1 Kho-ngoi hta ung taigü ng'vai gui naw a ghi ng'vai gui, Cacim saya gui ung tüin ne taga hloitaw chang gui van awn atäng ah a ng'ghit ah ami ngingoi kawnah Jesuh cu khit u ne ng'khah püi u neta, Pilat ghangpughang ah ap ci gui. 2 Cunung Pilat ghangpughang naw, "Nang cu Judah chang guiah ami ning ghangpughang ma?" ciah ng'shik ci. Bawipa naw phi, "Na pyein ah mäih ah kyak ci" ciah pyein ci. 3 Taigü ng'vai gui naw Bawipa cu ami hlü hlü ah a ghong k'bün ci gui. 4 Cunkawnah mä, Pilat ghangpughang naw Bawipa awn, "M'kha ät phi kä na m'shang ba gui khai ma? Ihlawk ah ami ning m'shupchak cu teng gui ä" ciah pyein ci. 5 Cunte, Jesuh naw thap ne i phi kä m'shang ba gui ne om sei Pilat ghangpughang cu cäicam ci. 6 Pilat ghangpughang naw Pawi hnüp a gawk tä ah chang gui naw ami ng'yoih ah thawngkyum tumat cu m'hlawit pe gui thei ci. 7 Acun yah ung ami thüngkyawng sang ung chang ngon sei thüngkyawng ci gui awn atäng ah thawng kyum ciah Barabbas ah ng'ming nak ci tumat om ci. 8 Chang k'hli gui gawk law u ne abi man ah mäih ah ngami ah phäh ah abi pe gui vaiah thäh lawk ci gui. 9 Pilat ghangpughang naw phi, "Nangmi ah phäh ah Judah pakhui guiah ghangpughang nami na m'hlawit sak hlü ne ma?" ciah ngami awn ng'shi ba gui ci. 10 Cunah a ng'shi guiah mawng cu taigü ng'vai gui naw m'thümkhang na u ne Jesuh ami ap ah mawng a hmat ah hmawk ah kyak ci. 11 Cunte, täigü ng'vai gui naw Barabbas bäng a m'hlawit pe gui vaiah ami k'thäh vaiah chang k'hli cu pyein nak ci gui. 12 Cunung Pilat ghangpughang naw, "Cunah a kyak ung Judah pakhui guiah ghangpughang ciah nami khü cu ihawkcha ka ci vai aw?" ciah ng'shi ba gui sei, 13 Ngami naw, "Ani cu kutlamtung khan ah tai ä" ciah vuvik ci gui. 14 Pilat ghangpughang naw phi, "Ikyasei ma? Ani naw a i katnak bi sei ma?" ciah ng'shi ba gui sei phi, ngami naw, "Ani cu kutlamtung ung tai ä" ciah ng'hawh law pi täi ci gui. 15 Pilat ghangpughang naw chang k'hli cu a yeikyai sak gui hlü ah hmawk ah ngami ah phäh ah Barabbas cu m'hlawit pe gui ci. Jesuh läi cu kya-poit guui awn püp sak gui ne kutlamtung ung ami taih vaiah ap gui ci. 16 Cunung gakap gui naw yung-imnu ciah ami khü ah ghangpughanghta ah a im ng'vong kyong ah Bawipa cu ng'khah püi u ne gakap ng'bum ät lüng cu ng'bum sak gui ci. 17 Cunkawnah, Bawipa awn k'phyüm-le suinui m'hlui u ne ng'hling phi lukhu ah tak u neta ami k'bün kawn ah, 18 "Judah pakhui guiah ghangpughang, a phun shen sä" ciah Bawipa cu pyein nak ci gui. 19 Cunkawnah mä, Bawipa ah lupum cu vaipum awn that u ne, Bawipa ah a hmai cu ami m'shitui awn m'thui päng u neta, m'khukhudong u ne ama ah ng'bolawk ci gui. 20 Acukcha ah Bawipa ami cawhpeh nak kawnah phyümle suinu hluit pe u ne, Bawipa ah a sui ami m'sui ba kawnah kutlamtung khan ah taih vaiah hteh püi ci gui. 21 Acun sang ung, Alexander la Rufus ah ani pa ah kyak ciah Kureinei mango chang Simon cu pigo ungka law ne ami hteh nak ah lam a hlun law ami hmuh law ung Bawipa ah kutlamtung cu ani awn k'shekha na u ne kawit sak ci gui. 22 Ashikcha ah ngami naw Bawipa cu lukoi ciah ng'ming nak ciah Kolkotha kho ah ng'khah püi u ne, 23 Bawipa cu Muran ami ghä ah sapyit tui tu ci gui. Cunte, Bawipa naw kä awk ci. 24 Cunkawnah, ngami naw Bawipa cu kutlamtung khan ah tai u ne, Bawipa ah a sui gui cu a u naw i a gah vai cu ami m'shi m'thawk u ne ng'pai ci gui. 25 Kutlamtung khan ah Bawipa a mi taih ah khin cu kho ngoi täng ng'hngi khin akko nak ah kyak ci. 26 Bawipa ami m'katnak ami guk ah ca cu, "Judah pakhui guiah ghangpughang" ciah kyak ci. 27 M'guk ei changkyoi goi hnih phi Bawipa awn atäng ah akpat täng ah tumat, ak-eng täng ah tumat ci-ah kutlamtung khan ah tai ci gui. 28 Ashikcha ah, "Ani cu kä ng'düng ci guiah ng'ming guknak ung ng'dawn tuk ci" ciah Cacim cu kümpäng lawk ci. 29 Lam ung hteit gui naw phi, ng'cing u ne, "Häi, Taigüim phye ne kho hnüp thum awn cawh ba khai ah chang aw, 30 Kutlamtung ungka kyum law ne na mät naw na mät hun ä" ciah Bawipa cu cawhpeh nak ci gui. 31 Cunah mäih ah, taigü ng'vai gui naw phi, Cacim saya gui awn atäng ah Bawipa cu cawhpeh na u ne, "Ani naw chang hei gui a hun tu hning pang ah phi, amät naw mät kä hun hlawit ci phäih nei. 32 Keimi naw hmu u ne, kami yum hlawit vaiah Israel ghangpughang ah kyak ciah Bawi Khrit cu a tukbäih ge kutlamtung ungka kyum law sä" ciah mat la mat pyein ci gui. Bawipa awn atäng ah kutlamtung khan ah ami taih naw phi Bawipa cu pyeimshek ci. 33 Kho hnüp ng'lung a gawk law ung, khomdek khan avan ung akhmüp gawk law ne khok-awi ng'hngi khin akthumnak khüt khai ah acunah kyak ci. 34 Khok-awi ng'hngi khin akthumnak ung Jesuh naw ak-aw ng'shawng awn, "Eli, Eli, lema sabachthani" ciah vu ng'pyang ci. Cunah a suilam cu, "Ka Khanpughi, ka Khanpughi, ikyasei na na nawng ang?" ciah kyak ci. 35 A pei ah ng'düi ciah amshah naw ami ng'yak ung, "Teng vä. Elijah khü ci nei" ciah pyein ci gui. 36 Acun yah ung chang tumat naw dawng ne tui cum ne k'phumnak ah m'yak cu sapyit tui akthui ung avan m'dit khai phum päng neta, vaipum htung ung khawp ne Bawipa awn tu päng neta, "Om sä. Elijah naw ani cu k'kaa ah akchak law vaiah a law la, kä a law cu mi teng kaw" ciah pyein ci. 37 Cunkawnah, Jesuh cu a ng'khai ah m'aw päng ne a ng'ghi hnun pit ci. 38 Acun sang ung, Taigüim kyong ungka khamnak yih cu akkhan m'dawng ungka naw akka m'dawng khüt khai ah teek ne ng'taai ci. 39 Bawipa täng ah mang ne ng'düi ciah tathmuu naw Bawipa a ng'ghi hnun a pit law a hmuh law ung, "Shinah chang cu akcang ah Khanpughi ah Htapa ah kyak ci" ciah pyein ci. 40 Acunah kho ah akthuuk ungka naw teng ciah hnumi gui phi om ci gui. Ngami gui ung Magdalene mango chang Mary, akhmaw tuba James la Joseph ni ah ami nu Mary la Salomi ni mah mah ah kyak ci. 41 Ngami cu Kalilee kho ah Bawipa a om sang ung a hnu ah läk u ne Bawipa m'htei ci guiah kyak ci. Ngami kawnah Bawipa awn atäng ah Jerusalem mango ah ng'läk lawk ciah a hei hnumi gui akda phi om ci gui. 42 Cunah hnüp cu ng'khäpnak ah hnüp, kyin hnüp kä gawk law pha mü-hün täng ah kyasei, 43 Chang gui naw ami kyih-a ah kya ne, hloitaw ng'bum ungphi tumat ah kya neta, Khanpughi ah uknak kho gingkyo ciah Arimathea mango chang Joseph naw gawk law ne Pilat ghangpughang ah limgäi ne hteit ne, Jesuh ah gook cu shang ci. 44 Pilat ghangpughang naw Jesuh shi pyi ne ma ciah cäicam ne tathmuu cu khü neta, Jesuh cu akcang ah a shi la kä shih cu ng'shik ci. 45 Tathmuu naw akcang ah kyak ciah mawng a hmat kawnah a gook cu Joseph awn pek ci. 46 Cunung Joseph naw yih cu k'hleih ne a gook cu kutlamtung khan ungka yukcha law neta, yih awn hlop ne lung k'sheng ung a cawh ah ng'phuh hmun ah thun ci. Cunkawnah, lung cu pääk ne ng'phuh hmun lung khui cu khai ci. 47 Magdalene mango chang Mary la Joseph a nu ah kyak ciah Mary ni naw phi a gook cu a hawi ah ami tha cu teng ci gui.