1 Bawipa cu Taigüim ungka a lut law ba ung, angdüihpüi tumat naw, "Saya aw, teng ä. Aknuipai ah däm ciah lungnu gui la nuipai ciah imnu phäih nei" ciah pyein ci. 2 Jesuh naw phi, "Shinah däm ciah imnu na hmuh naw? Shin nu cu akcang ah phye u sei shin ah hmun ung lung tumat phi kä k'pawih ba khai" ciah pyein nak ci. 3 Cunkawnah, Bawipa cu Olive khomhtung ungka naw Taigüim lamtäng ah mang ne, a ngoh sang ung, Peter, James, Johan la Andrew ni law u ne, 4 "Cunah mawngma gui cu a hawiciah a kyak law vai phi kya, cun gui avan a kümpäng law vaiah khin ung i mäih cäicamvai gui vai a ng'dang law vaiah mawng phi kya, na m'thein gui ä" cine Bawipa cu a düm ah ng'shik ci gui. 5 Jesuh naw phi, "A u naw phi, kä ni m'hle gui vaiah m'htei na vä." 6 Chang akda naw ka ng'ming cu la u ne gawk law u neta, 'Kei cu ani ah ka kyak ci' ciah pyein u ne chang akda cu m'hlemhlak lawk khai gui. 7 Ng'tuknak ah mawng la ami ng'tuk law vaiah mawng gui nami ng'yak law ung kä kyih-kyawk ng'ä ng'ai vä. Cun gui cu kya lawk khai. Cunte, khomdek ah a khütnak kä kya phak ci. 8 Pakhui tumat la tumat, khopäng tumat la tumat ng'tu lawk khai gui. A kho nü nü ah shiipi thüng lawk khai. Ei-khaw ah shetnak la kä dimgeinak gui kya lawk khai. Cunah mawngma gui cu khuikha geinvainak ah a ng'tüinak ah kyak ci. 9 10 Ikyaseiciung Khanpughi naw a tüipyan ah khomdek ah ng'tüinak ungka naw tüin ne, tukngoi khüt khai ah kä kya man ci. Ngawi ah phi kä kya ba khai ah khuikha nak cu acu hnüp ung kya lawk khai. Cunah hnüp gui cu Khanpughi naw a shou sak läi ung a u kä phyawng khai. A ghüghäk guiah phäh ah cunah hnüp gui cu k'tawi sak khai. 11 Ayan ge ung kä ng'ngaktüh vä. Acunah ng'ghit ung nami gah ah ng'thu bäng pyein vä. Ikyaseiciung, nami mät ah ng'ngaih nami yum yum nami pyein ah kä kyak ci. Mümcha Theing naw a pyein ah kyak ci. 12 Acunah khin ung phäinau tumat la tumat phi kya, a pa naw a hta phi kya, a shih awng ah thuvi nak khai. Htanau gui naw phi ami nupa gui cu ngon khai gui. 13 Chang avan naw kei ah hmawk ah ning thüi nak khai gui. Cunte, khüpnak khüt khai ah htingling ci naw hunnak gah khai. 14 Profet Daniel naw a pyein ah mäih ah m'dimdap thei ciah a m'shemshai cu kä a ng'düi-nak khin ah hmun ung a ng'düih nami hmuh law ung Cacim khei ci naw k'shing hmat sä. Cunah ami hmuh law ung Judah kho ung om ci gui cu khomhtung ah dawng u sä. 15 M'kyung khan ungka tumat cu k'kaa ah kä yum kyum en sä. Im khui ungka tumat cu a i baw tumat mat ava lak vaiah imkyong ah kä va lut en sä. 16 Lai ung om naw phi a hluihlak a lak ba vaiah a hnu ah kä ng'hlat en sä. 17 Cunah hnüp ung kä-mah ci hnumi la hluktui-aw k'hmaw-mah gui cu tä khai gui nei. 18 Nami dawng nak vaiah a khin cu hlik-kho kä a kyak en vaiah taigü vä. 19 Ikyaseiciung Khanpughi naw a tüipyan ah khomdek ah ng'tüinak ungka naw tüin ne tukngoi khüt khai ah kä kya man ci. Ngawi ah phi kä kya ba khai ah khuikha nak cu acu hnüp ung kya lawk khai. 20 Cunah hnüp gui cu Khanpughi naw a shou sak läi ung a u kä phyawng khai. A ghüghäk guiah phäh ah cunah hnüp gui cu k'tawi sak khai. 21 Cunsangung, chang tumat naw, 'Sha ah Bawi Khrit om ci. Ca-täng ah Bawi Khrit om ci' ciah a pyein law ung kä nami yum vai. 22 Ikyaseiciung, Bawi Khrit ah ng'she ci gui la profet ah ng'she ci gui ng'dang law u ne, a ghüü gui hngaw m'hle ein hning vaiah cäicamvai gui la cäicamnak gui m'dang khai gui. 23 M'htei na vä. Cunah mawngma gui mane ka pyein pyi ci. 24 Cunah hnüp gui ung khuikha geinvainak a ng'pyi kawnah khokhni cu m'hmüp khai. Cha phi kä k'khang ba khai. 25 Khankho aisi gui cu ng'kya lawk khai gui. Khankho tha-mah nak gui cu ng'thüng phäkshäk lawk khai. 26 Cunung, Chang ah Htapa cu küikyang ciah huham la bawimangnak gui awn khongmei ng'cum ne law sei, chang gui naw hmuk khai gui. 27 Cunkawnah, Chang ah Htapa naw khankhochang gui tüi gui ne a ghüghäk gui cu khomdek khokcawi ungka naw khankho khokcawi khüt khai ah hngi-law hngi-kyak a htum a hlip ungka k'bum gui khai. 28 Ng'bang ghing m'tumtängnak ung ng'theithang tu vä. Ng'bang ghing cu a ng'ban tawit ne a hngah a m'thüi law ung khogha a ng'et law ah mawng nami hmat ci. 29 Cunah mäih ah, acunah mawngma gui a kyak nami hmuh law ung Chang ah Htapa cu m'kawit pei ah gawk law pyi ciah mawng hmat vä. 30 Akcang kaning pyein nak gui cu, shinah mawngma gui kä kyak pha ung shinah pakhui kä maih khai. 31 Khankho la khomdek a di maih ung phi ka ng'thu kä di-maih khai. 32 Cunah kho hnüp cu Pa Khanpughi ah kawnah a u naw kä hmat ci. Khankhochang naw kä hmat ci. A Htapa naw phi kä hmat ci. 33 Cunah hnüp cu a i yah ung a gawk law vai kä nami hmat ci kyasei m'htei ne taigü u neta ngäng vä. 34 Shinah mawng cu chang tumat naw a im ungka a lut law ung akchangshäm phäh phäh awn ami bilawh vai khuut la mamawng phäh phäh pe gui ne shok-ngäng awn phi m'htei ne k'sho ngäng sak ci awn täng ci. 35 Cunkyasei, im-mah cu mühün, käcung, münglung, käcung ai-khon-htük, käcung, khong ngawi m'than khin gui ungka a i yah ung alaw vai kä nami hmat ciah kyasei m'htei ne ngäng vä. 36 Cunah kä kyak ung, ani cu a ng'ghit ah law ba ne nami ipdä ning hmu gui khai. 37 "M'htei ne ngäng vä ciah nangmi kaning pyein nak guiah mäih ah chang päng van ka pyein nak ci" ciah pyein ci.