¹ Cun ung Bawipa naw tuikam pei ah a m'theimthang gui sang ung chang k'da a pei ah law u khä tah, ng'hleiko ung lut ne ngok ci. Chang k'hli gui cun phi tuikam pei k'kawng ah om ki gui. ² A cun yah ung m'tumtängnak awn akda ah a m'theimthang gui cu, ³ "Ngai vä! M'shi k'phuu cu m'shi phu khai ah hteit ci. ⁴ M'shimcang phuu nak ungka amshah cu lam ung ng'kyah sei khankho kha gui naw ko u ne ei ci gui. ⁵ M'shimcang amshah gui cu lung ada nak ung ng'kyah ne, khomdek a ng'pam ah hmawk ah ng'ghit ah ng'lih-pyo tu lang pang sei phi, ⁶ khok-hni a luh law ung ng'ling ne, a phungpya kä yu thuuk sei, chawng ne ghawi yawp ci. ⁷ M'shimcang amshah cu ng'hling hmu ung ng'kya ne, ng'hling gui naw k'khi u seih, kä m'theih hlawk ci. ⁸ Amshah m'shi gui cu ng'leih ni ung ng'kya sei, ng'li-pyo ng'ghaw-tai dämda ne a thumkip, akchukip, a phyaa ah vuipai m'theitaki gui. ⁹ A ng'hnga om ki naw ng'ya sä" ciah pyein ci. ¹⁰ Bawipa amät hta bäng a om sang ung a hnuläk ghaleigoi naw m'tumtäng nak ah amawng ng'shik thäh ki gui. ¹¹ Bawipa naw, "Nangmi cu Khanpughi ah thuuk ne ng'shawng ciah amawng cu nami hmat tu vai a khawnt om ci. ¹² K'pung ah om ci guiah ngami gui cu hmu ne phi kä ng'ngaktüh phung ah hmu u ne, ng'ya lang u ne phi, a suilam kä hmat pang ah ng'ya u ne, ami om ih kä ng'thung thawng ah katnak kä k'phyawn gui khüt khai ah ngami awn m'tumtäng ne m'thein gui ci. ¹³ Nangmi cu shinah m'tumtäng nak hngaw kä nami hmat ung, m'tumtäng nak avan cu a ih ya nami hmat hlawit khai aw? ¹⁴ M'shi k'phuu naw ng'thu m'shi phuu ci. ¹⁵ Lam ung ng'thu m'shi phu ah amawng cu shinah suilam nak ci. Ng'thu ami ng'yak law ung khogam cu ng'ghit ah law ne ngami ungka ng'thu cu k'phuk pe ci. ¹⁶ Lung hmuli ah phuu cicu ng'thu ng'ya ne yeikyainak m'lung awn douchang tu lang pang nephi, ¹⁷ A m'lung ung kä phung ne, a shäng bäng om seih, cunah ng'thu hmawk ah dukdeinak gui a gawk law ung, ng'ghit ah a hnu ah ng'hlat ba ciah mawng a pyein ah kyak ci. ¹⁸ Ng'hling hmuli ah m'shi phuu cicu, ng'thu ng'ya ne, ¹⁹ Khomdek khan ng'ä ai nak, khawkcham ah m'hleimhlak nak, a hei gui m'ghadam nak ah m'lung gui naw ng'thu k'ni a shungshet ah hmawk ah kä m'theih hlawit ki ciah a pyein nak hlü ah kyak ci. ²⁰ Ng'lei k'ni ung phuu a ci nak hlü cu ng'thu ng'ya ne douchang seih a thumkip, akchukip, a phya cäp ah dämda neh m'theih taki ciah a pyein nak hlü ah kyak ci. ²¹ Cunkawnah, mei-im cu mei m'dei nak ung kä m'däi neh dawn ah kaa, ih nak ka-tin ah kaa ah tha vaiah nami law püi thei ne ma? ²² A ng'thup ah om ci gui nü cu, ng'dang lawk khai. Thupthoi gui avan cun phi, ng'dang lawk khai. ²³ A ng'yaknak vai a ng'hna om ci phung naw ng'ya sä" cine pyein ci. ²⁴ Cunkawnah, nangmi naw ihawkcha ah nami ng'yak cu, m'htei na vä. A hei awn nami pettak mäih ah nami gah ba khai. ²⁵ Chang tumat cu gah thei ci. Ani awn pek cang vai. Dukhaih cicu ani ung om ak-om päng phi laak pe yawp vai" cine pyein ci. ²⁶ Cunkawnah, Khanpughi ah uknak khopäng cu khomdek khan ah chang tumat naw m'shi a phu awn täng ci. ²⁷ Ani cu kho mü khohnüp ip ne a om sang ung a m'shi cu ng'li-pyo law ne dung-ghing lawk ci. Acun cu ihawkcha ah a dung-ghing law ah mawng ani naw kä hmat ci. ²⁸ Khomdek naw cu amät ah hlü ah m'htei sak ne, akhtükbäih ah a dung-ghing, cunkawn ah a vui, cunkawn ah akhtang gui cu kyak sak ci. ²⁹ Aktheih a upnak ah khin a gawk law ung ani naw a ng'ghit ah a ng'lingkui awn khäm ci" ciah pyein ci. ³⁰ Cunkawnah, "Khanpughi ah a kho cu a ih hoi ah m'tumtäng vai yaw? A i hawi ah m'tumtäng vai ci ung, ³¹ Anme-ui awn täng ci. Anmei-ui cu khomdek ung geit law ung, m'dek ung om ciah a ui avan na tah mä, m'kawi tu pi lang sei phi, a ng'kom ah dung law ne, ³² M'ghaw dung avan na tah mä, däm pi sei, khankho kha gui cu a ng'hnim yii u neta, a ming ng'dümnak ng'büh vaiah a ng'ban k'däm guiah kya law thei ci" cine pyein ci. ³³ Cunah mäih m'tumtäng nak gui awn k'chang k'hli gui naw a ming ng'ngaih hning vaiah ng'thu m'thein gui ci. ³⁴ M'tumtäng nak mah mah ah kä kya ne, a i kä m'thein gui ci. Angdüihpüi gui bäng ami om sang ung apäng avan m'theimthang m'khuphlang ba gui ci. ³⁵ Cunah hnüp, kho amü law ung, Bawipa naw, angdüihpüi gui awn, "Tui mi heikat kaw" ciah pyein na gui ci. ³⁶ Chang k'hli cu nawng shüt u ne, ng'hleiko ung ana om pyi ciah Bawipa mah mah ah hteit ci gui. Ng'hleiko ahei gui phi ng'läk tuk ci gui. ³⁷ Cun yah ung, khokhi she khi law ne ng'hleiko k'khi law sei, hleiko cu tui be yawp ci. ³⁸ Bawipa cu ng'hleiko a hnu lamtäng ung lu ng'khum ung ng'khum ne ip ci. Angdüihpüi gui naw m'tho u ne, "Bawipa aw, dii-maihnak ah kami gawk cu kä na na tä gui khai ma?" ciah ami ng'shi ung, ³⁹ Bawipa cu ng'düi law ne, "Ng'düm ne a düm ah om ä" ciah khokhi la tuinu cu pyein na sei, khokhi cu ng'düm ne akni ah kho väi lawk ci. ⁴⁰ Bawipa naw, "Ikyasei nami kyih ma? Tukbäih khüt sei nangmi ung yumnak kä om pha ne ma? ciah a ng'shi law gui ung, ⁴¹ Ngami cu kyimdii u ne, "Shinah k'chang cu a u nei? Khokhi la tui nu naw phi ani ah ng'thuchi cu ng'ngai ci phäih nei" ciah mat naw mat pyein nak ci gui.