¹ Abraham ni saoha asari jajenbalai, haphai ha asari glaipinba. Philistin ni Raja jang goronmane Isaak, Gerar ha thangba. ² Madai Isaak jang nujaohi thiba, "Egypt ha dadaokhlailang; ang ning khe dongma saniyaba haning dong. ³ Ebo haphai haning dong ode ang ning jang baosi dongphanang ode hamthai rinang; nini khlaihi ode nini sahrikh surikh ni khlaihi, ang ebo hahthan khe rima ode nini bupha Abraham jang smai dangyaba khe yaoblai rima. ⁴ Nohkhasao ha sathrai bangbalai nini sahrikh khe yerrima, ode ebo khrip hahthan khe nini sahrikh ne retharma. Nini sahrikh surikh ni gede jahi phirthima ni khrip raji khe hamthai rima. ⁵ Abraham ani grao khe khnabani, ang saniyaba khusi khe dangbani, ani dara khe manibani, khlaihi ang ebo khusi khe dangma." ⁶ Odejang, Isaak Gerar ha dongba. ⁷ Haphai ni subung, boni nohbrajikh ni basaoha singngba ha , bo thiba, "Bode ani bahandaose." Bo sainthima khinba, "Bode ani nohbrajikhse." bede tikhade bo baoba, "Rebeka majangbani, bo khe maimane khlaihi, erani subung ang khe sthaima." ⁸ Isaak budu glao oraha dongbani yahon ha, abimelek Derjo gede naihunhaba. Isaak boni nohbrajikh, rebeka khe sao nanghi dongba khe bo nuba. ⁹ Abimelek Isaak khe longhi thiba, "Nai, bode nini nohbrajikh se. Ningla sumu jabani elai thiba, "Bode ani bahandase?" Isaak bo khe thipinba, "Bo khe maimane khlaihi asaba subung ang khe sthailapure thihi ang baoba." ¹⁰ Abimelek thiba, "Ning sumu jabani jini basao ha elai khusi dangba? Serebalaiyabala nini nohbrajikh jang thupalaikahmu, ode ningla jing khe gjaiha hokhlaikhamu." ¹¹ Odejang Abimelek subungrao khe thiba, "Sere subung ebo subung jang boni nohbrajikh khe dophadu bo subung sthaijaoma." ¹² Madai hamthai ribani, bo hahthan ha Isaak hahdam dangjiba ode bo maithai haning phantha jang rjasi basao rajiba maiba. ¹³ Gnang gedeba jayasi bo subung gnang jadao jadao jaba, bangdao bangdao maiphalangba. ¹⁴ Boniha melma dao mih jang badamma dongba ode gibin gibin jinis noha dongba. Philistansarao bo khe naijiya jaba. ¹⁵ Boni bupha Abraham ni dangyahsarao dikhor khuhi galangyaba buthu khe, Philistansarao hah luphungtharba. ¹⁶ Abimelek Isaak khe thiba, "Ning era niprang thangla, bede tikhade ning jinthane baining gnang jadaokha, blaidaokha." ¹⁷ Odejang, Isaak ora niprang thanglahi Gerar haphaiha donglaihikha. ¹⁸ Isaak ni bupha Abraham dikhor khulangyaba ha Isaak ar dikhor khuslambakho. Abraham tieba ni yahon ha Philistansarao bo dikhor khe luphibba. Dikhor ni bumu, bupha dengbalaining Isaak bo olai jasosi Dikhor ni bumu dengba. ¹⁹ Isaak ni dangyahsarao dikhor khubaha, bonsi dimu hamba dikhor maiba. ²⁰ Gerar ni mih naiyahrao jang Isaak ni mih naiyahrao grao banglaiba, bonsi thiba, "Ebo dikhor de jinise." Odejang, Issak bo dikhor khe "Esek" thgihi bumu dengba bede tikhade bonsi, bo jang grao banglaiba. ²¹ Boni yahonha, bonsi ar gibin masi dikhor khuslambakho, orahabo bonsi niyalaiphaibani dikhor ni bumu khe bo "Sitnah" dengba. ²² Bo dikhor khe haigerlanghi, ar gibin dikhor masi khupinbakho tikhabo orahade bonsi phaihi niyalaiphaiyakha. Odejang, bo dikhor ni bumu khe "Rehoboth" dengba, ode thiba, "Duha Madai jing khe khasaokha, ode hamdao hamdao japhalangma jakha. ²³ Ora niprang Isaak Beersheba gede daokhulangba. ²⁴ Okhali horhaning Madai phaihi Isaak jang nujaophaihi thiba, "Angde nini bupha Abraham ni Madaise. Khinma nangya, ang ning jang baosi dongphadu ode ani danyahsa Abraham ni bumu jang, ninthane hamthai rinang, nini sahrikh surikh khe yerrinang. ²⁵ Isaak oraha madai huthan salamba ode Madai khe jirikhba. Oraha bo noh dangba ode dikhor bo khuba. ²⁶ Odehe Abimelek jang boni lugu Ahuzzath jang Phicol Siphaya ni Captain khe langphahi Gerar niprang phaihi bo jang goronphaiba. ²⁷ Isaak bonsi khe thiba, "Nisila sumu jabani aniha phaiba, nisila ang khe naisledu, nisi jang baosi dongjaopuyabani, ang khe haikhlaba?" ²⁸ Ode bonsi thipinba, "Ning jang baosi Madai dongphadu thihi jing rgaosisi nuthakha. Odebani khlaihi jing gini smai danglaima nangre, ningjang jing jang. Dei jing smai danglainang, ²⁹ Ningbo jini basao ha musi hamya khusi dangya, jingbo nini basao ha hamya dangya, ning jing khe hamsisi lamjaokha, hamsisi haipinhakha, ningde Madai ni hamthai gnangdse." ³⁰ Odejang, Isaak bonsi ne jimu gainmu salairiba ode bonsi jilaikha linglaikha. ³¹ Bonsi naigraha baijahi bonsi saosi jang saosi smai danglaiba. Odehe Issak bonsi khe haihaba ode bonsi khajahi baigolangba. ³² Okhalini basain haning Isaak ni dangyahsarao phaihi, bonsi dikhor khuyaba ni basaoha thiba. Bonsi thiba, "Jing di maikha." ³³ Bo dikhor khe bo Shibah thiba, odebani khlaihise bo hathn khe Beersheba thiba. ³⁴ Esau maithai jang bisagin maithai jabaha, Judithsa Beeri ni bisikh Hittithsa khe noh jaba, odehe hittitsa Elon ni bisikh Basemath khebo noh jaba. ³⁵ Bonsi Isaak jang Rebeka ni basao ha dukhu waimu labuba.