¹ Nomba muli nshino nshiku, ulo impendwa yabasambi yatampile ukukula, ukuilishanya kuba Yuda kwali tampile paba Hebere, pamulandu wakuti tabali kusakamana bamukamfwilwa pakwakanya ubwafwilisho bwacila bushiku. ² Abekumi na babili bakutile abasambi kuli bena nokubeba ai, ''Taculungeme kuli fwebo ukusambilisha icebo cakwa Lesa pakuti belakutupa ifintu. ³ Kanshi tulingile ukusala, mwe ba muninane, abantu cine lubali muli fwebo, abantu abamashina ayabune, abaisulamo Umupashi wa Mushilo na mano, abo tukopela uyu mulimo. ⁴ Kuli fwebo, twakukonkanyapo lonse ukupepa na mubutumikishi bwa cebo.'' ⁵ Ukulanda kwabo kwali sansamwishe ibumba. Elo basalile Stefano, umuntu uwaisulamo icitetekelo na Mupashi wa Mushilo, na Filipo, Prokora, Nikano, Timoni, Parmenasi, na Nikolau cipondoka waku Antioki. ⁶ Abacisumino baletele aba bantu kubasole, mukubapepela noku batambalikapo amaboko. ⁷ Kanshi icebo cakwa Lesa calikonkenyepo fe ukuya cikosanduluka, ne mpendwa ya basambi mu Yerusalemu yaile ikolundwa sana, ne mpendwa yaba shimapepo abasumine icitetekelo. ⁸ Nomba Stefano, uwaisulamo amaka ne cikuku, alikucita ifipesha mano nefilangililo ku bantu. ⁹ Nomba kwalimine bantuabali ku sinagogi balikukuta ai sinagogi lya ndubulwa, baku Kirene na Aleksandria nabamo ukufuma ku Kilikia naku Asia, Aba bakulanhanya na Stefano. ¹⁰ Nomba balikufilwa ukukanya amano Stefano no Mupashi Stefano alikulandilamo. ¹¹ Elo bapele amafisa kanwa kuli bambi abantu nokusosa ai, ''Tulyumfwile Stefano akolanda amashiwi ya miponto pali Mose na Lesa.'' ¹² Balitunkile abantu, ba cilolo, naba kalemba, nokuya kumona Stefano noku mwikata ukumuleta ku cilye. ¹³ Baletele bakambone wabufi, abali kusosa ai, ''Uyu muntu alakonkanyapo fe ukulanda amashiwi ya bufi pali ino ncende ya mushilo ne funde. ¹⁴ Twali mumfwile akoeba ai Yesu waku Nasaleti akonaula mo ncende no kupilibula intambi isho Mose atupele. ¹⁵ Umuntu onse uwali mu cilye uwali kumulolesha amwene mpumi yakwe ukuba ai yakwa malaika.