¹ Kyin hnüp la k'cou kä ng'cawn ciah m'htut pawi a gawk law nak vai hnüp goi bäng hlü ba ci. Taigüpa ng'vai gui la Cacim hmat gui naw Jesuh cu thuvi nak awn ihawkcha ah pha u ne ami ngon hlawit vaiah mawng shuiyap ci gui. ² Cunte, ngami naw, "Chang gui ami thüngkyong law vai cu ng'äi vaiah kyasei, pawi hnüp gui ung kä pha cang vä" ciah pyein ci gui. ³ Bawipa Jesuh cu Bethani pigo ung kheilei naw a ei ah Simon ah im ah kai ne a ei-awk tu sang ung, hnumi hta tumat naw aknui ah a phu küi ciah Natos tui ng'ui k'cang thun nak ah lungbawk um cu law püi ne shu payak päng neta, cunah tui ng'ui awn Bawipa ah lu cu shoi ci. ⁴ Chang amshah naw m'lungshe u ne, "Ikyasei tui ng'ui cu akholä ah a pyawmhlah ang? ⁵ Shinah tui ng'ui cu Denari ngui phya thum ah yoi ne, dukhaih ci gui awm peit ung nik khai sü" ciah pyein u ne, cunah hnumi cu m'kat ci gui. ⁶ Cunte, Jesuh naw, "Shinah hnumi naw amät ah m'hni ah bi sä. Ikyasei nami dudong nak ma? Ani naw kei ah phäh ah akni ah bi pyi ci. ⁷ Ikyaseiciung, dukhaih ci gui cu nangmi awn angtäi ah om ci guiah kyasei, nami bi hlü ah khin ung nami m'htei gui hning ci. Kei läi cu nangmi awn angtäi ah ka om ciah kä kyak ci. ⁸ Ani naw a m'khütnäing phung bi pyi ci. Phuh-tom bilawh nak vaiah ka pum cu ng'umshang ne tui ng'ui awn na hlup pyi ci. ⁹ Akcang kaning pyein na gui khai. Khomdek khan avan ung ng'thu k'ni pyein nak phung ung shinah hnumi ah bilawh gui cu ani shüm ba nak ah pyein khai gui" ciah pyein ci. ¹⁰ Cunkawnah, angdüihpüi ghaleigoi ungka tumat ah kyak ciah Judah Ishkariot naw taigüpa ng'vaihta guiah kut ah Bawipa ap vaiah ami om nak ah hteit ci. ¹¹ Ngami phi ami ng'yak law ung yeikyai u ne ngui ami pet vaiah ng'thu khän ci gui. Ani naw phi a ng'hloi nak ah khin ung Bawipa a ap hlawit vaiah ninglam shui ci. ¹² K'cou kä shum ah m'htut pawi ah akhtükbäih hnüp ah kyak ciah Paskha pawi ah phäh ah htomehta douthak ah hnüp ung angdüihpüi gui naw, "Paskha mü ei cu a hawi ah na na ng'khänghlem sak gui hlü naw?" ciah Bawipa ng'shik ci gui. ¹³ Bawipa naw phi, angdüipüi hnih awn, "Mango kyong ah hteit niä. Cunung tui k'am tüng ciah chang tumat nani hmuk khai. Ani ah hnu ah läk ni ne, ¹⁴ Ani ah ava lut nak ah im-mah awn, 'Saya naw ka ng'düihpüi gui awn atäng ah Paskha mu ei kami ei nak vaiah a khan cu a hawi nei ciah ning ng'shik ci' ciah pyein niä. ¹⁵ Cunung, ani naw apäng a ng'küm ah a kya-ge ah a m'khämhlen pyi ah akhan ah ka a khan a ng'shawngnu cu ning m'hmuh gui khai. Acun ung mikmi ah phäh ah ng'khänghlem vä" ciah pyein ci. ¹⁶ Angdüihpüi goi cun phi hteit ni ne, mango kyong ah ani va lut ung Bawipa naw a pyein nak goi ah mäih ah hmu ni ne, Paskha pawi bi vaiah ng'khänghlem ci goi. ¹⁷ Kho mü-hün law sei, Bawipa cu angdüihpüi ghaleigoi awn atäng ah gawk law ci. ¹⁸ Ngami cu atäng ah vunvai ne ami ei yah ung Bawipa Jesuh naw, "Akcang ka pyein cu, tukbäih atäng ah vun ne mi ei ciah nangmi ungka chang tumat naw, kei cu ga ah kut ung na ap khai" ciah pyein na gui ci. ¹⁹ Angdüihpüi gui cu ami m'lung thüisei u khätah, "Kei ma?" ciah tumat kawnah tumat naw Bawipa ng'shik ci gui. ²⁰ Bawipa naw phi, "Cunah chang cu ka ng'düihpüi ghaleigoi ungka tumat ah kya ne kei awn atäng ah eikbei a tumat ung a kut pauk tuk ciah kyak ci. ²¹ Chang ah Htapa cu ani ah mawng a ng'guk ah mäih ah a hteh vai k'kung ah kyak ci. Cunte, Chang ah Htapa ap cicu phyunnak om ci. Ani cu kä a ng'tüi law tu hnga ung amät ah phäh ah nik khai sü" ciah pyein ci. ²² Cunung ami ei sang ung Jesuh naw m'htut cu la ne, a bäkhäknak a m'hlümtai kawnah, m'htut cu k'bou neta, "Shinah m'htut cu ka pum ah kyak ci. La ne ei vä" ciah pyein ne angdüihpüi gui awn phi pe gui ci. ²³ Khap phi la ne, abäkhäknak a m'hlümtai kawnah ngami gui awn phi pe gui sei ami van naw cunah khap cu awk ci gui. ²⁴ Bawipa naw phi, "Shin cu chang akda ah phäh ah ka huk ah ka shii ng'thu-khän thai ah kyak ci. ²⁵ Akcang kaning pyein nak gui cu Khanpughi ah uknakkho ung akthai ah awk ba vaiah cunah kho hnüp khüt khai ah sapyit tui ungka kya lawk ciah a tui cu kä ka aw ba khai" ciah pyein ci. ²⁶ Cunkawnah ngami cu m'hlümtai nak ng'äi ami m'cu kawnah olive khomhtung täng ah hteit ci gui. ²⁷ Cunung Jesuh naw, "'Kei naw htoshäm cu tu ne ka ngon ah kyasei, hto gui cu ng'phyüngpai khai gui' ciah Cacim ung ng'guk ciah kyasei, nangmi naw nami na nawng lawk khai. ²⁸ Cunte, ka thawh law ung Kalile kho ah nangmi ah ng'dawit tuba ne ka na hteit khai" ciah pyein ci. ²⁹ Cunung Peter naw,, "Avan naw ami ning nawng ung phi kei naw kä kaning nawng khai" ciah pyein ci. ³⁰ Jesuh naw phi, "Akcang kaning pyein nak cu, tuh-mü ge ung ai ng'hnih vei kä a khon pha ung, nang naw kei cu thum vei leng leng na na maa nak khai" ciah pyein ci. ³¹ Cunte, Peter naw, "Kei läi nang Bawipa ah phäh ah ka shih vai ung hngaw api ah phi kä kaning nawng khai" ciah akkhänghtek ah pyein ci. Angdüihpüi van naw phi acun ah pyein ci gui. ³² Cunkawnah, ngami cu Gethsemane ah ng'ming nak ciah hmun ah gawk ci gui. Bawipa naw, "Ka k'taigü sang ung a shin ung ana ngo vä" ciah angdüihpüi gui awn pyein na gui päng ne, ³³ Peter, James la Johan ni cu, amät awn atäng ah ng'khah püi gui ci. Cunung Bawipa cu thüiseinak la m'lung bongbainak om sei, ³⁴ "Ka m'lung cu ka shih awng ah aknui ah thüisei ci. Shinah hmun ung om u ne m'htei u neta na ngäng vä" ciah pyein na gui ci. ³⁵ Cunkawnah ama ah api va hteit ne m'dek ung ng'bolawk neta, a ng'gah vai hlü ung shinah ng'hngi khin naw ani cu a hteh-tak vaiah taigü ne, ³⁶ "O Kapa Khanpughi, nang ah phäh ah apängvan cu kya hning ci. Shinah khap cu kei ungka naw na k'pheng pe ä. Cunte, kei ah ng'yak hlü ah kä kya ne, nang Bawipa ah ng'yak hlü ah kya sä" ciah taigü ci. ³⁷ Cunkawnah, law ba ne ami ipdä cu a hmuh law ung Peter awn, "Simon, nang cu na ipdä ne ma? Ng'hngi khin tumat hta hngaw m'htei ne kä na ging hlawit ne ma? ³⁸ Tüitok däphlo nak ung kä nami ng'kyungtäng vaiah m'htei ne ging u neta taigü vä. Nami m'lung la ng'ngaih cu a khüighat tu pang ung phi nami pumsa cu aktha ken ci" ciah pyein ci. ³⁹ Cunkawnah mä, va hteit ba ne akma ah aktaigü ah mäih ah taigü päng ne, ⁴⁰ Law ba ne angdüihpüi gui cu ami mik ku sei ami ipdä cu hmuh gui ci. Ngami naw phi Bawipa awn a i ami pyein vai kä hmat ci gui. ⁴¹ Cunkawnah Bawipa cu akthum vei nak law ba ne, "Tukbäi khüt seih, ipdä u ne nami ng'yän ci ma? Bä lawk khai nei. A khin gawk law pyi ci. Teng vä. Chang ah Htapa cu hmakak chang guiah kut ah apnak gah lawk khai. ⁴² Tho vä. Mi hteit kaw. Kei na ap khai gawk law pyi ci" ciah pyein ci. ⁴³ Cunah Bawipa naw a pyein sang ung angdüihpüi ghaleigoi ungka tumat ah kyak ciah Judah cu gawk lawk ci. Taigü ng'vai gui, Cacim saya gui la a ghi ng'vai gui naw ami tüih law ah chang k'hli naw phi shing ton gui la khim gui kawit lawk ci gui. ⁴⁴ Bawipa ap ci naw, "Kei naw ka ng'uihnam cu Jesuh ah kyak ci. Ani cu pha u ne k'cungvong u neta ng'khah püi vä" nütbäinak pe gui ci. ⁴⁵ Cunkyasei, ani naw a gawk law ung Bawipa cu a ng'ghit ah va k'et ne, "Rabbi" ciah khü ne ng'uihnam ci. ⁴⁶ Cun vai awn, chang gui naw Bawipa cu pha u ne k'pang ci gui. ⁴⁷ Cun sang ung, ami pei ah ng'düi ci gui ungka tumat naw khim phawng ne taigütung ah akchangshäm cu tu sei ani ah ng'hngakoi pit ci. ⁴⁸ Jesuh naw ngami gui awn, "Nangmi naw m'guk-ei chang-kyoi pha ah mäih ah shington la khim gui kawit u ne nami na phak khai ah nami lawk ci ma? ⁴⁹ Kei cu akhnüp tä ah nangmi awn atäng ah Taigüim ung ka m'theimthang te ci, kä nami na phak ci. Cunte, shinah a kyak law cu Cacim a kümpäng vaiah hmawk ah kyak ci" ciah pyein ci. ⁵⁰ Cun vai awn, angdüihpüi avan naw Bawipa cu nawng shüt u ne dawng ci gui. ⁵¹ Akhmaw chang tumat naw yih ng'vai ne Bawipa ah hnu ah läk tu sei, chang gui naw ani phi phak ci gui. ⁵² Cunte, ani naw a yih phi hluit shüt ne i phi kä sui ah dawng ci. ⁵³ Cunkawnah, ngami naw Bawipa cu taigütung ah ng'khah püi u se, taigü ng'vai gui, a ghi ng'vai gui la Cacim saya gui ami van cu ng'bum lawk ci gui. ⁵⁴ Peter naw phi taigütung ah ng'vong kyong khüt ah Bawipa ah hnu ah ani ng'lak kä thuuk aih khai ah läk ne m'kawit ngäng gakap gui awn atäng ah mei-awm tuk ci. ⁵⁵ Taigü ng'vai gui la taga hloitaw ng'vai ami van naw Bawipa cu ngon hlawit to vaiah Bawipa ng'hnungtuk püi u ne, a hle cu a hmukshing ah pyein khai ah ami shui tu pang ah phi kä hmuk ci gui. ⁵⁶ Ikyaseiciung, chang akda naw Bawipa awn ng'hnungtuk khai ah kä mi hmukshing cu ami hmukshing vai süah ami pyein tu pang ah phi ami pyein gui cu kä ng'guigong ci. ⁵⁷ Cunung chang amshah naw ng'düi law u ne Bawipa ng'hnungtuk püi u ne, ⁵⁸ "Shinah chang naw, 'Kei naw chang ah kut awn cawh ah shinah taigüim cu phye ne chang ah kut awn kä cawh ah taigüim a hei cu hnüp thum awn ka cawh ba khai' ciah a pyein kami ng'yak ci" ciah pyein ci. ⁵⁹ Cunte, ngami ah hmukshing ng'thu cun phi akma ungka guiah mäih ah kä ng'guigong ci. ⁶⁰ Cunung, Taigütung naw ami ma ah ng'düi law ne, "Ng'thu m'kha ät phi kä pyein ah na om ne ma? Shin gui naw ning ng'hnungtuk püi u ne, ami hmukshing ami pyein cu ihawkcha ah ma?" ciah Jesuh ng'shik ci. ⁶¹ Cunte, Bawipa naw m'kha ät phi kä m'shang ba ah, düm ah om ci. Cunkawnah mä, taigütung naw, "Nang cu a phun shen ciah Bawi ah a Htapa ah kyak ciah Bawi Khrit ma?" ciah ng'shik ci. ⁶² Jesuh naw phi, "Acun ah ka kyak ci. Chang ah Htapa cu Huham ah akpat täng ah ngo ne khankho ng'mei gui awn a kyum law cu nami hmu lawk khai" ciah pyein ci. ⁶³ Cunkawnah, taigütung naw a suinu cu phutek ne, "A i hmukshing hlü ba ne ma? ⁶⁴ Khanpughi a pyeimshet ah ng'thu nami ng'ya pyi ci. Nangmi naw ihawkcha ah nami ng'ngai tu naw?" ciah pyein sei, ami van naw Bawipa cu ngon vaiah khinkha ci ciah ng'thu m'chak ci gui. ⁶⁵ Cunkawnah, amshah naw Bawipa cu ami m'shitui awn m'thui u ne a hmai phi khum cang u neta Bawipa cu thäk u ne, "Häi! Teng ä" ciah pyein nak ci gui. M'kawit ngäng gakap gui naw phi Bawipa cu ng'khah püi u ne, tuthat ci gui. ⁶⁶ Peter cu ng'vong ah a hai täng ah a om sang ung taigütung ah akchangshäm hnumi naw law ne, ⁶⁷ Mei-awm tuk ciah Peter cu a hmuh law ung kä m'ghüp ne teng cang neta, "Nang cun phi Nazareth chang Jesuh awn atäng ah na om tu man ci" ciah pyein ci. ⁶⁸ Cunte, Peter naw, "Na pyein ah mawng cu kä ka k'shing, kä ka hmat ci" ciah dam ne ng'vong m'kawit täng ah va hteit sei ai khong lawk ci. ⁶⁹ Cunkawnah, cunah changshäm hnumi naw Peter cu thap ne a hmuh law ba ung a pei ah om ci gui awn, "Shinah chang cu ngami gui ungka tumat ah kyak ci" ciah pyein ci. ⁷⁰ Cunte, Peter naw thap ne dam ba ci. Cunkawnah, a shäng ng'lak na sei, a pei ah ng'düi ci gui naw, "Nang cu ngami gui ungka tumat akcang ah na kyak ci. Ikyaseiciung, nang cu kalilee kho chang ah na kyak ci" ciah thap ne Peter cu pyein nak ci gui. ⁷¹ Peter naw phi, "Nami pyein ah chang ah mawng cu kä ka hmat ci" ciah ng'phyungtam ci. ⁷² Acun vai awn, akhnih vei nak ai khong ci. Cun ung Peter naw, "Ng'hnih vei ah ai kä a khon pha ung nang naw thum vei na na maa nak khai" ciah Jesuh naw a pyein ah ng'thu cu shüm ba ne, äng äng ah vu ng'pyang ci.