¹ Vonenyi ku ni ifura lya mbari njiki afunikie Papa, ku fuilaghwe vana va Ruva, na kwii ni fundu fukei. Hena ikyo ithanga lifuichilyoo, ang'u nalyolyimwiichi lyoo. ² Vambwie luvaha ifwe fuvana va Ruva, kinamanyikakyo fundu fwacheva kwia. Fuichi ku Kristo akanighevoniwa, fwafanana nawe, ang'u fwamvona fundu akei. ³ Na kila umwi araghire iovoha igheri lichie lyilotiwe na kwakwe chikuelesha thafundu Yesu nawe aelie. ⁴ Mndu wowoshe akyakathana ihira thambi akyakela mma. ⁵ Mwiichi ku Yesu Kristo alevikiwe kimacha avuthe thambi thoshe. Na voshi yakwe haghire thambi ho. ⁶ Haghire wowoshe akyaishi voshi yakwe akathana ihira thambi ho. Haghire mndu wowoshe airikia ikaa na thambi kole amvonire na immanyaho ho. ⁷ Vana vambwie munairikia iililishwa ni mndu wowoshe. Mghehira kicha ni mndu mda fundu Kristo nawe ni mghehirakicha. ⁸ Mghehira thambi ni wa shetani, kwalia shetani ni mghehira thambi tangu kalao. Hena ikyo Mwana wa Ruva aendiwe kimacha akonde ndima tha shetani. ⁹ Wowoshe aghirirwe ni Ruva achihira thambi we, ang'u mbeu ya Ruva ike voshi yakwe. Akairime ikathana ihira thambi we, ang'u aghiriwe ni Ruva. ¹⁰ Henaikyo vana va Ruva na va shetani vamanyikie, wowoshe akyahira kindo kiravie thiwakuvawe, na wia arakyairima imfura wavo. ¹¹ Ilyi nilyo lamoro mule lyichue idungia kala kufufurane, ifwe kwa ifwe, ¹² nifundu Kaini alekelele mma akaamua wagha wavo. Na hauiiki alemvwaghie? Kwalia alechihira findo fivichwa, na wavo alechihira findo ficha. ¹³ Veru, munamaka kole ithanga likamudaha. ¹⁴ Fwiichi ku fwemifuma hena kifwa na fwemikia, kwaliafuvafurie veru, wowoshe araghire ifura achiishi hena kifwa. ¹⁵ Mndu wowoshe amdahie wavo ni mghevwagha. Na mwiichi kuikia lya telele lichiikaa lyo voshi ya mghevwagha. ¹⁶ Heikyoo fuichi ifura, kwalia Yesu Kristo afunyire ngoo yakwe vundu vweru. Naifwe ufwashighwa fufunyengoo yeru vundu vwa veru. ¹⁷ Kangi mndu wowoshe aghire findo na akamvona wavo aghire vwasi akaleka imghasia, ifura lya Ruva lichiikaa kwia voshi yakwe? ¹⁸ Vana vakwa vambwie funafura kwa mumudu, na firero fyawia fufurekwa mihirire na keni. ¹⁹ Hena iki fwavamanyakufuke hena keni na ngoo theru thimfurie keni. ²⁰ Kole ngoo theru uthanyanyiriwa, Ruva ni mrwe ikela ngoo theru, we aicha kila kindo. ²¹ Vambwie kole ngoo theru thira kya nyanyiriwa fughira iraovoha kwa Ruva. ²² Na kyokyoshe ufwatereva fwakirikwa ifuma kwakwe, kwalia fuchivwara maamoro ghakwe, na fuchihira findo fimnulirie mozia yakwe. ²³ Na ilyi nilyo irunge lyakwe ku fumwiirikie hena irina lya Mwana wakwe Yesu Kristo na ifwana ifwe kwa ifwe, safundu afunikie marunge ghakwe. ²⁴ Wia achiivarie marunge ghakwe achiikaa voshi yakwe, na Ruva achiikaa voshi yakwe. Heikyo kwa mburii fuichi ku achiikaa voshi yeru kwa mbeho wia afurikie.