¹ Nomba umuntu ishina lyakwe ni Ananiya, no mukashi wakwe, ashitishe iciputulwa ce bala. ² Alisungile iciputulwa ca ndalama ashitishemo (no mukashi wakwe alishibile), aletele iciputulwa cimbi no kubika pamakasa yabasole. ³ Nomba Petelo asosele ai, ''Ananiya, nindo Satana aisulila mu mutima obe no kubepa Umupashi wa Mushilo wasunga shimbi indalama sha mumpanga yobe? ⁴ Ulo utashitishe, tayali yobe, panuma washitisha, tayali mumaka yobe? Nindo wacibikila mu mutima obenokucita ici? Taubepele ku bantu, ni kuli Lesa.'' ⁵ Ukumfwa aya mashiwi, aliwile panshi nokufwa, no mwenso walikete bonse abaumfwileko. ⁶ Abalumendo balimine nokumufungila mu nsalu, nokumusenda nokuya mushika. ⁷ Panuma ya nsa shitatu umukashi alishile, taishibile icacitikile. ⁸ Petelo asosele kuli ena ai, ''Njeba umutengo mushitishe mpanga,'' A asukile ai, ''Ee, pakuti.'' ⁹ Petelo asosele ai, ''Findo musuminishenye ukwesha Umupashi wakwa Shikulu? Mona, amakasa yabashikile umulume obe yali pa mwishi, nobe bakokusenda ku nse.'' ¹⁰ Apopene nao aliponene panshi pamakasa yakwe no kufwa. Abalumendo ulo babwelele, nao bamusangile alifwile, balimupitile baya kumushika mupepi napo bashikile umulume wakwe. ¹¹ Umwenso ukulu sana walishile mu cilonganino napali bonse abaumfwileko ifi fintu. ¹² Ifilonganino nefisungusho fyali kucitika pa bantu ukufuma ku basole. Bonse bali mulukungu lwakwa Solomoni. ¹³ Nomba tapali uwashipile ukuilunda kuli bena; nomba abantu bali bacindikile. ¹⁴ Lelo nabambi abalikusumina bali kuilunda kuli Shikulu, amabumba yabaume nabanakashi. ¹⁵ Pakuti balikusenda nabalwele mu misebo no kubalalika pa masanshi napa matanda, pakuti Petelo nga apita, icinshingwa cakwe cise bambi cibakumye. ¹⁶ Kabili kwaishile pamo impendwa iikulu iya bantu ukufuma misumba namu Yerusalemu, bakoleta abalwele nabali kushiwa ne mipashi yakukowela nabo balipolele. ¹⁷ Nomba umukulu wabashimapepo aliminine, na bonse abo bali nankwe (abamulubali lwa ba Saduki); ico bali no bufuba. ¹⁸ No kwikata abasole, nokubika abasole mu cifungo ca cintu bwungi. ¹⁹ Lelo ubushiku malaika wa Mfumu aliswile ifibi fya mu cifungo no kubafumyamo, no kusosa ai, ²⁰ ''Kabiyeni, mukeminine mwi tempele no kulanda ku bantu amashiwi yonse aya mweo.'' ²¹ Ulo baumfwile fi, baile kwingila mwitempele mukuca kwa bushiku waba shimapepo alishile, na bonse abali nankwe, no kukuta icilye, ba cilolo ba bantu mu Israeli no kutuma abantu ai balete abasole bali mu cifungo. ²² Nomba abali nshi ulo baile taba basangilemo, balibwele nokwisa tubulula, ²³ ''Twile kusanga icifungo icaisalwa nomba naba malonda baliminine pa mwinshi, nomba ulo twacisula icibi tusangile tamuli nangu umo mukati.'' ²⁴ Nomba ulo kangalila wa cifungo naba shimapepo vmukalamba baumfwile aya mashiwi, calibapeseshe amno pafyali no kutumbukamo. ²⁵ Elo umuntu aishile no kubeba ai, ''Balya bantu mwakakile mu cifungo bali mwitempele bako sambilisha abantu.'' ²⁶ Elo umukalamba wa cifungo aile naba linshi bakwe nokuya kubapita, ukwabula ifyongo, pantu balikutina abantu, ai kuti babapola amabwe. ²⁷ Ulo babaletele, balibatwele ku cilye. Umukulu waba shimapepo alikubatofyanya, ²⁸ no kusosa ai, ''Twalimikanya ukusambilisha pe shina lyakwe, nomba mwaisusha Yerusalemu nefisambilisho fyenu no kufwaya ukubika umulopa wa uyu muntu pali fwebo.'' ²⁹ Lelo Petelonabasosele ba asukile ai, ''Tufwile ukukonka Lesa ukucila abantu. ³⁰ Lesa wafikolwe abushishe Yesu, uo mwaipeye no kumulika pa cimuti. ³¹ Lesa alimusansabikile ku mulyo nokuba umwana wa mfumu kabili Umupusushi, no kupela Israeli ukulapila, no kufumishiwapo kwa membu. ³² Tuli bukombe pali ifi fintu, pamo na Mupashi wa Mushilo, uo Lesa apela ku bamunakila.'' ³³ Ulo bashicilye baumfwile ifi, balifulilwe balikufwaya no kwipaya abasole. ³⁴ Nomba umu Faliseli weshina lya Gamalieli, kasambilisha wamafunde uwacindikilwe na bantu bonse, aimine pa cilye nokupela icipope ati ngale aba abantu bafumyeni. ³⁵ Elo asosele kuli bena ai, ''Mwebaume bamu Israeli, kutikeni kufyo nkopingula pali aba bantu. ³⁶ Shino nshiku tashilaisa, Tendasi alimine ukuitunga icintu, ne mpendwa ukulingana imyanda ine, bali mukonkele. Balimwipeye, na bonse abali kumubela baliba salangenye tapali ne calipo. ³⁷ Panuma ya uyu muntu, Yuda waku Galile alimine mu nshiku sha kupendwa abantu nao asendako abantu kuli ena. Nao alilobele, nabali kubela balibasalangenye. ³⁸ Nomba nasosa ifi, fumeniko kuli aba bantu nokubaleka beka, pantu nga kupekanya ne milimo ya bantu, bakuficimfya. ³⁹ Nomba nga fyakwa Lesa, tamwakaba cimfye; mukasanga ai mukolwisha Lesa.'' Efyo babapatikishe. ⁴⁰ Elo baingishe abasole mukati nokubapuma kabili balibakenye ukulanda mwishina lyakwa Yesu noku balekako baya. ⁴¹ Balifumineko ku cilye baile bako anga pantu bali abawaminwa ukulila pakutakana ishina. ⁴² Panuma, cilabushiku, mwi tempele na ku nganda ne nganda, balikonkenyepo ukusambilisha no kubila imbila nsuma ai Klistu ni Yesu.