¹ Ng'bum im ung va lut ba ne, cunah ng'bum im ung a kut vangtäng shik ciah tumat awm ci. ² Kyiin hnüp ung ani ah natnak a m'gein vai, kä m'gein vai cu ngami naw Bawipa ami m'katnak vaiah a hma-nak ami shui nak ah a ng'thup ah teng ci gui. ³ Bawipa naw phi, a kut vangtäng ah ng'gung ci awn, "Avan ah ma ah ng'düi ä" ciah pyein neta, ⁴ "Kyiin hnüp ung akni bi vai ma? Ngon vai ma?" ciah chang k'hli ng'shi gui sei, ngami cu kä k'chi ba ci gui. ⁵ Acun ung, a m'lungshe nak awn teng gui ne ami m'lung a shetkat ah hmawk ah thüsei neta, "Na kut k'shäng ä!" cine pyein sei ani naw akut shäng seih acunah kut cu vangtäng kut awn täng ba ci. ⁶ Acun ung Pharisee gui naw lut law u ne, Bawipa cu ihawkcha ah m'di vai ciah Herod ah hnuläk gui awn a ng'ghit ah ngingoi ci gui. ⁷ Bawipa cu angdüihpüi gui awn atäng ah tuili pei ah ng'nawk law sei, Kalilee kho ⁸ Jerusalem mango ung tüin ne Judah kho, Itume kho, Jordan tuinu vangtäng ungka lawk ci gui nü la Turuh mango, Sidon mango pei gui ungka lawk ci gui nü naw abilawh nü ng'ya u ne ama ah lawk ci gui. ⁹ Chang gui naw Bawipa cu k'cungvong u ne kä ami tut-thäng en vaiah Bawipa pei ah ng'hleiko tumat a ng'täi ah ami tha vaiah angdüihpüi gui pyein ah gui ci. ¹⁰ Ikyaseiciung, Bawipa naw chang akda a gaai ba sak ah kyasei, gopyam ci gui van naw Bawipa cu ami hli tu vaiah ng'buh tuk ci gui. ¹¹ Mümcha she gui cun phi, Bawipa hmu u ne ng'bawlawk u neta, "Bawipa cu Khanpughi ah Htapa ah kyak ci" ciah ng'hawmshak ci gui. ¹² Cunah amawngma gui, a u awn kä ami m'thein vaiah a kha-thük ah ng'thumkhän gui ci. ¹³ Acun ung Bawipa cu khomhtung khan ah kai ne, a ng'yak hlü om ciah chang gui khü gui sei, Bawipa pei ah lawk ci gui. ¹⁴ Bawipa awn atäng ah ami om vaiah phi kya, ami ng'thu ng'shä vaiah phi kya, natnak gui m'gaai u ne, ¹⁵ Khokshe gui ami gawit-täm vaiah phi kya, a tüih-täk gui vaiah phi kya, chang ghaleigoi ah kyak ci guiah ¹⁶ Peter ciah ng'mingthai a pet ah Simon, ¹⁷ Ng'kyeng ah hta ciah suilam nak ciah Boanerges ciah ng'mingthai a pet ah Zebedee ah htapa k'hnih ah kyak ci goi ah James la Johan, ¹⁸ Andrew, Philip, Bartholomew, Matte, Thomas, Alaphe ah hta James, Thadde, Kha-nan chang Simon ni la, ¹⁹ Bawipa ap ciah Judah Iskhariot ni ah kyak ci gui. ²⁰ Bawipa cu im khui ah a luh ba sang ung, ei hngaw kä ei hlawit khai guiah chang k'hli cu ng'bum law ba ci gui. ²¹ Bawipa ah phäinau pawkchang gui naw Bawipa cu k'pang khai guiah lut lawk ci gui. Ikyaseiciung, "Ani cu gu pyi ci" ciah chang gui naw ami pyein ah hmawk ah kyak ci. ²² Jerusalem mango ungka lawk ciah Cacim saya gui naw phi, "Ani cu Beelzebub naw kai nak ci" ciah phi kya, "Ani cu khokshe ng'vaihta ung ng'tung-yi ne khokshe gui gawit-täm ci" ciah phi kya pyein ci gui. ²³ Cunung Bawipa naw ngami gui cu khü gui ne, m'tumtängnak gui awn a pyein nak gui cu, "Khogam naw khogam cu ihawkcha ah gawit-täm hning khai ma? ²⁴ Khopäng tumat cun phi amät ah kyongkhui ah a ng'hnungtuk ng'phyingpai ung cunah khopäng cu kä khänghtek hlawit khai. ²⁵ Im kyongkhui tumat cun phi amät ah kyong ah a ng'hnungtuk ng'phyüngpai ung kä khänghtek hlawit khai. ²⁶ Cunah mäih ah khogam cun phi amät ah kyong ah a ng'hnungtuk ng'phyingpai ung kä khänghtek ne dii khai. ²⁷ Tha-mah cicu akhtükbäih ah kä khitkhon ung a im khui ah lut ne a khawhcham gui a u naw kä gut hlawit khai. Khitkhon päng ah vah a im khui ungka gut ne gah vai. ²⁸ Kei naw akcang ah ka pyein cu hmakat nak gui nü la Khanpughi päipih hmakat nak gui nü ah phäh hma phyawn nak gah hning ci gui. ²⁹ Cunte, Mümcha Theing hmakat nak cicu hma phyawn nak a hawi ciah phi kä gah khai. Angtäi ah ng'thumcha nak gah khai" ciah pyein ci. ³⁰ Ikyasei shinah a pyein ciung, "Bawipa cu mümcha she naw kai nak ci" ciah ami pyein ah hmawk ah kyak ci. ³¹ Cunung, anu la a nau gui cu law u ne akpung ah ng'düi u neta, chang tüi u ne Bawipa khü ci gui. ³² K'koi ne ngok ci gui naw, "Na nu la na nau gui naw, nang Bawipa ning shui u ne k'pung ah om ci gui nei" ciah pyein u sei, ³³ Bawipa naw, "Kei ah ka nu, ka nau gui cu a u gui ma?" ciah ng'shi gui ne, ³⁴ k'cungvong ne ngok ci gui cu teng gui neta, "Shin gui cu ka nu, ka nau gui nei. ³⁵ Khanpughi ah ng'yak hlü bik cicu ka nu, ka be, ka phäinau ah kyak ci" ciah pyein ci.