¹ Neenye, abhamura ne abhasubhatibhaane, nitagambiri nanemwe kya abhatu bhehinyanyangi, nawe kya bhatu bhomubhiri. Kya abhana bhaa Kristo. ² Nikabhanywesha amabheere etari enyama, kwo okubha mtahabha bwaheene okurya enyama nabhono mkyari kubha bhahene. ³ Kwookubha emwe mukyari bhomubhiri. Kwookubha omugono no obwizumo bhukyari bhurabhoneka kunemwe. Ewe, mtakwikara kuring'ana no omubhiri, no ewe, mutakugenda kya abhatu? ⁴ Kwookubha owumwe arabhuga, "Ndaagya ku Pauro," Owundi arabhuga "Ndaagya ku Aporo," mutakwikara kya abhatu? ⁵ Aporo ni wewi? no Pauro ni wewi? Abhabhagati bha wurya musegiri, kuwurya wuno Taatabhugya yamuheri obhuhene. ⁶ Enye nikatira, Aporo akatura amanzi, nawe Eriobha rikakurya. ⁷ Kweego, atari wuno yatiriri wuno yaturiri amanzi kiyo kyosi. Nawe ne Eriobha rirabhakurya. ⁸ Bhono wuno akutiira no okutura amanzi bhosi ni sawa, no kira owumwe arabhona omushahara kyeego ahokirye emirimo gyaye. ⁹ Kwookubha etwe nibhahokya bhe emirimo bhe Eriobha emwe ni omugundu gwe Eriobha, enyumba ye Eriobha. ¹⁰ Kwookubha no orubhango rwe Eriobha ruuno niaherwe no omwomboki omukuru, niteriho omusingi, no owundi aromboka iguru waye. Nawe omutu abhe bhwahene kyeego aromboke iguru waye. ¹¹ Kwookubha ataariho owundi wuno akunagya okwomboka omusingi ogundi kukiira guuno gwombokirwe, naagwe ni Yeesu Kristo. ¹² Bhono, aribha owumwe weenyu aromboka iguru ne ezahabhu, ezihera, amagina amazomu, emiti, obhunyaki, no obhunyaki, ¹³ emirimo gyaye girigurwa, kwo obweru bhwo omwisi bhurarekehibhwa. Kwo okubha girekehibhwa no omururo. Omururo gurasakya emirimo gya bhatu bhosi kyeego bhagikoriri. ¹⁴ Kiino kyosi omutu yombokiri kirasaaga, ewe arabhoona omubhano. ¹⁵ Nawe aribha emirimo gyaye girarugura no omuriro, arabhona enyako.Nawe omwene arabha muhoru, kyeego okurwa mumururo. ¹⁶ Mutamenyiri kubha emwe mirirwaziro rye Eriobha no okubha Ekoro ye Eriobha erikara muwenyu? ¹⁷ Aribha omutu ararisarya erirwaziro rye Eriobha, Eriobha riramusarya omutuoyo. Kwo okubha erirwaziro rye Eriobha ni rieru, ego neemwe. ¹⁸ Omutu ating'enererya omwene, aribha gatigati wenyu omutu arimo wuno akubhuga anaobhung'eni bwe ekiaro kiino bhoonego, abhe kyo "omugege" niiho akubha no obhung'eeni. ¹⁹ Kwookubha obhung'eni bhwe ekyaaro kiino ni bhugege kuu Eriobha, kwookubha ekaamirwe, "Arabhagwata abhang'eni kwo obhubhihu bhwabhu" ²⁰ Kweego Eriobha rimenyiri bhaano bhanaamanhg'ana amazomu na amabhihu. ²¹ Kweego omutu ataza kwiihemera abhatu! Kwo okubha ebhigiro byoosi nieebyeenyu. ²² Abhe Pauro, abhe Aporo, abhe Kefa, kiibhe ekyaaro, gabhe amaisha, ruubhe oruku, bhibhe bhyoosi bhino bhirimu, bhibhe bhino bhiikubhaho. Bhyoosi niebhyeenyu, ²³ neemwe nibha Kristo na Kristo niwe Eriobha.