¹ Vana vakwa nimufunie, ndemuandikia findofi kimacha munahira thambi. Mira umwi wenyu akahira thambi, fughire mghefukania ake na papa, Yesu Kristo ngewe aghire kitea. ² We niwe mghefu kania na thambi teru na thi kwa thambi teru duthomira na ithanga ithima. ³ Hena ili fuichi kuwe fumuichi ku fukavwara maamoro ghakwe uya akyaghamba, nimuichi ruva. ⁴ Mira akyavwara we maamoro ghakwe, ni mmongo, na keni ike voshi yakwe we. ⁵ Mira mndu thathoshe avwara kirero kyakwe, keni hena mndu tho haghire ifura ruva likolokie. Hena ikyo fuichi ku fuke voshi yakwe. ⁶ Itho aghamba ku arue voshi ya ruva kyashigha itho itho aghire mighendie thafundu ahirire. ⁷ Vambwie, imwe thinamuandikia maamoro masha nyi, mira maamoro gha idungakala muke nagholamoro ya kala ni kirero ngekyo mulekiichi. ⁸ Hata kwio nimamuandikia maamoro masha, ngegho ni keni hena Kristo na kwenyu, ang'u mma undeira, na kilanga kya keni kikeho kikyaaka. ⁹ Itho aghamba kuake hena kilanga mira afurene na wavo we, ake hena mma hata luvaha. ¹⁰ Itho amfurie wavo arue hena kilanga na haghire kyokyosha kyaima imvwira nyuma. ¹¹ Mira, itho aramfurie wavo ake mmenyi na akyairia mmenyi; we naichi handu akyaghenda ho, ang'u mma undevwagha mitho ghakwe. ¹² Ninamuandikia imwe vana nimufurie, angu muregheriwe thambi tenyu vundu vwa rina yakwe. ¹³ Ninamuandia imwe, vapapa, ang'u mumuichi uya ngewe ake tangu kala. Nindemuandikia imwe, vathoro, ngekyo mudindie na kirero kya ruva kike voshi yenyu na mumvotie shetani. ¹⁴ Nindemuandikia imwe, vandio, kwa ku mumuichi uya eke tangu ivoka. Ndemuandikia imwe, vana kwaku muna nguju na kirero kya ruva kike voshi yenyu, na mundemvota uya mvichwa. ¹⁵ Munafura mathanga nanga findo vyakwe. Ang'u itho afurie fya mathanga airima imfura papa we. ¹⁶ Ang'u kila kindo kike mathangenyi tamaa ya mwiri, tamaa ya mitho, na matumbighe palama fifumene fyo na Ruva mira fifumene na mathanga. ¹⁷ Mathanga na filanga vyakwe fyaira. Mira itho amfurie Ruva itho aikaa telele. ¹⁸ Vana vadu, ni ikenda ya msio. Thafundu muichi ku mghepinga Kristo akyacha, hata luvaha vapinga Kristo vandemicha, henakwio fuichi, ku ni igheri ya msio. ¹⁹ Vavukie kwaro ifuma kweru ang'u thileveru vo. Kole ngeleveru valeendelea iikaa hamwi na ifwe. Mira igheri vaghendie kwavo ikyo kikyarora thive veru vo. ²⁰ Mira mufiriwe mafura ni uya aelie, na imwe voshe muiichi keni. ²¹ Thimuandikirienyi ku muichi keni mwe, mira kwaku muiichi na kwaku haghire kweri ya mongo ho. ²² Nii nge mmongo thereluya akyaghomba Yesu Kristo we? Mndu u ni mghele gha Kristo liya akyamlegha papa na mwana. ²³ Haghire amlegha Mwana akava ake na Papa. Yeyoshe akyamwiirikia Mwana kwio kwio hata Papa. ²⁴ Hena vundu vyweru kia muki chue ifuma ivoka kyaikaa voshi yenyu, kangi, mwaikaa voshi ya Mwana na Papa. ²⁵ Ii ni ndaghano afunikie ifwe: ikia telele. ²⁶ Nindemuandikia imwe findofi fya vandu vyakyamutitika hena ireka. ²⁷ Na fundu fyenyu mafura ghaya mulegha ghuhirie ifuma kwakwe ghaikaa voshi yenyu, na mukashighe mndu wowoshe imulosha, mira kole mafura ghakwe ghakyamulosha vindo vyoshe na ni kweri thi mongotho, na hata kole ghandemimulosha kaenyi voshi yakwe. ²⁸ Na luvaha, vana nimufurie, kaenyi voshi yakwe kimacha akighecha fuirime ighira nguju na thi ikubaha kana iraghwa mothia ya icha yakwe. ²⁹ Kwaku muichi ku we niwe aghire kitea, muichi ku kila uya ahira kitea aghiriwe ni we.