¹ Vambwie, munande iirikia kila mbeho, mira tigherenyi mbeho to muvone kole tifumene na Ruva, ang'u vavoni vengi va mongo vandecha ithangenyi. ² Hena ili mwammanya mbeho wa Ruva. Kila mbeho yaghamba ku Yesu Kristo achie hena mwiri ni ya Ruva, ³ na kila mbeho irayamuirikia Yesu thi ya Ruva yo. Ii ni mbeho ya mghemlegha Kristo eyo mulechue ku ikyacha, na luvaha ikeng'u ithangeyi. ⁴ Imwe mu va Ruva, vana vambwie mwemi vakela kwaku ake voshi yenyu ni mrwe ikela uya ake hena ithanga. ⁵ Vo ni va ithanga, hena ikyo ekyo vakyakirera ni kya ithanga, na ithanga liavaarania. ⁶ Ifwe fu va Ruva. Ewe amuichi Ruva achifuarania. There wa Ruva airimawe ifuarania. Hena iki fuammanya mbeho wa keni na mbeho wa mongo. ⁷ Vambwie, fufuranyenyi ifwe kwa ifwe kwa lia ifura ni ya Ruva, na kila mghefura aghiriwe ni Ruva na amuichi Ruva. ⁸ Ewe arafurie amuichi Ruva we kwa ku Ruva ni lufuro. ⁹ Hena ili lufuro lwa Ruva lule funuriwe hena ngoo teru, ku Ruva alemru mie mrana wake itho ngewe weka du ithangenyi kimetha fuirime iishi iiria kwakwe. ¹⁰ Hena lufuro lu thi ku ifwe fulemfurie Ruva fwe, mira niwe alefufurie akamruma mrana wake methe alihe thambi teru. ¹¹ Vambwie, kwaku Ruva afufurie ifwe lee, ifwe na fwe fuashighwa fufurane ifwe kwa ifwe. ¹² Haghire mndu hata umuvi emi mvona Ruvaho. Kole fukafurana ifwe kwa ifwe, Ruva aikaa voshi yeru na lufuro lwakwe lunde koloka voshi yeru. ¹³ Hena ili fuamanya ku fuchiikaa voshi yakwe nawe voshi yeru, kwaku andefunika mbeho wakwe. ¹⁴ Kangi fuvonire na ishuhudia ku papa amrumie mrana ave mghekira wa ithanga. ¹⁵ Kila akyairikia ku Yesu ni mrana wa Ruva, Ruva achiika voshi vyakwe nawe voshi ya Ruva. ¹⁶ Na fuichi na iluirikia lufuro lwa Ruva ni lufuro na ewe achiikaa voshi ya lufuro ake voshi ya Ruva na Ruva achiikaa voshi yakwe. ¹⁷ Hena ili lufuro lundekoloshwa hena ifwe kimetha fughire ngoo iraovaha hena mfiri wa mthio kwaku fundu we ake, nifyo nafwe fuke ithangenyili. ¹⁸ Hena lufuro haghire iovohaho, mira lufuro lukolikie luchikumba kiovosha bwang'a kwaku kiovosha kichivwarana na hukumu mira mndu aovohie amakoloswa hena lufuro we. ¹⁹ Fufurie kwaku Ruva alethongorie ifufura. ²⁰ Kole mndu aghamba, "Nimfurie Ruva" mira amdahie wavo lee, ni mgherera mongo, kwaku aramfuriebwavo akyamvona airimawe imfura Ruva aranamivona. ²¹ Na ili niyo iamoro afunikie ku wowoshe amfurie Ruva amfure na wavo.