¹ Jerusalem mango la olive khomhtung pei a yukaa ah om ciah Behtphake la Bethani pigo ah ami gawk law ung angdüihpüi hnih cu tüi goi ne, ² "Nani ma ah om ciah pigo ah hteit niä. Acunah pigo ah nani gawk ung a u naw phi kä a ng'cum man ah myee-hta ami khit cu a ng'ghit ah nani hmuk khai. Guui k'phyen nine law püi niä. ³ Tumat mat naw, 'Ikyasei shinah nani bi ang?' cine ami ning ng'shi ung, 'Bawipa naw ng'ya hlük ci' ciah pyein ba niä. Cunah nani pyein ung cunah chang naw a ng'ghit ah ning pe goi khai" ciah m'cäi goi ci. ⁴ Angdüihpüi goi cu hteit nine m'kawit pei lam ung ami k'pawn ah myee-hta cu hmu nine ami k'pawnnak ah guui cu k'phyen ci goi. ⁵ Acun ung ng'düi ciah chang amshah naw, 'Ikyasei mye-guui nani k'phyen ma?' ciah ci u sei, ⁶ Jesuh naw a m'cäi goiah mäih ah angdüihpüi goi naw ani pyein ba kawnah ngami naw ngüm-ä tuk ci gui. ⁷ Jesuh ah pei ah myee-hta law püi nine ani hluihlak cu myee ah m'ghuk khan ah ani taih kawnah, Bawipa naw ng'cum ci. ⁸ Chang akda naw ami hluihlak gui cu lam ung k'phah ci gui. Amshah naw shingban gui k'chah u ne lam ung phah ci gui. ⁹ A hnu ama ah hteit ci gui naw, "Hosanna ah kya sä. Angtäighing Khanpughi ah ng'mingküi awn kyum lawk ciah Bawi ng'vai cu a phun shen sä! ¹⁰ Angtäighing Khanpughi ah ng'ming awn tukbäih cohkyan law vaiah mi pa David ah uknak khopäng cu a phun shen sä. Akhlünpi khankho k'häi ung Hosanna ah kyasä" ciah ng'hawmshak ci gui. ¹¹ Jesuh cu Jerusalem mango ah phi kya, Taigüim ung phi kya, lut ne apäng päng a teng kawnah kho mü law sei, angdüihpüi ghaleigoi awn atäng ah Bethani pigo ah hteit ci. ¹² A ngong hnüp ung, Bethani pigo ungka ami hteh ba sang ung, Bawipa cu ei m'cawi lawk ci. ¹³ Acun ung, a khuhnah m'kyim ne lim-an ciah ng'bang ghing cu akthuuk ungka naw hmu ne, ng'bang theih om hngaw hman khai ciah va hteit ci. Cungphih, ava gawk ung ng'bang k'theih bitnak ah khin kä gawk pha pang sei, cunah a dung ung a khuhnah ah kawnah a i kä hmuk ci. ¹⁴ Cunung cunah a dung awn, "Tukbäih tüin ne nang ungka a m'theih cu a ng'läit ah a u naw phi kä ei ba sä" ciah pyein ci. Angdüihpüi gui naw phi ng'yak ci gui. ¹⁵ Jerusalem mango ah ami gawk law ung Jesuh cu Taigüim ah va lut ne, Taigüim kyong ah sumlei ci gui cu gawit-täm gui neta, ngui ami m'thawmhlainak ah capoi gui phi kya, mümkha yoi ci guiah ami ngoh nak gui phi kya, buh tawn ci. ¹⁶ Cunkawnah, Taigüim hlun pah ne a i phi kä m'kawn sak gui ci. ¹⁷ Bawipa naw, "'Ka im cu pakhui vanah taigü nak im ciah khü khai gui cine Cacim ung ng'guk ciah kä kya naw?' Cunte, nangmi naw cunah im cu m'guk ei guiah ng'detnak ah nami lat ci phäih nei" ciah pyein ci. ¹⁸ Taigütung gui la Cacim saya gui naw cunah mawng ami ng'yak law ung, Bawipa ngon nak hlawit vaiah ninglam shui ci gui. Ikyaseiciung, chang k'hli van naw Bawipa ah m'theimthang cu cäicam u ne m'hlümtai u sei, ngami naw kyih ci gui. ¹⁹ Kho a mü law hlü ung, Jesuh la angdüihpüi gui cu mango k'pung ah lut lawk ci gui. ²⁰ Khongoi täng lam ung ami hteh sang ung, a pya ungka naw tüin ne ng'gung yawp ciah ng'bang ghing cu ngami naw hmuk ci gui. ²¹ Cunung Peter naw shüm ba ne, "Rabbi aw, teng ä. Na k'phyun ah ng'bang ghing cu ng'gung yawp pyi ci phäih nei" ciah pyein ci. ²² Jesuh naw phi, "Khanpughi yum vä. ²³ Akcang kaning pyein nak gui cu, a u naw phi shinah m'htung awn, 'Ng'nawn ne tuinu-likim ah ng'kya ä' ciah a mät ah m'lung kyong ah ng'ngaih hnih nak a pi ah phi kä om seih, a pyein ah mäih ah kya lawk khai ciah yumnak awn a pyein ung acunah kya lawk khai. ²⁴ Cunkyasei, kaning pyein na gui khai. Nami taigü law ung nami taigü gui avan cu gah pyi nei ciah yum vä. Cunah a kyak ung nangmi ah phäh ah acun ah kya lawk khai. ²⁵ Ng'düi ne nami taigü law ung a u baw nami m'kat vai ibawh a om ung, m'gein tu vä. Cunung Khankho ah om ciah nami pa naw phi nami hmakat nak gui ni m'gein gui khai. ²⁶ Cunte, kä nami m'gein ung khankho ah om ciah nami pa naw phi nami hmakat nak gui kä ning m'gein gui khai" ciah pyein na gui ci. ²⁷ Cunkawnah, ngami cu Jerusalem mango ah ng'hlee ne gawk ba ci gui. Bawipa cu Taigüim kyong ah a va lut sang ung Taigütung gui, Cacim saya gui la a ghi ng'vai gui naw a pei ah law u ne, ²⁸ "Shin gui cu imäih huham awn na bi ang? Käcung, a u naw ning bi sak sei na bi ang?" ciah ng'shik ci gui. ²⁹ Jesuh naw phi, "Tumat kaning ng'shi gui ma khai. Na m'shang ba vä. Cunkawnah shin gui cu imäih huham awn ka bi ah mawng ka pyein khai. ³⁰ Johan ah tuihnimnak cu khankho ungka ma? Käcung, chang gui ungka ma? Na m'shang ba vä" ciah pyein ci. ³¹ Cunung, ngami cu mat la mat ngingoi u ne, "'Khankho ungka ah kyak ci' ciah mi m'shang ung, 'Cunah a kyak ung ikyasei Johan cu kä nami yum ma?' ciah pyein lawk khai. ³² 'Chang gui ungka ah kyak ci' ciah mi m'shang ung phi kä bä khai" ciah pyein ci gui. Johan cu profet akcang ciah chang van naw ng'ngai ci guiah kyasei, ngami naw chang k'hli cu kyih ci gui. ³³ Cunkyasei, ngami naw, "Kä kami hmat ci" ciah Jesuh cu m'shang ba ci gui. Cunung Jesuh naw, "Kei naw phi shin gui cu a i mäih huham awn ka bi ah mawng kä kaning m'thein gui khai" ciah pyein na ba gui ci.