¹ Nkaighwa engamba eneeene eraabhe rekeera kuurwa ahase ahahooreeru ekaghamba ko abharaabu muhungate, "Kaayi weteere kighooro ya ikyaaro ibhituubha muhungate ibhya eenkoro iya Waryobha. ² Omoraabhu wa mbere akaya na akaeteera ikituubha kyaaye ku-kyaaro amaneeraha ghano ghakwaatya bhorobhooro ghano ghagheeye ko abhanto bhaano bhana omobhaso ghwi itienyi ko bhaara bhasengeeranga -Kukitubhaan-ya kyaaye. ³ Omorabhu wa kabheere akaeteera ikituubha kyaaye mu-inyaansha; ekabha kya amaanyinga gho omoonto ono akuure na keera keento kya munyaansha nkyaakuure. ⁴ Omorabhu wa katato akaeteera ikituubha kyaaye momeegheera na mobheseekani bhya amanshe bhekaabha amaanyinga. ⁵ Nkaighwa omoraabhu wa amaanshe araghamba, "Uwe no omoheene-omwe ono aaho na ono yaareeho, omohooreeru ko bhoora waareeta ebhebhoohe bheeno. ⁶ Ko bhoora bheeteeye amanyinga gha bhaikeerya na abharooti, bho wabhaahana bhaanywe amaanyinga nkyo keno kebhareng'aini." ⁷ Nkaighwa risengeero reraahoonshora, "Nigho! Omonene Waryobha ono obhaahire kiigho ya bhyoonswe, ekebhoohe kyaaho nkya obhohoru na obhoheene." ⁸ Omoraabhu wa kaane akaetera kuurwa mukiituubha kyaaye kiighooro yi ryoobha na rekahaanwa umweeya koroongorya abhaanto no omooro. ⁹ Bhaaroongoriibhwi na ribhereeraryo kobhohya na bhakanyenyeera ring'ana rya Waryobha ono anasinguuru ko amatemo ghoonswe. Teebhakareehire komoha obhoohooreeru. ¹⁰ Omoraabhu wa kataano akaeteera kuurwa mukituubha kyaaye ku ikituumbe kya amakoora ikya itienyi, ikisuunte kekaakuundikirya obhokaama bhwaaye bhaighuure obhororo bhokoong'u. ¹¹ Bhatookiire Waryoobha uwa kighooro ko obhooro na ukuunyahaareka kwaabho, bhakaanga kwighwa kugheendeerya kokoora keera bhasaarya ¹² Omorabhu wa kasansabha akaeteera kuurwa mukiitubha kyaaye mo omogheera, Frati, omoneene amaanshe ghaaye ghakooma ko kotoora koseemya ensheera kwo abhakma bhano bhuriisha kuurwa kukuurwa ubhuurweera ryoobha. ¹³ Nkamaaha seenoro ngoogho isaato seno syaamaaheekani kya ubhekeere bheeno bhiikuurwa mumuunywa ghwa inshoka eera, itienyi eera na omorooti oora wo obhoroongo. ¹⁴ Nse enkooro sya amasaambwa seno sekokoora ekeroghooro Bhayaanga ko abhakaama abha ekebhara kyoonse kotoora kobhakomaani-ya hamwe kuriihe urusiiko oronene urwa Waryobha, ono akobhaaha bhyoonse. ¹⁵ ("Maaha! Ndasha kyu umwibhi aahoko oora akoghomeerya ubhutiiko, ono akonagya imyenda ghyaaye atakahoroka kebhaara kengaabhi na asooke.") ¹⁶ Bhabhaareetiire hamwe ko omog'oong'o ghono ghwabherekerwaanga ku-ekeebhorania Amagedoni ¹⁷ Omoraabhu wa muhungate akaeteera kighooro kukuurwa mu ikituubha kyaaye ekamara engaamba enene ikighweebhwa kukuurwa ahahoreeru na kuukurwa ko kituumbe kya makoora, ekaghaamba, "Rehooye" ¹⁸ Ghyaareeho gheemesyo ghye enkobha, ibhiruumo na imitiingiro ghye enkobha na ikiirighiiti kyo kobhoohya, Ikirighiri ekenene keno ketaakabhhayeho mokebhaara koreenga abhaanto bhabhaaho mokebhaara. Ni ikirighiri ekenene bhokong'u. ¹⁹ Umughi omokooro ghwahokaini seng'oongo isato na imiighi ghya ibhyaaro ghekaaghwa. Kwiiki Waryobha akamuhitokya Bhaberi omonene na akaghohana umughi ghuuyo ekekoombe keno kyeshooye amarwa kukuurwa ko enkoro yaaye endooro. ²⁰ Amaghiinga ghoonswe ghakasiira na ghinguuku ghooonswe tighyaamahwa he kwiiki. ²¹ Imbura enene ya amaghena ekabha nu ubhuriito obhonene ekaitooreera abhaanto kuurwa kighooro bhakamwihima Waryobha ko amatemo ghi imbuura iya amagheena ko bhoora riteemo reera ni ghoogho ryaare bhokoong'u.