¹ Cunkawnah, Bawipa cu cunah hmun ungka ng'düi law ne, Judea kho la Jordan tuinu heiga täng ah hteih sei, chang k'hli cu a pei ah ng'bum law ba ci gui. Bawipa naw phi a bi man ah mäih ah ngami gui cu m'theimthang gui ci. ² Cunung Pharisee amshah naw Bawipa cu ami hleep hlü ah phäh ah k'et law u ne, "Chu-mah ciah pami tumat naw amät ah chu a ng'taai püi cu ng'thumkhän awn ng'guigong naw?" ciah ng'shik ci gui. ³ Bawipa naw phi, Moses naw ihawkcha ah ng'thumkhän ning pe gui naw?" ciah ng'shi ba gui sei, ⁴ Ngami naw, "Ng'taainak ah guk ah ca awn ng'taai püi ne gah khai ah Moses naw pyein ci ciah pyein ba ci gui. ⁵ Jesuh naw phi, "Nami m'lung m'li aih sei ani naw shinah ng'thumkhän aning guk pe guiah kyak ci. ⁶ Cunte, tüisho pyanthamnak a ng'tüin law ge ung Khanpughi naw ngani cu pami la hnumi ah tüipyang goi ci. ⁷ Cunah hmawk ah pami naw amät ah nupa cu nawng ne akchu awn ng'khap ni ne, ⁸ Ngani goi cu pum a tumat ah kawng-ät lawk khai goi. Cunkyasei, ngani cu chang k'hnih ah kä kya ba ni ne, a tumat ah kyak ci goi. ⁹ Cunkyasei, Khanpughi naw ng'pungkhap sak goi ne akphüih goi ah k'phüih cu chang naw kä m'taai goi sä" ciah pyein ci. ¹⁰ Angdüihpüi gui cu imkyong ah ami om sang ung shinah mawng Bawipa awn thap ne ng'shik ci gui. ¹¹ Bawipa naw phi, "Amät ah chu ng'taai püi ne a hei hnumi awn ng'chungla püi cicu cunah hnumi awn kyongkhui ung kyoikak ciah kyak ci. ¹² Hnumi cun phi amät ah cei awn ng'taai ne a hei pami a cei nak ba ung imkyong ung kyoikak ciah kyak ci" ciah pyein ci. ¹³ Cunung, Bawipa naw tawk ne a hli pet gui vaiah chang gui naw akhmaw gui cu a pei ah ng'khah law püi ci gui. Cunte, angdüihpüi gui naw ngami gui cu m'ngok ci gui. ¹⁴ Jesuh naw cun hmuh ne m'lungshe neta, "Akhmawhta gui cu kei ah law u sä. Lam kä kham vä. Ikyaseiciung, Khanpughi ah uknak kho cu ngami guiah khopäng ah kyak ci. ¹⁵ Akcang kaning pyein na gui khai. Khanpughi ah uknak kho cu akhmawhta guiah mäih ah kä douchang cicu cunah khopäng ah hawiciah phi kä lut hlawit khai" ciah pyein ci. ¹⁶ Cunkawnah, Bawipa naw akhmawhta gui cu k'pawm gui ne ami khan ah a kut taih ne khriham pe gui ci. ¹⁷ Bawipa cu lam ah a hteh sang ung chang tumat naw dawng law ne ama ah m'khukhudong neta, "Nik ciah saya aw, angtäi ghinnak ka gah vaiah i ka bi vai aw?" ciah ng'shik ci. ¹⁸ Jesuh naw phi, "Kei cu ikyasei nik ciah tumat ah na na khü ma? Khanpughi tumat ah kawnah nik ci a tumat phi kä om ci. ¹⁹ 'Chang kä ngon vai. Kyongkhui ung kä kyoikat vai. Kä m'guk vai. Kä hmukshing cu hmukshing vai süah kä pyein vai. Kä hlehlak ne chang ah kaa kä gut vai. Na nupa na kyih-a vai' ciah ng'thumkhän gui na hmat ci" ciah pyein nak ci. ²⁰ Ani naw phi, "Saya aw, shin gui avan cu ka k'hmaw sang ung tüin ne ka läk pyi ci" ciah pyein ci. ²¹ Jesuh naw cunah chang cu tüp tüp ah teng ne, yei na neta, "Nang ung tumat hlü ba ci. Nang ung om ci gui nü hteit ne va yoi neta, dukhaih ci gui awn pe ä. Cunah na bi ung khankho ah khawhcham na gah khai. Cunkawnah, law ne ka hnu ah na läk ä" ciah pyein ci. ²² Cunah chang cu khawhcham ng'büh-mang ciah kya ne, cunah ng'thu a ng'yak law ung a hmai she ne thüihlei ne hteit ba ci. ²³ Cunung Jesuh naw a pei hnuma ah teng ne, "Ngui ghui tha ci gui cu Khanpughi ah uknak kho ah ami lut tu vaiah khak aih ci phäih nei" ciah angdüihpüi gui awn pyein na gui ci. ²⁴ Angdüihpüi gui naw Bawipa ah ng'thu cu cäicam ci gui. Cunte, Jesuh naw, "Ka htakhitui gui aw, Khanpughi ah uknak kho ah lut vai khak aih ci nei. ²⁵ Ng'büh-mang ci naw Khanpughi ah uknak kho ah a lut vaiah mä kalauk naw ng'pyüm ah k'khi ung a lut vai cu ng'hlawi tuba ci" ciah thap ne pyein ci. ²⁶ Cunung angdüihpüi gui naw cäicam law pi u ne, "Cunah akyak ung a u naw hunnak gah hlawit khai ma?" ciah mat la mat pyein ci gui. ²⁷ Jesuh naw ngami gui cu tüp tüp ah teng ne, "Shin cu chang guiah phäh ah kä kyak hlawit tu pang ung phi, Khanpughi ah phäh ah cunah kä kyak ci. Ikyaseiciung, Khanpughi ah phäh ah apängvan cu kya hlawit ci" ciah pyein ci. ²⁸ Cunung, Peter naw "Keimi cu om ci nü nawng u ne nang Bawipa ah hnu kami ning läk pyi ci" ciah pyein ci. ²⁹ Jesuh naw, "Akcang kaning pyein na gui khai. A u naw phi kei ah phäh la ng'thu k'ni ah phäh ah a im phi kya, a phäinau nube phi kya, a nu phi kya, a pa phi kya, a htanau phi kya, a kho a m'dek phi kya a nawng ung, ³⁰ Cunah chang naw tukbäih ghinnak ung dukdeinak gui mah mah ah a phya ah a phu ng'kheng ah kyak ciah im gui, kho la m'dek gui, phäinau nube gui, nu gui, htanau gui gah ne ngoikho ghinnak ung angtäi ghinnak gah khai. ³¹ Cunte, akhtükbäih gui akda cu akhnubäih ah kya u ne akhnubäih gui akda cu akhtükbäih ah kya lawk khai gui" ciah pyein ci. ³² Ngami cu Jerusalem mango ah ami a hang kai sang ung, lam ah Jesuh cu ana ma ne hteit sei angdüihpüi gui cu cäicam ci gui. A hnu ah läk ci gui phi kyikyawk ci gui. Cun ung Bawipa naw angdüihpüi ghaleigoi cu khü ba gui ne, amät ung kya lawk khai gui cu pyein na gui ne, ³³ "Ng'ngai vä. Mikmi cu Jerusalem mango ah mi hteit ci. Chang ah Htapa cu taigü ng'vai gui la Cacim saya gui ah apnak gah lawk khai. Ngami naw ani cu ngon vaiah ng'thumcha u ne khuihei guiah ap khai gui. ³⁴ Khuihei gui naw ani cu cawpeh na u ne ami m'shitui awn m'thui u neta, tuthat dukdei na u ne ngon khai gui. Cunte, kho hnüp thum a ng'lak nak law ung ani cu thawh law ba khai" ciah pyein ci. ³⁵ Cunung, Zebedee ah hta goi James la Johan naw apei ah et law nine, "Saya aw, kani ning ng'yoih gui cu keini ah phäh ah na na bi pe goi vaiah kani ng'ya hlük ci" ciah Bawipa awn pyein nak ci goi. ³⁶ Bawipa naw phi, "Nangni ah phäh a i kaning bi pe goi vaiah nani ng'ya hlü naw?" ciah ng'shi goi sei, ³⁷ Ngami naw, "Keini cu na bawimang nak awn na k'pat täng ah tumat, na k'eng täng ah tumat na ngoh sak goi ä" ciah pyein ci goi. ³⁸ Cunte, Jesuh naw, "Nangni naw a i nani na ng'yoih cu kä nani hmat ci. Ka awk vaiah khap nani awk vaiah, käcung ka gah vaiah tuihnimnak nani dou vaiah nani dou hlawit khai ma?" ciah ng'shi goi sei, ³⁹ Ngani naw, "Kani m'khütnäng hlawit khai nei" ciah pyein ba ci goi. Jesuh naw phi, "Ka awk vaiah khap cu nani awk khai. Ka dou vaiah tuihnimnak cu nani dou khai. ⁴⁰ Cunte, ka ng’eng täng la ka k'pat täng ah ngok khai cu kei naw ka pet ah kä kyak ci. Cun ah ngoh nak cu a m'khämhlem pe guiah phäh ah bäng ah kyak ci" ciah pyein ci. ⁴¹ Pawih ciah angdüihpüi gha naw shin ah mawng ami ng'yak law ung James la Johan cu thüi nak ci gui. ⁴² Cunung Jesuh naw ngami gui cu khü gui ne, "Khuihei gui ung ami mät uk khai ah ami k'bäi gui naw kho chang guiah khan ah htuit-hteng ne uk u ne, ami ng'vaihta gui naw ami mät ah khan ah ami m'ghäimce thei cu nami hmat ci. ⁴³ Nangmi ung läi cunah kä a kyak vai. Nangmi ung a ng'vaihta ah kya hlük cicu nami m'gakchang ah a kyak vai. ⁴⁴ Nangmi ung khawngmang hlük cicu avan ah changshäm ah a kyak vai. ⁴⁵ Ikyaseiciung, chang ah Htapa cun phi ami tumbei m'hteimhtang vaiah kä kya ne, tumbei m'hteimhtang vai la akda guiah phäh ah lawitnak ah a phu ah amät ghinnak nawng khai ah lawk ci" ciah pyein ci. ⁴⁶ Cunkawnah, ngami cu Jericho mango ah gawk ci gui. Bawipa cu angdüihpüi gui awn chang k'hli akda mah mah ah Jericho ungka naw ami lut law sang ung Timaeus ah hta Bartimaeus ah ng'ming nak ciah amik mü ciah ei ng'yoithäk ciah chang tumat cu lam pei ah ngok ci. ⁴⁷ Nazareth mango chang Jesuh ah a kyak ah mawng ani naw ng'ya ne, "David ah htapa Jesuh aw, na m'gen to ä" ciah ng'hungpa ci. ⁴⁸ Chang gui akda naw ani cu düm ah a om vaiah m'ngok ci gui. Cunte, ani naw, "David ah htapa, na m'gen toä" ciah ng'hungpa law pi ci. ⁴⁹ Cunung Jesuh naw ng'düm ne, "Ani cu ng'khah law püi vä" ciah pyein ci. Chang gui naw phi cunah amik mü cu khü u ne, "Kä na ng'ä vai. Ng'düi ä. Bawipa naw ning khü pyi ci" ciah pyein ci gui. ⁵⁰ Ani naw phi amät ah suinu cu hluit ne, ng'düi law neta Jesuh ah lawk ci. ⁵¹ Jesuh naw, "Nang ah phäh ah a i kaning bi pe vai na ng'ya hlü naw?" ciah ng'shi sei, amik hmüp naw, "Rabbi aw, kamik ka hmuh vaiah na na bi pe vai ka ng'ya hlük ci" ciah pyein ci. ⁵² Jesuh naw phi, "Hteit ä. Na yumnak naw ning hun pyi ci" ciah pyein ci. Cunah ng'ghit ung ani cu amik hmu law ne lam ah Bawipa ah hnu läk ci.