¹ Iguru wa amang'ana gano mukanikamiira: Rireho eribhagha erindi rino rikwenderwa omusubhe atige kuhindira na omukari waye. ² Nawe kwookubha yo amasakyo maaru ga obhusebheti erenderwa omusubhe abhe no omukari waaye, no omukari abhe no omusubhe waaye. ³ Omusubhe arenderwa amuhe omukari waye eheene yaye yoobhutetwa, egoego noomukari woosi kumusubhe waaye. ⁴ Mukari atana bhunagya iguru woomubhiri gwaye, ni omusubhe. Egoego, omusubhe woosi atana bhunagya iguru woomubhiri gwaye, ni omukari niwe anaobhunagya. ⁵ Mtige kwinyimana hano mukuhindira hamwe, nawe mubhe mwikirirenia kwiibhaga izomu. Mukoreego kwookubha yookubhona eribhaga ryokusabha. Muratura kukyora kubha hamwe kweki, ekihwi ataaza kubhasakya kwookutama okwiswa. ⁶ Nawe ndahaya amang'ana gano kwa okwenda etari kwiihatike. ⁷ Ndagongerya kyoomwe yangabheeri kyego yinye niri. Nawe kira oumwe ana obhunagya bhwaye kureka ku Eriobha. Wuuno anabhunagya bhuno, na wurua anabhunagya bhurya. ⁸ Kuubhano bhatakwerirwe na bhano bhakwerirwe abhasubhe bhabhu ndabhugeego, nibhuzomu kwebho aribha bharasage bhatakwarwa, kyego enye niri. ⁹ Nawe aribha bhatakunagya okwiribhira, bharenderwa bhakwerwe. Kwookubha neehakiriku nawe bhatabha noobhugongerya. ¹⁰ Bhoono kubharya bhakwerirwe ndabhahana omugiro, ntari enye ni Taatabhugya. "Omukari ataza kutigana na omusubhe waye." ¹¹ Nawe aribha aratigane no omusubhe waye, asage egoego ataza kukwerwa hamwe niigo akyoore yigwane na musubhe waye. Na " Omusubhe atamhana taraka mkari waaye." ¹² Kuubhano bhasagiri, ndahaya- enye, etari Taatabhugya kubha aribha omuhiri wowosi anaomukari wuno atenda yikirirya nawe ewe yikirirye okubha nawe, atakwenderwa kumtiga. ¹³ Aribha omukari ana omusubhe wuno akyari kwikirirya, nawe ewe yikirirye okubha nawe, atamtiga. ¹⁴ Kwoomusubhe wuuno akyari kwikirirya arasindurwa kwokubha ya obhwikirirya bhwa mukaaye. Na omukari wuno akyari kwikirirya arasindurwa kwookubha ya omusubhe wuno ewe yikirirye. Aribha tiigo abhana bhenyu bhatari kubha bheeru, nawe bhono bhasindurirwe. ¹⁵ Nawe omuseegi wuno akyaari kwikirirya arirekaho agye. Kweetubho yiyo, omumura hamwe omukya atakubhohwa na amihiime gabhu. Eriobha atubhirikiri tubheho kwa obhwikirirya. ¹⁶ Omenyiribhwi aribha mkari, hamwe aramutuurya omusubhe waye? Awe omenyiribhwi aribha omusubhe, hamwe aramutuurya omukari waye? ¹⁷ Kweego mutu wumwe abheho kyeego Taatabhugya abhagabhiri, kwoowumwe waho kyabhurya Eriobha ribhabhirikiri. Bhuno ni obhwerekererya bhwane amasengero goosi. ¹⁸ Areho wuno yeri asarirwe hano yabhirikirwe okwikirirya? Atasakya kurusysho ekoro yo obhusaarwa bhwaye. Areho wowosi wuno abhirikirwe kuubhukwirirya akyari kusarwa? Atakutumibhwa kusarwa. ¹⁹ Kuurino hamwe asaarirwe na wuno abhe atasaarirwe etareho nyaako. Kyeenyako ni okusuka na okwobhoha emigiro gye Eriobha. ²⁰ Kira owumwe asaage kyeego yaari kwemera yabhirikirwe na Eriobha okwikirirya. ²¹ Waari mukibohe eribhaga rino okabhirikirwa ne Eriobha? Tiga twiseega iguru wa gayo. Nawe aribha aranagya kurwa mukibhohe, okereego. ²² Ku oumwe wuno abhirikirwe na Taatabhugya kyoomubhagati nio muutu wuno arusibhwe mukibhohe ku Taatabhugya. Kyeego, owumwe wunoaruri mukibhohe hano akabhirikirwa okwikirirya wuyo niomuutu wa Krisrto. ²³ Mumari kugurwa kwa amariho, kweego mtaaza kubha bhabhagati bha abhatu. ²⁴ Bhawamwetu bhekisubhe na bheekikari, kukwikara kwokwosi kira oumwe wetu hano twabhirikirwe okwikirirya, tusaage kyeego twaari. ²⁵ Bhoono, kubharya bhoosi bhano bhakyari kukwera, ntana migiro kureka ku Taatabhugya. Nawe ndabhaha amiseego gane kyeego niri. Kweebhigongi bhya Taatabhugya, bhino bhikwiriribhwa. ²⁶ Kweego, ndiseega ego kwookubha ya okunyakibhwa nyakibhwa, ni kisi omusubhe asaage kyego ari. ²⁷ Obhohiryo kumukari na emuma yo obhuteti? Tiga kwenda kuhatirwa kuyiyo. Ohatirwe kureka kumukari awe okyari kukwerwa? Tiga kumohya mkari. ²⁸ Nawe aribha orikwera, okyari kukora ebhibhi. Na aribhe omukari akyaari kukwerwa arikweerwa, akyari kukora ebhibhi. Kwekiigo bharya bhakutetana bharabhona enyako nzaru. Na nenye ndenda nibhatuuranie gayo. ²⁹ Nawe ndabhugeego, abhana bheetu bheekisubhe na bheekikari, eriibhaga niiguhi. Kweeme bhoono nookugya embere, bhanaabhakari bhikare kyabhano bhatana bhakari. ³⁰ Bhano bhoosi bharumikiri bhikore kya bhano bhatari bharumikiri na bhoosi bhano bhakuzomererwa, kya bhano bhatakuzomererwa, na bhoosi bhakugura kigiro kyoyosi hano bhataari na kyokyosi. ³¹ Na bhoosi bhakuhokya geekyaro, bhabhe kya hano bhatahokirye nabho. Kwookubha eziteemwa zya ekyaro zirahika kubhuteero bhwaye. ³² Ndenda muhatirwe kuziinyako zyoosi. Omusubhe wuno atakweriri arisikirirya mubhigiro bhino bhikumutunia Taatabhugya, kuuteemwa yookumuzomera ewe. ³³ Nawe omusubhe wuno akweririarisikirya mumang'ana ga mukyaaro, kweeteemwa ya okumuzomerya mkyaro, ³⁴ atwanikenimu. Omukari wuno atakukweerwa hamwe wuno akyari kuturwa enzira arisikirya muubhigiro bhino bhikutunia Taatabhugya, etuubho ya okwahuka kwoomubhiri na kweekoro. Nawe omukari wuno akwerirwea arisikirya iguru wa ebhigiro bhya mukyaaro, kutuubho ya okumuzomerya musubhe waye. ³⁵ Ndahaya ego kwoobhwera bhwenyu abhene, na ntakuteeho mheto kwemwe. Ndabhuugeego kwookubha ni heene, kubha mratura kwibhindika ku Taatabhugya bira kitegitegi kyokyosi. ³⁶ Nawe aribha omutu ariseega atakunagya kumukorera kwoobhusuku omwenga waye, kwookubha ebhiziiga bhyaye bhino ezinguru bhukong'u, tiga atetene nawe kyego asegiri. Etari bhubhi. ³⁷ Nawe aribha aruzi atakunagya okukwera, ritariho ihatike, aribha aranagya okuribhira obhugongerya bhwaye, arakora bhuzomu aribha atakumukwera. ³⁸ Kweego, wuno akumukweera omwenga waye arakora kisi, na wowosi wuno akusora ekutiga okukweera arakora kisi bhukong'u. ³⁹ Omukari abhohirwe no omusubhe kwiibhaga rino bhakyari kukwa. Nawe aribha omusubhe waaye arakwe, aterwe mwasi okukwerwa na wowosi wuno asegiri, nawe kuhitira ku Taatabhugya. ⁴⁰ Kubhutiniro bhwane, arabha na obhuzomererwa bhwaru aribha arikare kyeego ari. Na ndiseege kubha na nosi nine Ekoro ehoreru ya Eriobha.