¹ Abhahiri, turabhongeerya ezinguru kusabha ku Yeesu Kristo. Kyeega mwabhweni amaragirirya kureka kunetwe kukora gano ghakuzomera Eriobha, kugayo mugakore kuzinguru zyenyu zyosi. ² Kwookubha mumenyiri maragiriryokii tubhaheri kuhitira ku tatabhugya Yeesu. ³ Kwookubha bhuno nibwe obhusegi bwa Eriobha; kubhasindura kubha mutige ubhusebeti, ⁴ kubha kila umwi amenye kubhuga mugaaye kukikarirye kyoo obhweru na obhusuku. ⁵ Iiribha otaza kubha noo mughono gwa mukari (kyaabhano bhatamenyiri Eriobha). ⁶ Muutu atabhaho wuuno akwitabhuka emibhi kugya kutindira muhiri waye khuu ng'ana yiyo. Kwookubha Tatabhugya niwe akurihana ekhisiyoombha khumang'ana ghoosi gayo. Kyego twakangatiri kubharekya eno turagakheriana. ⁷ Khukhubha Tatabhugya atatubhirikiri kuubha banyakha, areenda obhweru. ⁸ Kwego wuuno akwangha rhinoo atakwanga bhatu, aranga Eriobha, wuuno arabhaha ekoro ehoreru. ⁹ Orubhara rwa obhusegi bhwa obhuhiri, kutariku kukamirwa mutu wowosi kwookubha Eribha eryene ritwegire okusegana abhene ku bhene. ¹⁰ Obhuhene, ghoosi gayomwagakoriri iguru wa abhahiri bhano bhari Makedonia yoosi, nawe turabhasabha bhahiri mung'ehee kukora bhukong'u. ¹¹ Turabherekya, mwisubhirye ekikarire kyo omurembe kukangatya amahokya geenyu, kukora emirimo kuhitira amabhoko geenyu kyego mwaragiriribhwe. ¹² Kora gano kisi kororokya gakuhikye kubhusuki bhwa gano bharigutu wa obhuhene, kwororokya mtasuhirwa na bhinokwenderwa. ¹³ Emwe abhahiri, tutakwenda mumenye iguru wa bhayo bhahindiri, mutaza kurugura kyabhandi bhano bhatamenyiri iguru we eribhaga rino rikuuza. ¹⁴ Aribha turikirirya kubha Yeesu yakuri akamara akasisimuka kweki, nigo ego Eriobha rirabharete hamwe bhano bhinduri nyari na Yeesu kuhitira Eriobha. ¹⁵ Iguru wa gayo turabhabhurira emwe kuhitira eng'ana ya Tata bhugya, kubha bhano tukyari kukwa, turibhano runo Tatabhugya ariza, ni heene tutakukangatira bhano bhahindiri nyari. ¹⁶ Kwookubha Tatabhugya araza kwituma omwenee kureka mumasaro. Arabha ne eriraka ikuru riraka erindi rya malaika omukuru, ne zindiryati zya Eriobha, bhano bhakuri kuhitira Kristo bharasisimurwa hinga. ¹⁷ Bhano tusagiri tutakuuri turagya kusikana nabho mumasaaro. Okumuturung'ana iguru wiiyo. ¹⁸ Kwego, turabha hamwe ibhaga ryoosi Tatabhugya netwe twikumiriryane abhe na abhene.