¹ Elo Yoani na Petelo alikulanda ku bantu, bashimapepo nabakangalila we tempele naba Suduki baishile kuli bena. ² Balisakamene sana pantu Petelo na Yoani balekusambilisha abantu pakushukuka kwakwa Yesu ukufuma ku bafwa. ³ Balikuba tambalikila amaboko no kwikala nabo ukufika ulucelo, pantu nomba cali cingulo. ⁴ Nomba abengi abantu abaumfwile balisumine; ne mpendwa ya baume bali amakana yasano. ⁵ Caishile kubako bwise buce intungulushi shabo, ba cilolo, na bakalamba balongene mu Yerusalemu. ⁶ Annasi shimapepo mukalamba nao eko ali, Kayafa, na Yohani, alekusenda na bonse balupwa lwa mukalamba waba shimapepo. ⁷ Elo babikile Petelo na Yoani pakati kabo, balibepwishe ai, ''Nikumaka, nangu ni mwishina ndo, mucitile ifi? ⁸ Elo Petelo, aiswile no Mupashi wa Mushilo, no kusosa a' ''Mwe ntungulushi sha bantu, na bacilolo. ⁹ Nga tuli pa kweshiwa lelo, pa fisuma tucitile kuli uyu mulwele, elo ne nshila tumuposeshemo. ¹⁰ Lekeni chishibikwe kuli mwebo bonse naku bantu bonse abena Israeli ukuti uyu muntuwimininw apa umumi ni mwishina lyakwa Yesu Klistu umwina Nasareti, uo mwatanikile, nomba uo Lesa abushishe ku bafwa. ¹¹ Yesu Klistu e libwe bakakula basulile ilyaishile kupanga icifutu. ¹² Tamwaba ipusukilo mu muntu umbi, pantu takwaba ishina limbi panshi ya kasuba ilyaba ku bantu ilo abantu benga pusukilako.'' ¹³ Nomba ilyo bamwene ukushipa kwa kwa Petelo na Yoani elo bailukile ati bantu fe, abasha sambilila, balipapile, nokwiluka ai Petelo na Yoani bali na Yesu. ¹⁴ Pantu bamwene umuntu ba poseshe aliminine nabo, tabakwete cakutalika pali ci. ¹⁵ Nomba panuma baebele abasole ukufuma umo bakumene, batampile ukulalanda beka beka. ¹⁶ Balesosa ai, ''Findo tufwile twacita pali aba bantu? Pantu icishibilo icikulu cacitika muli bena, kabili cashinikishiwa kuli onse uwikala mu Yerusalemu, teti acikane. ¹⁷ Nomba pakuti cisalangane ukutali mu bantu, natubasopeshe ukutalanda pali ifi ku bantu muli ili shina.'' ¹⁸ Elo balibakutile mukati nokuba konkomesha ukutalanda nangu ukusambilisha mwishina lyakwa Yesu. ¹⁹ Nomba Petelo na Yoani ba asukile no kusosa kuli bena ai, ''Nga cakuti cililungeme mu menso yakwa Lesa ukumikonka nangu ena, pinguleni. ²⁰ Fwebo tekuti tuleke ukulanda pali ifi fintu tumwene no kumfwa.'' ²¹ Panuma yakusopesha Petelo na Yoani, balibalekele baya. Balifililwe ukubapela icilubo cakubapanikilapo, pantu abantu bonse baile balelumbanya Lesa pa ca citikile. ²² Umwaume wapitile muli ici cilangililo cakundapwa alicilile imyaka amakumi yane. ²³ Panuma ulo babalekeleko, Petelo na Yoani babwelele ku bantu babo nokutubulula ifyo bashimapepo mukalamba na bacilolo balelanda kuli bena. ²⁴ Ulo baumfwile ifi, balisaswile amashiwi yabo no mulimo umo kuli Lesa nokusosa ai, ''Shikulu, mwapangile imyulu ne sonde naba bemba, na fyonse ifyabamo. ²⁵ Mwasosele muli Mupashi wa Mushilo ku kanwa kamubomfi, Tata Davidi, 'Nindo ifyalo fyabena fya bena fyalo fya fulilwa, na bantu batononkanya ifintu ifya cabe cabe?' ²⁶ Mwasosele ai, 'Ishamfumu shapa calo shalongene pamo, ne ntungulushi shalongene pamo ukukana Shikulu, nokukana Klistu.' ²⁷ Icine cine, bonse Herodi na Ponsho Pilato, pamo nabena fyalo na bantu bamu Israeli, balongene pamo muli uyu musumba ukukana uyu mubomfi wa Mushilo Yesu, uo mwasubile. ²⁸ Balongene pamo pakuti ifyo ukuboko kobe namapange yobe fyapekenye mukubangilila ukucitika. ²⁹ Nomba, Shikulu, lolesha pa kusoka kwabo no kupela ababomfi bobe ukulalanda mukushipa. ³⁰ Tambalika ukuboko kobe ku kundapa no kupela ifishibilo nefipapwa mwishina lya mubomfi obe uwa shila Yesu.'' ³¹ Panuma yakupepa, incende iyo balongenepo yalisunkene, elo bonse bawile na Mupashi wa Mushilo no kulada icebo cakwa Lesa mukushipa. ³² Impenwa iikulu ya abo abasumine bali no mutima umo no mweo umo. Tapali umuntu wasosa ai ifyo akwete fyali fyakwe eka, fyonse fyali fya bonse. ³³ Namaka ayakulu sana abasole baleshimika ubunte pa kushukuka kwa kwa Shikulu Yesu, noku senaminwa ukukulu kwali pali bena. ³⁴ Tapali umuntu pali bena uutakwete nangu kamo, pantu bonse abakwete impanga nangu amayanda balikushitisha elo bakoleta indalama shamu fintu balikushitisha. ³⁵ Balikufibika pa makasa yabasole, kabili bali kufyakanya ukulingana nokukabila kwa cila umo. ³⁶ Yusufu, uo abasole balikwita ai Barnaba (ifyapilibula ai umwana wakukoselesha), umwina Lefi, umuntu waku Kupro. ³⁷ Ashitishe ibala lyakwe no kuleta indalama no kushibika pa makasa yabasole.