¹ Cunkawnah Jesuh naw m'tumtängnak awn a pyein nak gui cu, "Chang tumat naw sapyit get ne ng'vong päng ne sapyit tui k'hlui nak vaiah khui a cawh kawnah, k'kyäng phi cawh ci. Cunkawnah, cunah ng'vong cu kho ng'chauk ne ng'vat neta bilawh ci gui awn khah gui ne khodung lamthuuk ah hteit ci. ² A m'theih bik vaiah a khin gawk law sei lou bik ci gui ungka naw a ng'vong kyong ungka sapyit m'theih gui bik khai ah akchangshäm tumat cu lou bik ci guiah tüi ci gui. ³ Cunung ngami naw cunah changshäm cu pha u ne tuthat u neta a kutghong ah tüi ba ci gui. ⁴ Cunkawnah, akchangshäm a hei cu ngami ah tüiba sei a lu shuk pe u ne, a thang k'she ah lat ci gui. ⁵ Cunkawnah, a hei tumat tüi ba sei, ani cu ngon ci gui. Ahei gui akda tüi ba sei phi, amshah cu tuthat u ne, amshah cu ngon ci gui. ⁶ Ani ung a m'hni ah a htapa tumat bäng om ba ci. Kho-mah naw 'Ka htapa läi ngami naw kyih-a khai gui' ciah pyein ne, akhnubäih ah cunah a htapa cu ngami ah tüi ci. ⁷ Cunte, lou k'bi gui naw, 'Shin cu a pakhawh dou khai ah kyak ci. Law vä. Mi ngon kaw. Cunah mi bi ung, a pakhawh cu mikmi ah khawh ah kya lawk khai' ciah mat la mat pyein u ne, ⁸ Ani cu pha u ne ngon päng u neta, sapyit ng'vong k'pung ah va ghawit ci gui. ⁹ Cunah a kyak ung, sapyit kho-mah naw a i ah cik khai aw? Ani cu law ne lou k'bi gui ngon gui neta sapyit ng'vong phi a hei gui awn pe gui khai. ¹⁰ 'Lung im cawh ci gui naw ami nawng ah lung cu, akhlünpi k'lung k'tung ah kya lawk ci. ¹¹ Shin cu Angtäighing Khanpughi awn kya law ne, mikmi ah ma ah cäicam vaiah kyak ci' ciah Cacim ung kä nami k'khe tu man naw?" ciah pyein ci. ¹² Cunung ngami naw cunah m'tumtängnak naw ami mät a pyein hlü ah mawng hmat u ne, Bawipa cu pha vaiah k'tha nak ci gui. Cunte, chang k'hli ami kyih ah hmawk ah Bawipa cu nawng shüt u ne lut lawk ci gui. ¹³ Cunkawnah ngami cu a ng'thu ng'lung awn m'katnak hlawit vaiah Pharisee la Herod ah chang amshah cu a pei ah tüi ci gui. ¹⁴ Ngami cu law u ne Bawipa awn, "Saya aw, nang saya cu ng'düng ne, a u phi kä na ng'a nak ciah mawng kami hmat ci. Ikyaseiciung, nang cu chang ah hmai kä teng ne ng'thutak awn ng'gui khai ah na m'theimthang ci. Cesar awn a khon pet cu ng'thu awn ng'gui naw? Käcung kä ng'guigong naw? Kami pe khin naw? Käcung kä kami pe khin naw?" ciah ng'shik ci gui. ¹⁵ Cunte, Bawipa naw ngami ah changman ah ami ng'she cu hmat gui ne, "Ikyasei nami na hleep hlü ma? Ka teng vaiah Denari ngui a phe law püi vä" ciah pyein ci. ¹⁶ Ngami naw ami law püi kawnah Bawipa naw, "Shin ung a u ah gup, a u ah caguk ma a om?" ciah ng'shi gui sei, ngami naw "Cesar ah gup la Cesar ah caguk ah om ci" ciah m'shang ba ci gui. ¹⁷ Jesuh naw phi, "Cesar ah khawh cu Cesar awn pe u ne, Khanpughi ah kaa gui cu Khanpughi awn pe vä" ciah pyein ba sei ngami naw Bawipa cu cäicam nak ci gui. ¹⁸ Cunkawnah ghin thawhbanak kä om ci cine pyein ciah Sadducee gui cu a pei ah law u ne, ¹⁹ "Saya aw, chang tumat ah a phäi cu kä ng'shonhta ne shi ne akchu a nawng shüt ung a nau naw a phäi ah ng'shonguui a m'düin pe vaiah cunah hnumi cu a khäm tuba vai ciah Moses naw keimi ah phäh ah ng'thumkhän guk shüt ci. ²⁰ Ng'phäinau chih ami om nak ungka ami phäi a ng'vaipi cu chu-mah ne kä ng'shonhta ah shik ci. ²¹ Cunung, akhnih nak anau naw cunah hnumi cu khäm tuba ne kä ng'shonhta pang ah shi ba mä ci. Akthumnak anau phi acun bä ah kya ne, ²² Ami van chih lüng cu kä ng'shonhta pang ah shi yawp ci gui. Aknubäih ah cunah hnumi phi shik ci. ²³ Ghin-thawhbanak khin ung ngami gui ami thawh law ba ung cunah hnumi cu a u ah chu ah kyak khai aw? Ikyaseiciung, ami van chih naw cunah hnumi cu chuhta na u ne ng'pungkhap pyi ci gui" ciah ng'shik ci gui. ²⁴ Jesuh naw phi, "Cacim phi kya, Khanpughi ah huham phi kya kä hmat u ne, a shinah akshing ah nami kyak ciah kä kya naw? ²⁵ Ikyaseiciung, chang gui cu shih nak ungka ami ghin thawh law ba ung ng'chungla nak kä om khai. Hta m'umnak phi kä om ne khankho ah om ciah khankhochang gui vai süah kyak ci gui. ²⁶ Shik ci guiah thawh ba nak ah mawng Moses ah Cacim ung ng'gaap ah mawng guknak ung Khanpughi naw, 'Kei cu Abraham ah Khanpughi, Isaac ah Khanpughi, Jakop ah Khanpughi' ciah Moses awn a pyein nak man cu kä nami k'khe tu man naw? ²⁷ Khanpughi cu shik ci guiah Khanpughi ah kä kya ne, ghing ci guiah Khanpughi ah kyak ci. Nangmi cu aknui ah lam nami hmaa ci" ciah pyein na gui ci. ²⁸ Cunung Cacim saya tumat naw k'et law ne, ami ng'nüngsheng pyeinsak gui ng'ya ne Bawipa naw akni ah a m'shang ba gui a hmuh law ung, "Ng'thumkhän gui avan ung a i ng'thumkhän cu aktungpi ah kya ne ma?" ciah ng'shik ci. ²⁹ Jesuh naw, "Akhtükbäih ng'thumkhän cu, 'O Israel pakhui aw ng'ngai ä. Mi Khanpughi Angtäighing Khanpughi cu atumat bäng Angtäighing Khanpughi ah kyak ci. ³⁰ Na Khanpughi Angtäighing Khanpughi cu na m'lung avan, na ghinnak avan, na hmuhmatnak avan la na k'tha-mah nak avan awn na m'hni vai' ciah kyak ci. ³¹ Akhnih nak ng'thumkhän cu, 'Na im ng'gi lou ng'phei ung om cicu namät ah mäih ah na m'hni vai' ciah kyak ci. Shinah ng'thumkhän k'hnih ah mä kükyang tuba ciah ng'thumkhän ahei kä om ci" ciah m'shang ba gui ci. ³² Cunah Cacim saya gui naw phi, "Acun nei Saya aw. Khanpughi cu atumat bäng ah kya ne, cunah Khanpughi ah kawnah ahei Khanpughi kä om ci ciah nang saya naw na pyein cu acun k'cang nei. ³³ Khanpughi cu a m'lung avan, a hmuhmatnak avan, aktha-mah nak avan awn m'hni ne a im ng'gi lou ng'phei ung om ciah chang amät ah mäih ah m'hni nak cun phi mei m'khih ne douthak gui vanah mä ni tuba ci" ciah pyein ci. ³⁴ Ani naw lunglang nak awn a m'shan ba ah mawng Jesuh naw a hmuh law ung, "Nang cu Khanpughi uknak kho awn kä na thuuk ci" ciah pyein nak ci. Acun khin ungka naw tüin ne u naw phi Bawipa awn ng'shikcanak gui kä ng'shikca ba dat ci gui. ³⁵ Jesuh naw ng'hlee ne Taigüim ung a m'theimthang ba sang ung, "Bawi Khrit cu David ah htapa ah kyak ci ciah Cacim saya gui naw ihawkcha ah ami pyein hning ma? ³⁶ David amät ge naw Mümcha Theing awn, "Angtäighing Khanpughi naw ka bawi awn, na ga gui cu na khopha k'kaa ah ka yukchak gui khüt seih, ka k'pat täng ah na ngoh vai ciah pyein nak ci' cine pyein ci. ³⁷ David amät ge naw Bawi Khrit awn, "Bawipa" ciah a khü ung Bawi Khrit cu ihawkcha ah ani ah a htapa ah kya hning khai aw?" ciah pyein ci. Chang k'hli akda naw Bawipa ah ng'thu cu yeikyai u ne ng'ngai ci gui. ³⁸ Bawipa naw k'täi ne a m'theimthang nak gui ung, "Cacim saya gui cu m'htei na vä. Ngami cu suinu sui u ne hteh-hton phi kya, sumleinak hmun guiah gogaimawng pyein ne k'tungtainak phi kya, ³⁹ Pum-im gui ung aktungtai ngoh-nak gui phi kya, ei-awk nak gui ung aktungtai ngoh-nak gui phi kya m'hni thei ci gui. ⁴⁰ Ngami naw hmeinu guiah im cu kä ng'düng khai ah gut u ne, ng'she nak awn a ng'shäi läp läp ah taigü thei ci gui. Ngami cu nuipai pi ciah ng'thumcha nak gah khai gui" ciah pyein ci. ⁴¹ Cunkawnah, Bawipa naw pettaknak ah m'küm täng ah va-mang ne ngo neta, chang gui naw ngui gui cu m'küm khui ah ami thun law gui teng ci. Ng'büh-mang ci gui naw akdäm akda pek ci gui. ⁴² Acun sang ung dukhaih ciah hmeinu tumat naw law ne kodrantes ngui a phe phu nak ciah leptos ngui ng'lep goi cu pek ci. ⁴³ Cunung Bawipa naw angdüihpüi gui cu khü gui ne, "Akcang kaning pyein nak gui cu, shinah dukhaih ciah hmeinu naw pettaknak ah m'küm khui ah thun ci gui vanah ta mä lumpi khai ah pe pyi ci. ⁴⁴ Ikyaseiciung, ngami gui van naw ami mät ah ng'büh-mang kümbenak ungka thun ci gui. Shinah hmeinu naw läi amät ah dukhaih nak ungka amät ung om ci nü ah kyak ciah a ei-awk vai avan cu pe pyi ci" ciah pyein ci.