¹ Khanpughi ah a htapa Jesuh Khrit ah ng'thu k'ni ah ng'tüin nak cu shinah kyak ci. ² Profet gui naw ami pyein cu, "Teng ä! Na hteh nak vaiah lam pyang khai ah ka ng'shächang cu na ma ah ka tüi ci." ³ "Pyaa ah ng'hawmshak ah aw cu, Angtäighing Khanpughi ah alaw nak vaiah lam pyang vä! Lam cu ng'shungdüng sak vä!" ciah a pyein ah mäih ah, ⁴ Johan naw bunghmu ah tuihnimnak pe ne, katnak ungka phyawn nak vai, ng'yuu nak awn ng'gui ciah tuihnimnak mawngma pyein ci. ⁵ Jerusalem mango chang gui ung tüin ne, Judah khochang gui nü cu, Johan ah pei ah hteit u ne, ami cheishoh nak phleh u ne, Jordan tui ung ng'hnim ci gui. ⁶ Johan naw kalauk ah a mu awn tah ah hlui cu hlui ne, a khee ung hlavun awn pyan ah shawm-guui awn khon neta, phyuhtik m'khamkho gui la pyama om ciah khoitui, ei neh om ci. ⁷ A pyeinsak ah ng'thu cu, "Kei ah mä m'khütnäng tuba cicu ka hnu ah lawk ci. Ani ah khodawk-guui phi, phyan tu pet vaiah kä ka khinkha ci. ⁸ Kei naw nangmi cu tui ung, kaning m'hnim gui ci. Ani naw Mümcha Theing awn tuihnimnak ning pe gui khai!" ciah pyein ci. ⁹ Cunkawnah, Kalilee kho Nazaret mango ungka Jesuh law sei Jordan tuilong ung, Johan naw tuihnimnak pekci. ¹⁰ Tui ungka naw a ng'düih law ba sang ung, khankho ng'hmong ne, Mümcha Theing cu mümkha vai hlüah a mät ah khan ah a kyum law cu hmuk ci. ¹¹ Khankho ungka naw phi, "Nang cu ka htakhitui nei. Kaning yumhni ci" ciah k'aw ng'shang lawkci. ¹² Acun vai awn, Mümcha Theing naw Jesuh cu pya ah hteh sak ci. ¹³ M'hnüp phlikip lüng lüng ung cunah pya ah om seih, khogam naw tüitok ci. Khisa gui awn atäng ah om ci. Khankho chang gui naw phi tumbei ci gui. ¹⁴ Johan cu thawngkhui ah a gawk kawnah, Jesuh cu kalilee kho ah hteit ne, ¹⁵ "A khin küm pyi ci. Khanpughi ah uknak kho cu ng'et law pyi ci. Ng'yuu ba u ne Khanpughi ah akho ng'thu k'ni yum vä" ciah pyein ci. ¹⁶ Kalilee tuinu pei ah a law sang ung, Simon la Andrew ng'phäinau goi cu, ng'vai ani voih, hmu goi ne, ¹⁷ "Ka hnu na läk law niä. Nangni cu chang leeng ciah ngapha ah, kaning pyang goi khai" ciah pyein sei, ¹⁸ ngani naw ani ng'vai cu, a ng'ghit ah nawng nine, a hnu ah läki goi. ¹⁹ Cunkawnah, a shäng ng'lak na seih, Zebedee ah a hta James la Johan ng'phäinau goi cu, ng'hleiko khan ah ng'vai ani ghüüi cu hmu goi neh, a ng'ghit ah khü goi ci. ²⁰ Ngani goi cun phi, ng'hleiko khan ah om ci-ah ani ghüh ah chang gui lah, ani pa Zebedee cu nawng ghüt nineh, a hnu ah ng'läk tuki goi. ²¹ Kapernaum mango ah hteit u ne, kyinhnüp ung Bawipa cu ng'bum-im ah a ng'ghit ah lut ne m'cumcäi gui ci. ²² Chang k'hli naw phi a m'cumcäi ah ng'thu cu ng'ngai u ne, cäicam ci gui. Ikyaseiciung Cacim pyang ah phi kä kyane, uktu ng'vaiah mäih ah, a m'cumcäi guiah hmawk ah kyak ci. ²³ Cunah chang guiah ng'bum-im kyong ung, khokshe naw a gheh ah chang cu lut law ne a ng'hawh cu, ²⁴ "Aw Nazareth mango chang Jesuh aw, keimi ung a i cu na ng'yakhlü? Keimi na na m'dimdap gui khai maa na law? Nang a u ah na kyak cu kami ning hmat ci. Nang cu Khanpughi ah aktheingthap tumat ah na kyak ci." ²⁵ Jesuh naw, "Kä khawk-khek ne ceinah chang ungka, lut law ä!" ciah pyein ci. ²⁶ Khokshe naw ani cu ng'tat hlak neh a ng'khainu ah vuvik päng ne dawng ci. ²⁷ Chang k'da cu cäicam u ne, "Shin cu a i hngon ni-mä? Shinah cäicamvai akthai cu a i ni-mä? Mümcha k'she gui pang hngo naw, a huham awn m'cäibe gui seih, ng'ngai ki gui phäi nei" ci u ne tumat naw tumat pyein ki gui. ²⁸ Ng'thungthang cun phi Kalilee khopäng nü nung a ng'ghit ah ng'thang yawp ci. ²⁹ Ng'bum-im ungka ng'düi law u ne Simon, Adrew niah im ah James, Johan ni awn atäng ah a ng'ghit ah hteit ki gui. ³⁰ Simon ah pikhaw cu m'hnat sei a ng'yän cu, ak-yä ah m'thein ki gui. ³¹ Bawipa cu law ne ng'hnumi ah a kut ung k'pang ne, a m'thawh vai awn ng'ghit ah gai neta, tumbei khinchah na gui ci. ³² Khokhni va ng'kya ne kho mü law sei, kä gai ciah chang gui la khogam naw a kai nak gui cu a pei ah law pui u ne, ³³ mango alüng cu m'kawit pei ah ng'bum lawki gui. ³⁴ A heihei a hnga hnga ah kyihkyawk vaiah natnak gah ki gui cu, m'gai gui ci. Khokshe gui phi k'täm gui ci. Khokshe gui naw Bawipa hmat u seih ng'thu m'kha-ät phi kä pyein sak gui ci. ³⁵ Ngawilam kho kä a thaih pha ung, Bawipa cu tho law ne pyaa ah hteit ne, taigü ci. ³⁶ Simon la apawkchang gui naw läk u ne, ami shui law ung, ³⁷ Bawipa cu hmu u neta, "Chang van naw, nang Bawipa ning shui ki gui nei" ciah pyein naki gui. ³⁸ Bawipa naw phi, "Ng'et ciah mango pigaw gui ung ng'thu k'ni ka pyein nak gui vaiah mi hteit kaw. Cun vaiah phäh, ka kyum lawki" ciah pyein ne, ³⁹ Kalilee kho ng'bum-im nü nü ah ng'thu pyein ne khokshe gui gawittäm gui ci. ⁴⁰ Kheilei ciah chang tumat cu a pei ah law ne m'khukhudawng neta, "Bawipa, na ng'yakhlü a om ung, na na theingthap sak hning ci" ciah ng'hungpa nak ci. ⁴¹ Jesuh cu chikhna ciah m'lung om seih, akut shäng ne tawk neta, "Ka ng'yakhlü om ci. Theingthap ä!" ciah pyein naki. ⁴² Cunah apyein nak ah ng'ghit ung, akkheilei maih ne theingthap ci. ⁴³ Jesuh naw phi, "Na m'htei nak vai. ⁴⁴ A u awn phi ng'thu m'kha-ät phi kä na pyein nak vai. Taigü ah hteit ne na mät la mät va m'hnu ä. Chang hei ung hmukshing nak thei vai tumat ah akyak vaiah na theing ciah kyasei Moses naw ng'thumkhän a tha mäih ah douthak nak na pet vai" ciah maa nane a ng'ghit ah tüi ba ci. ⁴⁵ Ani cu a lut law kawnah a shai kä khäm ne acunah mawng cu van awn hmat sak ci. Cunkyasei, Bawipa cu acun kawnah mango kyong ah a ng'dangshai ah kä lut ba phung ah mango k'pung düit ah om seih kho nü ungka apei ah lawk ci gui.