¹ Раббий Мусога сўзлаб деди: ² “Исроил ўғилларига буюриб, уларга айтгин: Канъан ерига кирганларингизда, сизларга мерос қилиб бериладиган ер мана шу ― Канъан ери ва унинг чегараларидир. ³ Сизларнинг жануб томонингиз Эдўм ёнидаги Син саҳросидан бўлади ва сизнинг жанубий чегараларингиз Туз денгизининг чекка қирғоғининг шарқий томонидан ўтиб, ⁴ чегараларингиз жануб томонга Акраббим тепаликларига йўналади ва Син орқали ўтади. Унинг бўртиқлари жануб томонда Қадеш-Барнеаҳга кетади, у ердан Ҳазар-аддар томонга кетади ва Азмон орқали ўтади. ⁵ Чегара Азмондан Миср дарёси томонга кетади ва унинг бўртиқлари денгиз томонга йўналган бўлади. ⁶ Сизларнинг ғарбий чегарангиз буюк денгиз бўлади. Бу сизнинг ғарбий чегарангиз бўлади. ⁷ Шимолий чегарангиз бундай бўлади: уни буюк денгиздан Ҳор тоғигача ўтказинглар. ⁸ Ҳор тоғидан Ҳаматнинг кириш қисмигача ўтказинглар, чегаранинг бўртиқлари Зедаднинг чегараси бўлади. ⁹ Чегара у ердан Зифрон томонга кетади ва унинг бўртиқлари Ҳазар-енан томонда бўлади. Бу сизларнинг шимолий чегарангиз бўлади. ¹⁰ Ўзингизга шарқий чегарани Ҳазар-енандан Шефамга ўтказинглар, ¹¹ чегара Шефамдан Аиннинг шарқий томонидан Риблаҳга кетади. Сўнгра чегара шарқий томондан Киннерет денгизи қирғоқларига тегиб туради. ¹² Сўнг чегара Йордан томонга кетади ва унинг бўртиқлари Туз денгизи томонда бўлади. Мана шу ҳар томондан чегаралари билан сизларнинг ерингиз бўлади”. ¹³ Мусо Исроил ўғилларига буюриб деди: “Мана шу ― Раббий тўққизта қабилага ҳамда бир қабиланинг ярмига беришни амр қилган ва сизлар қуръага кўра улушларга тақсимлайдиган ер. ¹⁴ Чунки авлодига кўра Рубен ўғиллари ва авлодига кўра Гад ўғиллари ҳамда Манашеҳ қабиласининг ярми ўз улушларини олган эдилар: ¹⁵ иккита қабила ва ярим қабила Йорданнинг бу томонидан, Йериходан шарққа қараб ўз улушларини олдилар”. ¹⁶ Раббий Мусога сўзлаб деди: ¹⁷ “Сизларга ерни тақсимлаб берадиган эркакларнинг исмлари мана булар: руҳоний Элеазар ва Нўн ўғли Йешуа. ¹⁸ Ҳар бир қабиладан биттадан ҳокимни ерни тақсимлаш учун олинглар. ¹⁹ Мана, ушбу эркакларнинг исмлари: Яҳудонинг қабиласи учун Йефуннеҳ ўғли Калеб. ²⁰ Шимўн ўғилларининг қабиласи учун Аммиҳуд ўғли Шомуил. ²¹ Беняминнинг қабиласи учун Кислон ўғли Элидад. ²² Дан ўғилларининг қабиласи учун Йоглининг ўғли ҳоким Букки. ²³ Юсуф ўғиллари ва Манашеҳ ўғилларининг қабиласи учун Эфоднинг ўғли ҳоким Ҳанниэл. ²⁴ Эфрайим ўғилларининг қабиласи учун Шифтаннинг ўғли ҳоким Кемуэл. ²⁵ Забулун ўғилларининг қабиласи учун Парнаҳнинг ўғли ҳоким Элизафан. ²⁶ Иссохор ўғилларининг қабиласи учун Аззаннинг ўғли ҳоким Палтиэл. ²⁷ Ашер ўғилларининг қабиласи учун Шеломенинг ўғли ҳоким Аҳиҳуд. ²⁸ Нафтали ўғилларининг қабиласи учун Аммиҳуднинг ўғли ҳоким Педаҳел”. ²⁹ Мана шулар – Раббий Исроил ўғилларига Канъан ерида улушларни тақсимлаб беришни буюрган одамлар.