¹ Kyin hnüp a ng'pyi kawnah, Magdalene mango chang Mary, James ah anu Mary la Salomi ni cu a gook ah va hteit u ne hlup vaiah a ng'ui gui k'hleih ci gui. ² Cunkawnah, hnüp chih ah akhtükbäih hnüp, kho-ngoi hta khok-hni a lut law khin ung ngami cu ng'phuh hmun ah hteit ci gui. ³ Ngami naw, "Mikmi ah phäh ah ng'phuh hmun lung khui m'kawit ungka lung-nu cu a u naw na k'hmawn pe gui khai ma?" ciah mat naw mat pyein ci gui. ⁴ Cunte, ami teng law ung lung-nu cu m'hnawn pyi ah a kyak ah mawng hmuk ci gui. Cunah lung-nu cu aknui ah däm ci. ⁵ Cunkawnah ngami cu ng'phuh hmun lung khui ah ami va luh ung suibawk sui ciah hmochang tumat cu pat-täng ah a ngawh hmu u ne, cäicat ci gui. ⁶ Cunte, ani naw, "Kä cäicat vä. Kutlamtung khan ah ami taih ah Nazareth mango chang Jesuh nami shui ci. Bawipa cu thawh ba pyi ci. Shinah hmun ung kä om ci. A gook tha nak ah hmun cu ten vä. ⁷ Hteit u ne angdüihpüi gui la Peter awn, 'Bawipa cu aning m'cäi guiah mäih ah Kalilee kho ah nami ma ah ana hteit pyi ci. Nangmi naw aca ah Bawipa nami hmuk khai' cine pyein vä" ciah pyein ci. ⁸ Cunung ngami cu cat u ne aknui ah cäi leng leng u neta, ng'phuh hmun lung khui ungka lut law u ne dawng ci gui. Ami kyih ah hmawk ah a u awn phi a i phi kä pyein nak ci gui. ⁹ Jesuh naw hnüp chih ah akhtükbäih hnüp ung a thawh ba kawnah Magdalene mango chang Mary ah akhtükbäih ah a pum awn ng'dang lawk ci. Cunah Mary cu Bawipa naw khokshe chih aktäm pe ah chang ah kyak ci. ¹⁰ Mary naw phi thüikyap ne Bawipa awn atäng ah om man ne thüikyap ci guiah hteit ne cunah mawng cu m'thein gui ci. ¹¹ Cunte, Bawipa a ghin ah mawng la Bawipa cu Mary naw a hmuh shüt ah mawng ngami naw ami ng'yak law ung kä yum hlawit ci gui. ¹² Cunkawnah ngami gui ungka hnih cu pigo pyalam ah ani hteh sang ung Bawipa cu a hei vai süah ng'dang lawk ci. ¹³ Ngani naw pawih ba ciah angdüihpüi gui awn hteit ni ne m'thein ci goi. Cunte, cunah ng'thu cu ngami naw kä k'cang nak ci gui. ¹⁴ Cunkawnah Bawipa naw eikbei ung ngok ciah angdüihpüi ghaleiät ah a pum awn ng'dang law ne ghing thawh ciah Bawipa hmuk ci gui naw ami pyein ah ng'thu kä mi k'cang nak ah hmawk ah kä mi yum hlawitnak ah m'lung la ami m'lung a m'li ah phäh ah m'cumcäi gui ci. ¹⁵ Cunkawnah Bawipa naw, "Khomdek khan avan cu hteit u ne akghinghlei avan awn ng'thu k'ni ng'shä vä. ¹⁶ Yum ne tui ng'hnim ci naw hunnak gah khai. Kä yum ci naw ng'thumchanak gah khai. ¹⁷ Yum ci gui awn ng'toi ne om khai ah a ng'shing nak gui cu, ngami naw ka ng'ming awn khokshe gui gawit-täm lawk khai gui. Ng'thu-chi akthai gui pyein lawk khai gui. ¹⁸ Ami kut awn phyu gui pha u ne k'pang khai gui. Shih sak hning ciah a m'äm tumat mat ami awk ung hngaw, ngami gui cu cun gui naw a i kä haw gui hlawit khai. Gopyam ci guiah khan ah ami kut ami taih law ung ngami gui cu gai ba khai gui" ciah pyein ci. ¹⁹ Bawipa Jesuh naw ngami gui awn acunah a pyein nak gui kawnah khankho ah yäkchannak gah ne Khanpughi ah pat-täng ah ngok ci. ²⁰ Cunung angdüihpüi gui cu lut law u ne a hmun päng ah a ng'thu ng'shä ci gui. Bawipa cun phi ngami gui awn atäng ah bilawh ne cäicam vai gui awn phi ng'thu theing cu khänghtek sak ci.