¹ Nkamahera nankamaha omona waring'ondi rimereye obhoronge ubhuwane eghoro ya inguku Sayuni. Hamwe nawe bhare 144,000 abhairina iriaye naibina iria suwabho heng'ororibwi kuubhusio ubhwabho. ² Naighure omoghambo kukurwa kwisaro ghokiighwa kia ukuruuma ukwa amanche amaru no omoghambo omonene iyaa enkobha. Omoghambo ghono nighure nkiabhora abhathemi abha ekerongwe ibhiabho. ³ Bhara bhenenera iribhina eria mbere ya ikithumbe ikia amakora na mbere iya bhene bhohoru bhanna na abhaghaka. Thahohe hata ono ana ubhera ubhukwegha irirenthio riyo no okobha nko 144,000 bhano bhathoribhwi kukurwa kukiaro. ⁴ Bhano mbara bhane ubhunyanku abhene ko bhakari, nkobhora bhaibhekire abhene komakoro agha obhoroye. Mbhara bharure nyumba omona uwa iring'ondi hohonswe hano yare kuya. Bhano hathoribhwi kukurwa ko omontho bhakabha shehaghago ishithong'ore kare Waryobha na komona waring'ondi. ⁵ Thebhoho bhorongo bhono bhwa thokire kuminywa ighiabho; the bhana irisoro. ⁶ Nkamaha omontho omorabhu oonde arabhuruka ghathe iya irisaro, ono ana ubhothomwa ubhwa kuriobha ubhwa eng'ana inshiya na ukurusia obhoghambi kobhano bhamenyire kukiaro , ekeghambo, na abhanto. ⁷ Akabhabherekera ko omoghambo omonene, "Mwobhohe Waryobha momohane obhohene. Kobhora enkagha iya ekebhohe ehang'i. Momosasame we ono ya bhombire iryobha, na ikiaroo, ne enyansha, ne ekesaka ikia amanche." ⁸ Abhantho abharabhu abhande omontho omorabhu uwakabhere -akarwa nyuma akaghamba, "Oghoye, oghoye Babeli omonene, ono yabhanywensiri ekebhara amrwa agha obhosorare, amarwa ghano gharenthire obhororo haribho." ⁹ Omonto oonde uwa kathatho akabharwa nyuma, akaghamba ko omoghambo omonene, "Onse onse igho ono ara sasama ithienyi na ebhathondo ibhiaye, na okothemwa oronamba kubhusio hathako okobhoko, ¹⁰ nawe onswe naranywe amarwa agha obhororo ubhwa Waryobha, amarwa ghano ghakorwe nuukwitherwa ghathaichoghani bhwi mokekombe ikia obhororo ubhwaye. Omontho ono aranywe na ranyankibhwa no omoro na omoro ughwa ikibhirithi mbere isia abhantho abharabhu abhaye abhahoreru na kombere iya omona uwa ereng'ondi. ¹¹ Na iryoki irya ukwinyahara ukwabho nderayi imioka na imioka nathebharebha no ukumunya omobhaso hatha ubhuthiko - bhayo bhakosasama ithienyi ne ekethondo kyako, na kera montho ono yagheghire orobhaso urwa irina iriaye. ¹² Bhono no obhobherekero ubhwa obhoghanyeri no obhogomeria kobhakumia, bhara bha kukumia imighiro ighia Waryobha no ubhukumia ko Yeesu." ¹³ Nkaighwa obhoghambi kukurwa kuryobha ekaghamba, ng'oria ghano: Hahoo bhara bhakukwa ko omonene," "Mahene," enkoro ekoghamba, "Korii bhamunye kukurwa ko ghasi iyabho, kobhora amakora aghabho ng'ara bharwe nyuma." ¹⁴ Nkamahera nkamaha irisaro irirabhu, na ono yaikaye kwisaro yare umufhubhanio ughwa omona uwa omontho. Yare ni kirighi ikya esahabu ko omothwe ghware na umusumeno omoghe kokobhoko ukwaye. ¹⁵ Omontho omorabhu oonde akasha gwiki kukurwa kurisengero no okobherekera omoghambo omonene kukuya ko ora ikayee kurisaro: Ghegha umusumeno ughwaho na owanse koghesa. Kobhora enkagha iya okoghesa ihikire, kobhora amagheso agha mukiaro ghabhaye." ¹⁶ Gwiki ora yare kwisaro akahethia umusumeno ughwaye kukiaro na ikiaro kekageswa. ¹⁷ Gwiki omontho omorabhu oonde akacha kukurwa koresengero irya kuriobha, nawe yare umusumeno omoghe. ¹⁸ Therabha he omontho omorabhu oonde aghasha kukurwa mwisengero, na omontho omorabhu ono yare na ishinguru isioomoro. Akabherekera ko omoghambo omonene ono yare na umusumeno omoghe, "Ghegha umusumeno omoghe na okomma amatho agha omosabhibu ughwa hanse, kobhora onemesabhibu bhono ghaheye." ¹⁹ Omontho omorabhu yahire omusumeno ughwaye kukiaro na akakoma omogheso ighia emesabhibhu igha kukiaro akagherekera mokeghasha ekenene ikya amarwa agha obhororo ubhwa Waryobha. ²⁰ Irishonshero irya amarwa rya ghoshirwe ghoshirwe kebhara iya umughi amanyinga ghakaitheka kukurwa kobhoreng'anu bhuyo ubhwa efarasi ko istadia 1,600.