¹ Abrahamla hamsening maithai rakha, grasa jakha ode Madai Abraham khe khrip jadihabo hamthai riba. ² Dangyahsa radaothaoyaba, Abraham ni noh ni khrip naisotharyaba khe Abraham thiba, "Ani yathong ha nini yao khe bao, ³ Kanaanjikh, jini noh hari dongyarao jang ani basa khe noh jariya thihi Madai, halali ode phirthima ni bumu jang ning smai dangma nangma. ⁴ Tikhabo, ning ani desh ha thanghi ani hainthi niprang, ani basa Isaak ni khlaihi bihi laburima nangma. ⁵ Dangyahsa bo khe thipinba, "Orani masainjikh ang jang baosi phaipama nangjaoya tikhala bedehe khlaima? Ning garhi, phaiyaba rajiha , ang nini basa khe langhi thangma nangma?" ⁶ Abraham bo khe thipinba, "Ani basa khe oraha langpinma nangya." ⁷ "Ang khe ani bupha ni noh niprang ode ani aphna hainthi ni raji niprang longhunyaba ode ang jang grao smai danghi thiyaba 'Nini sahrikh surikh ne ebo raji khe rima thiyaba Halali ode phirthima ni Madai, boni degla khe nini sgang sgang haihanang, ode oraha ning, ani basa ni khlaihi nohbrajikh maibunang. ⁸ Tikhabo ning jang baosi bo masainjikh phaipama nangjaoya tikhade ang ninthane smai dangriyaba niprang ning gonang. ⁹ Odejang, ebo khusi habani khlaihi dangyahsa, Abraham ni yathong ha yao baohi smai dangba. ¹⁰ Dangyahsa, boni bubra niprang mihajeng maji langhi baigolangba. boni bubra niprang dangyahsa khrip jadi khebo langpaba. Bo baigolanghi, Nahor ni thol, Aram Naharain ni haphai gede thangba. ¹¹ Thol bnar ha dikhor dongyaba gbaha, bo mihajeng khe lengoriba. Sahriphang bubli ha masainjikh saosi di khaoma phaiba. ¹² Odehe bo thiba, "Ani bubra, Abraham ni Madai, ang khusi haba jenyaba khusi jathing ode ani bubra Abraham, smai riyaba khusi jathing. ¹³ Nai, ang dihkhor gbaha songhi dong ode rajini mathlarao di khaoma phaidu. ¹⁴ Olaining jathing.Ang bo masainjikh jang sainlaiba, 'Khasaohi nini didikh khe kheisa dikhlaima, ang di lingmamu; ode bo, ang khe thipinba, "Lingla, ode ang nini mihajeng nebo di khainnang; Dei ebo masainjikh ning, nini dangyahsa Isaak ne saikhoyaba jathing. Olai jadu tikhade, ani bubra, ning smai dangyaba gibise thihi ang tharmailanang. ¹⁵ Bo jang sainlaisaiba haning, Rebeka phagrong didikh bainhi phaiba. Rebeka ni bupha jakha Bethuel. Bethuel ni buma bupha Milkah jang Nahor. Nahor jabukha Abraham ni buphlung. ¹⁶ Bo mathla hamsening majangbi ode mathla gthar. Miyahrao saosibo bo khe nuba girikho. bo di khaoma thangba, di khaohi phaipinlakha. ¹⁷ Dangyahsa khaiphalanghi bo jang goronhiba ode thiba, "Nini didikh niprang khasaohi di khainsang." ¹⁸ Bo thipinba, "Lingla gedema," ode lamailamai didikh dikhlaihi, yao jang bonthane di khainba. ¹⁹ Bonthane, bo di khainbani yahon ha bo thiba, "Ang nini mihajeng nebo di khaorinang, linghasi di khaorinang." ²⁰ Odejang, bo gebre gebre di khainriba ode didikh khongja jaba, ode bo dikhor ha khaiphalanghi, Mihajeng nebo di khaoriba. ²¹ Madai nangjaoyaba khusila eboningthi baohi dangyahsa phrik phrik mathla khe naiba. ²² Mihajeng ne di khainblaiba ni yahon ha beseng duyaba gjao ni bugungthai ode gjao ni yaoser gedeyaba khe lahuhi ²³ thiba, "Ningla sereni bisikh? Khasaohi sainthi, nini bupha ni noha dini horsi nohma thaolangba mainang?" ²⁴ Bo thipinba, " Bethuel de ani bupha ode boni muma bupha jakha Milkah jang nahor. ²⁵ Bo ar thibakho, "Jiniha mihajeng ne jirimane sainjao bangbi, ninthane thuthan bo dong." ²⁶ Bo subung biliphahi Madai khe khilimba. ²⁷ Bo thiba, "Hamthai ni Madai Ani bubra Abraham ni Mdai, smai dangyaba khe blaoya, ode ani bubra jang lonjaogothaiyaba. Ani khlaihide, ani bubra ni hainthi nihaning theng theng labubase. ²⁸ Ode bo mathla, bumani noha dongyarao niha khaiphalanghi khrip jadi khe sainthitharba. ²⁹ Rebeka ni buphlung saosi dongba, Boni bumu jakha Laban. Bo subung dikhor niprang phaiyaba khe, Laban khaiphalanghi naihiba. ³⁰ Boni bahandao ni bugung ha bugungthai jang ode yaodo ha Yaoser khe nuhi odehe Rebeka ni khu niprang khnahi "Ebo subung ni basao haning bo ang khe sainthibase," Bo, bo subung dongyaba ha thangba, ode olaibaha bo subung mihajeng jang baosi dikhor gbaha songhi dongb. ³¹ Odehe Laban thiba, "Phai, ning Madai ni hamthai gnangyaba. Ning oraha sumu jabani songhi dongba? Ang ninthane dongthani salamrikha, Mihajeng nebo salamrikha. ³² Odehe bo, noha thangkha ode mihajeng ni basao ha bakho dongyaba khe hokhlaikha. Mihajeng ne sainjao jirikha, bonthane ode jang phaiphayabane yega mukhang sumane di rikha ³³ Bonsi bonthane jimu gaimu baohi, bo thiba, "Ang grao singma baoyaba khe singsoyasi ang khalai khamya." Ode Laban thiba, Dei thi." ³⁴ Bo thiba, "Angde Abraham ni dangyahsase. ³⁵ Madai ani bubra khe hamsining hamthai rikha ode bo subung gedeba jakha. Bonthane Madai Melma, dao mih, gjao gupu, dangyahsa dangyahjikh, Mihajengode mihleng ritharkha. ³⁶ Ani bubra Abraham ni nobrajikh Sarah, ralambai ha nana miyah maiba ode bo boniha dongyabasi khe bonthane ritharkha. ³⁷ Ani bubra ang khe smai dangrihi thiba, "Ang dongyaba erani Kanaansa ni bisikh khe ani basane nohbrajikh labumainang niya. ³⁸ Ani hainthi niha thanghi, ani aphnarao niprang ani basane nohbrajikh labu." ³⁹ Ang ani bubra khe thiba, "Bo masainjikh ang jang baosi phaipaya tikhala." ⁴⁰ Tikhabo bo thiba, "Ani sgang sgang thangyaba Madai, boni degla khe ning jang baosi haihanang ode ning khe lamah dismainang ode ani hainthi niprang, abai ni hainjom niprang, ning ani basane nohbrajikh mainang. ⁴¹ Tikhabo ning ani hainthi niprang ani basa ne nohbrajikh maibuya tikhade, ang ninthane smai riyaba niprang ning gopunang. ⁴² Odebani khlaihise, ang dini dikhor ha sophaiba ode thiba, "O Madai, ani bubra Abraham ni Madai, ning ang khe eraha haihayaba khusi yaoblai rima ⁴³ tikhade ang era dikhor gbaha dong, mathla saosi di khaoma phaiyaba khe ang thiba, "Khasaohi, nini didikh ni di khe kheisa khaisang," ⁴⁴ bo mathla ang khe thiba, Lingla, nini mihajeng buthu nebo ang di khaorinang" - bo masainjikh ning ani bubrani basa ne saikhaoyaba masainjikh jathing.' ⁴⁵ Ang grao sainlaisaihi dongba haning Rebeka, phagrong ha didikh bainhi di khaophaiba. Odehe ang bo khe thiba, "Ane khasaohi di khaisang." ⁴⁶ Gebre gebre didikh hokhlaihi bo thiba, "Lingla, ode ang nini mihajeng buthu nebo di khaorinang.' Ode ang di mailingkha ode mihajeng buthu nebo bo di khairikha. ⁴⁷ Ang bo khe singhi thiba, "Ningla sereni bisikh?' Bo thipinba, "Bethuel ni bisikh, Nahor jang Milkah ni busuthai. Ode ang bonthane bugungthai gainrikha ode yaodo ha yaoser gainriba. ⁴⁸ Odehe ang Madai khe yasugu thuhi Madai khe bkhan khlaiba, ode Madai hamthai riba, ani bubra ni Madai, ani bubra ni hainjom niprang, boni basane nohbrajikh smaimane ang khe langsmaiyaba Madai. ⁴⁹ Odebani khlaihi, nisi ani bubra ni basao ha khasaoma dong tikhade, sainthi. japunang niya tikhabo thi, nisi sainthibani basaohase ang yaoda tikhabo yaosi gede tikhabo yapri surpinlangma. ⁵⁰ Odehe Laban jang Bethuel thiba, "Graothaila Madai niprangse phaiba, jing ha,babo thipuya, hamyabo thipuya. ⁵¹ Naila, Rebeka de nini rogong haning dong. Bo khe langhi thangla, Madai nangjaobalai, nini bubra ni basa ni nohbrajikh jathing. ⁵² Bonsini grao khe khnahi, Abraham ni dangyahsa Madai ni sgang ha yasugu thuhi bihba. ⁵³ Dangyahsa, gjao gupu ode ri jem haikhohi Rebeka ne yaophaba. Boni buphlung jang bumanebo hamdaothaoyaba yaosandi khe riba. ⁵⁴ Bo jang ode bo jang baosi phaipayaba jilaikha linglaikha. Oraha bonsi horsi thulangba ode phorong ha baijahi bo thiba, "Ani bubra niha ang khe haipinha." ⁵⁵ Boni buphlung jang buma thiba, "Mathla subung jing jang sainjilai mamang dongphalathingkho. Boni yahon ha thanglathing." ⁵⁶ Tikhabo, bo bonsi khe thipinba, "Ang khe dajonrisi, bede tikhade Madaise ang khe labusmaiba. Ang khe nisi haipinhakhase, ang ani bubra niha sopinhipuma." ⁵⁷ Bonsi thipinba, "Jing masainjikh khe longhi singnangkho." ⁵⁸ Odehe bonsi Rebeka khe longhi singba, "Ning ebo subung jang baosi thangphama?" Bo thipinba, "Ang thangphama." ⁵⁹ Abraham ni dangyahsa jang bo jang phaipayaba saosi baosi, bonsi bahandao ode saosi dangyahjikh saosi khe haihaba. ⁶⁰ Bonsi Rebeka ne hamthai riba, "Jini bahandao rjing, rjon ni buma japuthing odehe bonsi khe naijiya jaraoni daoglap japhuthing. ⁶¹ Odehe Rebeka jang boni dangyahjikh baijahi mihajeng ha gakhuba bo subung ni yahon yahon thangphalangba. Dangyahjikh, Rebeka khe langhi sgangphalangba. ⁶² Isaak, Negev ha dongre, ode Beer Lahai niprang sophaisening sophaibakho. ⁶³ Sahriphang ha Isaak, hadao ha madai bihma thangba. Bo naikhuhabade Mihajeng buthuse phaidu! ⁶⁴ Rebeka bo naikha, ode Isaak khe nuba jangning bo Mihajeng niprang akhaika. ⁶⁵ Bo dangyahjikh khe singba, "Jing jang goronmane hadao ha hemkhlaibuyaba subungla sere? Dangyahjikh thipinba, "Bode ani bubrase." Odejang bo ri lahakha ode muhkhang phongkha. ⁶⁶ Bede bede jahi phaiba, khrip jadi khe dangyahsa, Isaak ne sainthitharba. ⁶⁷ Odehe Isaak Rebeka khe, buma dongyaba ha labuba, ode bo boni nohbrajikh jaba, ode bo bokhe khasaoba. Odejang, buma thibani yahon ha, bo bonthane khadema riba.