih phih m'shi-guui gui phupit aih seih a u naw phi ani kä hngip-awi sak hlawit ci gui. ⁵ Ani cu m'kyimhmun ung phi kya, m'htung khan ah phi kya, amü akhnüp vuvik ne lungpaw gui awn amät naw amät phlembai thei ci. ⁶ Ani naw Jesuh cu a hlang ah ka naw a hmuh law ung apei ah dawng law ne ng'bawlawk neta, ⁷ "Akhlüngpibäih Khanpughi ah Htapa Jesuh aw, kei ah a i na shui lawk ci ma? Kä na na dukdei nak vaiah Khanpughi ah ng'ming awn kaning ng'hungpa nak ci" cine a ng'shawngnu ah viik ne ng'hungpa nak ci. ⁸ Cunah ikyasei a pyein ciung, Bawipa naw cunah chang awn, "M'shemshai ciah kho, shinah chang ungka hteit ä" ciah a pyein nak ah hmawk ah kyak ci. ⁹ Bawipa naw, "Na ng'ming ihawkcha ma?" ciah ng'shi sei, ani naw, "Ka ng'ming cu Leikong ah kyak ci. Keimi cu kami da ciah kyasei nei" ciah pyein ci. ¹⁰ Cunkawnah, ngami gui cu acunah kho ungka naw kä gawit-täm gui vaiah Bawipa cu aknui ah ng'hungpa nak ci gui. ¹¹ Cunah hmun ung khokying khan ah vok ng'bumnu tumat lumpyang ci gui. ¹² Khokshe gui naw phi, "Keimi gui cu cunah vok khui ah kami luh vaiah na tüi gui ä" cine ng'hungpa na u seih, ¹³ Jesuh naw ng'ghit ah ngüm-ä na gui ci. Mümcha k'she gui cu vok gui khui ah lut u neh, vok k'hli cu ng'minkawng she täng ah dawng u ne, yu ng'phäi u neta, tui ung lut u ne, shi yop ci gui. Tänkhei law ung phya m'ku hlawk lawk ci. ¹⁴ Vokshäm gui cu dong u ne mango pigaw ng'nam chang gui awn a mawngma ami m'thein law ung chang akda cu cunah mawngma teng tu khai guiah lut lawk ci gui. ¹⁵ Jesuh pei ah ami gawk law ung khokshe leikong naw akpan ah chang cu ng'suisa ne m'lung ngaih man awn a ngoh hmu u neta, cäicam kyikyok yop ci gui. ¹⁶ Khokshe naw a kai ah chang ungphi kya, vok gui ung phi kya, i hon ah a kya hmuhmat ciah chang gui naw a kawnah law tu ci gui awn m'thein tu u seih, ¹⁷ ami kho ungka a hteh tak gui vaiah ng'hungpa nak ci gui. ¹⁸ Ng'hleiko ung akai law ung, khokshe naw a kai nak man ah chang naw Bawipa awn atäng ah aläk tu vaiah ng'hungpa na seih, ¹⁹ Bawipa naw maa na ne, "Nang cu na im ah hteit ä. Khanpughi naw ani m'geinnak ah m'lung awn ihlawk ah aning m'htei ah mawng cu na phäinau pawchang gui awn m'thein tu ba gui ä" ciah pyein nak ci. ²⁰ Cunah chang cu hteit ne Jesuh naw ihlawk ah a m'htei ah mawng cu Tekapolis khaw nü ung pyein ba seih chang päng van cäicam ci gui. ²¹ Jesuh cu tuikam heigatäng ah vangkat ne tuili pei ah a om sang ung chang akda cu apei ah ng'cut lawk ci gui. ²² A cun ung Jairus ng'ming nak ciah ng'bum-im ghung cu law ne Bawipa a hmuh law ung a khopha ma ah ng'bolawk ne, "Ka htahnumi shi law hlük ci. ²³ Cunte, nang Bawipa naw law ne na hun vaiah akkhan ah na kut na taih ung ghing khai" ciah aknui ah ng'hungpa nak ci. ²⁴ Bawipa cu ani awn atäng ah hteit ne chang k'hli naw Bawipa cu k'cungvong u neta, hlu-mok ci gui. ²⁵ Cun ung kum ghaleigoi lüng a shi ah ng'ghong ne a gawpai ah hmawk ah, ²⁶ Sei saya akda ah hteit ne a khawh akda ng'pyi sei phi kä gai ba ci bäng ah kä kya ne, goi law pi pi ciah ng'hnumi naw, ²⁷ Jesuh ah mawngma a ng'yak law ung, ²⁸ "A suinu bäng ka tawn tu ung, ka gai ba khai" ciah pyein ne, chang k'hli ah ng'lak ung a hnu ah law ne, a suinu cu va tawn ci. ²⁹ A cunah ng'ghit ung, a shi ah a ng'ghong nak ket sei, natnak ah dukdeinak ungka naw phyawng pyi ciah mawng amät ah pum ung hmat ci. ³⁰ Jesuh naw a pum ungka huham a lut law ng'ghit ah a hmat law ung chang k'hli lam täng a hnulam ah ng'hlat ne, "A u naw maa ka suinu ana tawn?" ciah ng'shi gui ci. ³¹ Angdüihpüi gui naw, "Chang k'hli naw nang Bawipa ami ning tawn cu hmuh lang ne, a u naw maa ana tawn ciah na pyein" cine m'shang ba u sei phi, ³² Bawipa naw, cunah bik ciah chang a hmuh vaiah a hnu a ma ah ng'hlat ne teng ci. ³³ Cunah hnumi naw a pum ung ihawkcha akyak hmat ne, kyikyok cäicam neta, apei ah a law kawnah ng'bawlawk ne cunah amawngma gui cu akcang ah pyein ci. ³⁴ Bawipa naw phi, "Ka htahnumi aw, na yumnak naw ning m'gai pyi ci. Dimgei sei hteit ne na natnak maih sä" ciah pyein nak ci. ³⁵ Cunah Bawipa naw a pyein sang ung ng'bum-im ghung ah im ungka chang gui law u neh, "Na htahnumi shi pyi ci. Ikyasei saya cu na m'tumkha ang?" cine pyein nak ci gui. ³⁶ Cunah ng'thu Jesuh naw ng'ya ne, "Kä kyikyawk en vä. Yumnak m'lung tumat bäng om sak vä" ciah ng'bum-im k'ghung awn a ng'ghit ah pyein nak ci. ³⁷ Peter, James, James ah anau Johan ah kawnah a u phih kä läk en sak ne, ³⁸ Ng'bum-im k'ghung ah im ah gawk ne pi-thüng ng'nam thawk ah ami om a hmuh law ung, ³⁹ Akkyong ah lut ne, "Ikyasei nangmi cu pi-thüng ng'nam thawk seih nami kya ang? A ng'hmo kä shik ci, ipdä ci nei" cine pyein seih, ⁴⁰ ngami naw gaih tuk ci gui. Cunah chang gui nü cu k'pung ah a hteh sak gui kawnah a ng'hmohta ah nupa phi kya, Bawipa awn ng'gui law tuk ciah chang gui phi kya, a khü kawnah, akhmo ah ng'yän nak ah va lut ne, ⁴¹ akhmaw ah kut cu k'pan pe ne, "Talihta ku-mi" cine pyein ci. Asuilam cu, "Ng'hnumihta aw, tho law ä ka cik ci" ciah kyak ci. ⁴² Acun ge vai awn ng'hnumihta cu ng'düi law neh hteit ci. A khokum cu kum ghaleigoi lawk ci. Ngami gui aknui ah cäicat yawp ci gui. ⁴³ Cunah a mawngma cu a u naw kä a hmat vaiah ngami gui cu a ng'cet ah ng'thu khän gui ne, "Ani awn a ei vai pe vä" cine pyein ci.