¹ Hnüp api a shou kawnah, Bawipa cu Kapernaum mango ah hteit ba mä ne, im ah om ci ciah ng'ya u neta, ² Im m'kawit hngaw kä ng'awng ba hning khai ah chang gui cu veng veng ah ng'bum law u sei, Bawipa naw ng'thu m'thein gui ci. ³ Acun ung, a kutkhaw shik ciah chang tumat cu chang phli naw, Bawipa ah ma ah law pui ci gui. ⁴ Chang da aih sei, Bawipa ah ama ah kä ng'et hning u ne kä gawk law püi hlawit u neta, Bawipa a om nak a khan ah m'kyung khan ah im m'cih phye u ne chang pyam cu ama ah a ih phak mah mah ah yuk chak ci gui. ⁵ Bawipa Jesuh naw ngami ah yumnak a hmuh law ung a kutkhaw shik ci awn, "Ka hta aw, na katnak kaning k'phyawn pyi ci" cine pyein nak ci. ⁶ Acun ung ngo tuk ciah Cacim pyang saya amshah naw, ⁷ "Shinah chang naw ikyasei shinah a pyein ma? Khanpughi tumat ah kawnah a u naw hmakat nak k'phyawn hning ne ma?" ciah ami m'lungkyong ah ng'ngaktüh ci gui. ⁸ Ami m'lungkyong ah ami ng'ngaktüh cu Jesuh naw a ng'ghit ah hmat ne, "Nami m'lungkyong ung ikyasei shinah nami ng'ngaih ang? ⁹ A kutkhaw shik ciah chang awn, Ihawkcha pyein ung ng'hlawihlap pi khai aw? 'Na hma nak kaning k'phyawn pyi nei' cine pyein ung ng'hlawi khai aw? 'Ng'düi law ä. Na ih-phak kawit ne hteit ä' ciah pyein ung ng'hlawi khai ma? ¹⁰ Chang ah Htapa cu khomdek khan ah hmakat nak phyawn hning ciah nangmi naw nami hmat vaiah" cine ngami gui awn a pyein nak gui kawnah, a kutkhaw shik ci gui awn, ¹¹ "Kaning pyein nak khai. Ng'düi law ä. Na ihphak hteh pui ne, na im ah hteit ba ä" cine pyein ci. ¹² Ani cun phi acun ung a ng'ghit ah ng'düi law ne a ihphak hteh pui neta, chang akda guiah ma ah hteit ci. Cunah chang akda naw cäi u ne, "Shinah mäih akhnü-ät phi kä hmuh man" ciah pyein u neta Khanpughi m'hlümtai ci gui. ¹³ Cunkawnah tuili pei ah hteit sei, chang akda cu Bawipa ma ah gawk law u sei, ngami gui m'cämbä gui ci. ¹⁴ Lam a hteh sang ung, Alphaeus ah htapa Levit cu a khon louk nak im ung a ngoh cu hmuh ne, "Ka hnu na läk ä" cine pyein nak ci. Ani naw cun phi ng'düi law ne a hnu läk ci. ¹⁵ Cunkawnah Levit ah imkyong ah eikbei ung a khon k'louk gui, hmakat chang gui, Bawipa la angdüihpüi gui cu atäng ah eiawki gui. ¹⁶ Cunah akhon k'louk gui la katnak bik ciah chang gui awn atäng ah ami eiawk ghom cu Cacim pyang Pharisee gui naw hmu u ne, "Ani naw ikyasei akhon k'louk gui la chang k'she gui awn atäng ah a eiawk ghom ma?" cine angdüihpüi gui awn pyein nak ci gui. ¹⁷ Jesuh naw ng'ya ne, "Gaigong ci naw sei saya kä hlü ci. Gopyam ci gui naw vah hlü ci gui. Ng'düng ciah chang gui khü vai ah kä ka lawk ci. Chang k'shekha gui ka khü khai ah ka lawk ci" cine pyein na gui ci. ¹⁸ Johan ah hnuläk gui la Pharisee gui cu ei hlawi ci gui. Ngami cu Bawipa ah law u ne, "Ikyasei nang ng'düihpüi gui naw ei kä mi hlawi tu ma?" cine ng'shik ci gui. ¹⁹ Bawipa Jesuh naw, "Hta m'bum ciah pamihta cu a teihpüi pawchang gui awn atäng ah ami om sang ung, ngami cu ei hlawi man u naw? Ngami cu hta m'bum ciah pamihta a om ah chüih, ei kä hlawi khai gui. ²⁰ Cunte, hta m'dawn ciah pamihta cu apawchang gui awn ng'pai u ne ngami ungka ami ng'khah püi ah khin a gawk law ung ngami naw ei hlawi lawk khai gui. ²¹ A u naw phi, hlui phyim cu k'hlui thai awn kä k'bem man ci. Cunah k'bem ung, pyawn thai naw hlui k'she cu ei seih, a teek nak cu ng'shawng law pi ne she law pi khai. ²² Cunah mäih ah, sapyit tui akthai cu um akphyim ung a u naw kä than man ci. Cunah than ung sapyit tui naw um cu m'shet sei, sapyit tui cu yuut ne um phi di khai. Sapyit tui akthai cu sapyit-um akthai ung vah than ci gui" cine pyein ci. ²³ Kyinhnüp ung Bawipa naw htang m'guh laima hlun ne hteit sei, angdüihpüi gui naw ami hteh hlu ah htang m'guh vuui gui k'bawit ci gui. ²⁴ Acun ung Pharisee gui naw, "Kyinhnüp ung kä bi vai cu ngami naw ikyasei ami bi ma?" cine Bawipa ng'shik ci gui. ²⁵ Bawipa naw, "David naw a ei vai kä om sei, a mät ung tüin ne ani awn atäng ah om ci gui ami cawi law sang ung a i a bi law man kä nami k'khe tu man naw? ²⁶ David cu taigütung Abiahta ah khin ung Khanpughi ah imkyong ah lut ne, taigütung ah kawnah a u naw phi kä ei man ah m'htut ei ne, akchang gui awn phi pe gui ci" cine pyein ci. ²⁷ Cunkawnah, "Kyinhnüp cu chang ah phäh ah kyak ci. Chang cu kyinhnüp ah phäh ah kä kyak ci, ²⁸ Cunkyasei, Chang ah Htapa cu kyinhnüp ah Bawipa ah kyak ci" ciah pyein na gui ci.