1
Akutile abekumi nababili elo apele kuli bo amaka yakulekutamfya ifibanda elo noku lekuposha amalwele.
2
Ababatumine ukuya bale bila palwa bufumu bwakwa Lesa elo nokulekuposha abalwele.
3
Alilandile kuli bo ati, ''Takuli kupiita nangu kamo palwendo lwenu--takuli inkonti, icola, umukate, elo nangu umwingila uwakucinja.
4
Elo mu ng'anda monse umo mwaingila, kwikala mulya mwine mpaka nelyo mukafumamo.
5
Uko konse uko bakana ukumipokelela, uluntu mulefuma mu musumba, mukunte no lukungu ku makasa yenu bakubashinina.''
6
Uluntu bafumineko elo nokupitana mu mishi, balebila imbila nsuma elo nokuposha abalwele ukuli konse.
7
Nomba Herodi imfumu yalyumfwile fyonse ifyalikucitika, calimupeseshe amano, pantu abantu bambi balikulanda ati ni Yoani eushikukile ku bafwa,
8
elo bambi nabo balikulanda ati ni Eliya eubwelele, elo bambi nabo ati ni umo pali ba kasesema abakale eushikukile.
9
Herodi alandile ati, ''Yoani nalimuputwilko umutwe. Bushe kanshi ninani uyu uo nebo ndeumfwa uulecita ifi fintu?'' Elo Herodi alikufwaisha ukumona Yesu.
10
Ulo abasambi babwekelemo, balimwebele ifintu fyonse ifyo bacitile. Eluntu Yesu abapitile, elo elo beka ukwakufisama ku musumba wa Betisaida.
11
Nomba uluntu amabumba yaumfwile palwa ifyo, balimukonkele. Naye alibapokelele elo nokulanda nabo palwa bufumu bwakwa Lesa, elo alikuposha abo abalikufwaikwa ukuposha.
12
Lulya akasuba kaba mukuwa, elo balya ikumi nababili baishile kuli ye elo nokumweba ati, ''Salanganyeni ibumba pakut baye mu mishi iishingulukile elo na mu mitanda pakuti basangane ukwakulala elo ne filyo, pantu kuno tuli mu mpanga.''
13
Nomba alandile kuli bo ati, ''Mwebo bene bapeleni ifya kuti balye.'' balandile ati, ''Fwebo tukwetepo fye imikate isno elo ne sabi lbili--kano nga kuti twaya nokushitilapo ifilyo ifya aba bantu bonse.''
14
(Abaume abali kulya ni cikanga ukufika naku makana yasano.) Alandile ku basambi bakwe ati, ''Bebeni bekale panshi mu mabumba aya bantu amakumi yasano.''
15
Eico balicitile ifyo fine, elo baebele abantu ukwikalako panshi.
16
Yesu epakubula imikate isano elo ne sabi libili, aloleshe mu mulu, alifipaliile elo no kuputaula mu tupimfya, elo apele abasambi bakwe nokuti bapele ku bumba.
17
Bonse balilile elo nokwikuta, elo nefyashelepo balifitolele--baiswishe imiseke amakumi yabili.
18
Icacitikile nici icakuti ulo Yesu alikupepa eka, na basambi bakwe nabo epo bali. Alibepwishe, ati, ''Bushe amabumba ya landa ati ninebo nani?''
19
Balimwasukile abati, ''Bamo balanda ati, ''Yoani Kabatisha. Nomba bambi balanda ati Eliya, elo bambi balanda ati uli umo pali ba kasesema bakale eubukile.''
20
Elo alandile kuli bo ati, ''Nomba nga mwebo mulanda ati ninebo nani?'' Petelo alyasukile ati, ''Niwebo Kristu wakwa Lesa.''
21
Nomba alibakonkomeshe ukukana ukwebako nangu umo ici,
22
nokulanda ati, ''Umwana wa Muntu ali nokucula ifintu ifingi elo nokukanwa ku bakulu elo ebakulu bakuba shimapeo elo naba kalemba, elo bakamipaya elo pa bushiku bwa kulenga shtatu akabuka.''
23
Elo alandile kuli bonse ati, ''Nga umuntu alefwaya ukunkonka, alekuikanya umwine elo alekupita umusalaba wakwe cila bushiku elo ankonke.
24
Uyo onse uufwaya ukupususha umweo wakwe akaulofya, nomba uyo onse uulufya uweo wakwe pa mulandi wandi ena akaupususha.
25
Bushe cindo umuntu enganonkamo mukuwina icalo conse, elo aonaikilapo nangu alufishapo umweo wakwe?
26
Uyo onse uungufwila insoni elo na mashiwi yandi, nao wine Umwana wa Muntu akamumfwila insoni uluntu akesa mubucindami bwakwe elo no bucindami ubwakwa Wishi elo na ba malaika bakwe aba mushilo.
27
Nomba Nebo ndemyeba icacine nati, bambi pali mwebo mwebeminine pano tabakafwe mpaka bakasuke bakamone ubufumu bwakwa Lesa.''
28
Nomba ulo papitile inshku cine konse konse ukufuma apo alandile aya amashiwi, Yesu apitile Petelo elo na Yoani elo na Yakobo elo baile pa mulu wa lupili ku kupepa.
29
Ulo alikupepa, awe pa menso pakwe palyalukile, elo ne fyakufwla fyakwe fyalibutile tutu nokubengeshima.
30
Moneni, abaume babili balikulanda na ye, Mose elo na Eliya,
31
abo abamonekele no bucindami, balikulanda naye pa lwakuya kwakwe, uko uko ali nokufikilisha mu Yelusaleemu.
32
Lelo Petelo elo nabo ali nabo balikushipula, nomba nomba uluntu utulo twapwile balimwene ubukata bwakwa Yesu elo na balya bantu babili abaimine naye.
33
Lulya aba bantu baba mukuya ukuma kuli Yesu, Petelo alandile kuli ye ati, ''Mulopwe, kuti cawama fwebo ukuti twikale kuno. Lekeni tupange imitanda itatu, umo obe ,umo wakwa Mose, elo na umbi wakwa Eliya.'' (Taishibile ifyo alikulanda.)
34
Lulya ali mukulanda, paisa ne kumbi elo lyabafimba, elo bali nomwenso ulo baingile mwikumbi.
35
Ne shiwi lya fumine mwikumbi, nokulanda ati, ''Uyu e Mwana wandi, uwasalwa wandi; mulekumumfwa.''
36
Uluntu ishiwi lyapwile ukulanda, Yesu asangenwe ali eka. Baikele shilili elo tabaebele nangu umo pali shilya pafili fyonse ifyo bamwene.
37
Lelo ubushiku bwakonkelepo, uluntu balikutentemuka ulupili, ibumba ilikulu lyalibakumenye.
38
Moneni, umuntu ukufuma mwibumba abilikishe, ati, ''Kasambilisha, Nakupapata lolesha pa mwana wandi, pantu e mwana fye uuntu nakwata.
39
Mona umupashi wakukowela ulacita nga wamwikata apopene alapunda noku punda; Elo walamufuntaula alfumya ne cite ku kanwa. Elo taumuleka bwangu elo nga waisa kumulekako ninshi umwana alinakile bubi bubi.
40
Nacilomba abasambi bobe ukuti baunyemo, nomba balifililwe.''
41
Yesu alyasukile elo nokulanda ati, ''Mwe nkulo iyakubula icisumino elo iyakukosa imitima, Bushe mfwile ukuba elo nokushipikisha mpaka lisa? Leta umwana obe kuno.''
42
Ulo umwana wakwe alikwisa, umupashi wakukowela walimulampwile panshi elo noku musalampansha. Nomba Yesu akalipile icimupashi elo nokuposha umulumendo, elo amupele nakuli wishi.
43
Elo bonse balipapukile pa bukulu ubwakwa Lesa. Ulo bonse balikusunguka pali fyonse ifyo ali kucita, alandile ku basambi bakwe ati,
44
''Mwebo mumfwikisheni bwino aya mashiwi: Umwana wa Muntu bali nokumusenuka noku muposa mu maboko yaba lwani.''
45
Nomba tabaishibile umo aloseshe. Yali ninkama kuli. eico tabaishile umo calolele, elo balikutina noku mwipusha pali aya amashiwi.
46
Elo pakati kabo palimine ifitala palwakwishiba umukuluapo bali.
47
Nomba Yesu, ico alishibile ukutontonkanya kwabo mu mitima yabo, abulile umwana umunono elo no kumubika pambali yakwe
48
elo nokulanda kuli bo ati, ''Uyo onse uwa pokelela uyu umwana mwishina lyandi, ninshi apokelela nebo; elo uyo onse uwa pokelela nebo ninshi apokelela no wantumine. Pantu uwaicefya pali mwebo bonse ninshi e mukulu.''
49
Yoani ayasukile ati, ''Kanabesa, twalimwene umuntu umo ale tamfy aimipashi yakukowela ukubomfya ishina elo twalimukenye, pantu teumo uwa muli fwebo.''
50
Mwilakumukanya, ''Yesu abeba ati, ''pantu uyo onse uushilemilwisha ninshi munenu.''
51
Ulo inshiku ishakupitwa ku mulu shapaleme, aliloseshe icinso cakwe ukulola ku Yelusaleemu.
52
Alitumine inkombe ishakumutangilila, elo balile elo nokwingila mu mushi wa Samaria pakumuteyanishisha fyonse.
53
Nomba abantu kulya tabamu pokelele pantu aloseshe icinso cakwe ukuya ku Yelusaleemu.
54
Uluntu abasambi Yakobo elo na Yoani bamwene ifi, balandile abati, ''Shikulu, bushe ulefwaya tulombe umulilo ukufuma ku mulu wise uboce?''
55
Nomba ali pilibukile elo nokubakalipila,
56
elo baile naku mushi umbi.
57
Ulo balikuya mu musebo, umuntu umo alandile kuli ye ati, ''Nakulakukonka konse uko walekuya.''
58
Yesu alandile kuli ye ati, ''Bamumbwe balikwata amendo, elo ne fyoni ifya mu mulu fyalikwata ifinsa, nomba Umwana wa Muntu takwata nangu pamo apakulalika umutwe wakwe.''
59
Eluntu alandile nakuli umbi ati, ''Nkonka.'' Nomba ayaskile ati, ''Shikulu, pakubala nje kushika batata.''
60
Nomba alandile kuli ye ati, Leka abakufwa balekushika abakufwa banabo. Nomba webo, kabuye uye ulekubila imbila nsuma iya bufumu bwakwa Lesa.''
61
Elo umbi alandile kuli ye ati, ''Nalakukonka, Shikulu, nomba pakubala lekeni ndekuya kushalikapo abaku ng'anda.''
62
Yesu amwasukile ati, ''Takwaba umuntu uubika ukuboko kwakwe pa lukasu elo elelolesha kunuma uulingile mu bufumu bwakwa Lesa.''