¹ Hasil fi wahid yom inu Yesua kan bi seli fi mahal tani. Wokit huwo kan kalasu, wahid min talamiz tuo kelimu le huwo, ''Rabuna, derisu anina salawat ze ma Youhana derisu talamiz tuo.'' ² Yesua kelimu le huwomon, ''wokit itakum seli kelimu takum, 'Abu, isim taki kede kun kuduus. Kede malakuut taki ja. ³ Wodi le nina rigif ta kulu yom. ⁴ Affi kataya ta nina, ze anina bi affi al amulu bataal le nina. Ma ta shilu anina fi tejiriba.''' ⁵ Yesua kelimu le huwomon, ''Munu min itakum inudu sabi wa bi ruwa le huwo fi nus belel, wa kelimu le huwo, ''Sabi, deinu le ana talata rigif, ⁶ sabi taija bes min sika, wa ana ma indu haja ashan bi wodi gidam tuo'? ⁷ Bad dak al fi juwa huwo juabu huwo kelimu, 'Ma ta tabu ana. Bab kalas gofolo, wa iyal tai, ma ana, fi serir. ana ma bi agder gum fok wa wodi rigif le inta.' ⁸ Ana keimu le inta, hata huwo kan ma gum fok wa wodi le inta rigif ashan inta sabi tuo, lakin ashan ihtiyaj, huwo bi gum fok wa wodi le inta rigif ketir ze ita der. ⁹ Ana kaman kelimu le intakum, asalu biwodi le intakum; fetisu, wa ita bi ligo; dugu, wa bi fatauo le intakum. ¹⁰ La anu kulu zol al bi asalu bishilu; wa al bi fetisu bi ligo; wa al bi dugu, bi fatauo. ¹¹ Yatu abu fi nus takum, kan jena tuo asalu samaga, bi wodi le huwo debeba min samaga? ¹² aw kan huwo asalu beida, bi wodi le huwo agarab? ¹³ Ashan keda iza kan itakum al ashrar arufu wodi hadia kwes le iyal takum, godor sunu Abu al min sama bi wodi Roho al Kuduus le del al asalu huwo?'' ¹⁴ Hasa Yesua kan bi truju bara shayateen al kan atrash. zaman shitan ruwa bara, zol al kan atrash wonusu, wa kan jumhuur mustagarab. ¹⁵ Lakin juzu ta nas kelimu, ''Ma Beelzebul, hakim ta shayateen, huwo bi turuju bara sahyateen.'' ¹⁶ Tanin jeribu huwo wa asalu min huwo alama min sama. ¹⁷ Lakin Yesua arufu afkar tuomon wa kelimu le huwomon, ''Kulu mumlaka gasimu fi nefsa tuo bi demiru, wa beit al gasimu fi nefsa tuo bi waga. ¹⁸ Iza shitan gasimu fi nefsa tuo kef malakuut tuo bi wogif? La anu itakum kelimu Ana turuju shitan bara bi wasat Beelzebul. ¹⁹ Iza ana turuju shayateen bi wasat Beezebul bi wasat , munu nas al takum bi turuju huwomon bara? La anu ashan de huwomon bikun guda. ²⁰ Lakin iza ana turuju shayateen bi iden ta Allah, fa malakuut ta Allah ja le itakum. ²¹ Zaman zol gowi al huwo musalah bi harisu beit tuo, buda tuo bi kun ameen, ²² Lakin kan zol gowi gilibu huwo, zol al gowi bi shilu daraga al zol indu sigah wa nahabu hajat ta zol de. ²³ Al ma ma ana huwo deed ana, wa al ma limu ma ana bi ferigu. ²⁴ Zaman roho al shirir tala bara min al insaan, huwo bi ruwa min mahal al mafi fogo moyom wa bi fetisu raha. wokit huwo ma ligo, huwo bi kelimu, 'Ana bi rija le beit tai al ana ja min fogo, ²⁵ 'Wokit huwo rija, huwo huwo ligi beit nedifu wa nezimu. ²⁶ Bad dak huwo ruwa wa jibu ma huwo saba aruwa tanin shirir aktar min huwo wa huwomon kulu ja geni inak. Bad keda nihaya ta insaan de bi kun bataal min al awel.'' ²⁷ Hasil ze ma huwo kelimu hajat del, mara tani aufa sout tuo fok min nas wa kelimu le huwo, ''Baraka le batana al hamilu inta wa baraka le suduur al inta rada.'' ²⁸ Lakin huwo kelimu, baraka le del al bi asuma kalam ta Allah wa bi hafizu.'' ²⁹ ' Ze ma jumhuur kan bi zidu, Yesua bada kelimu, ''jeil de huwo jeil al shirir. bi fetisu alama, hata ma bi wodi le huwo bes alama ta Younan. ³⁰ La anu ze ma Younan biga alama le Ninawe, ze de kaman Jena ta isaan bi kun alama le jeil de. ³¹ Maleka ta Junub bi fok fi hukum ma rijal ta jeil de wa hukumu huwomon, la anu hiya ja min nihayaat ta ard ashan bi asuma hikma ta Suleiman, wa aye, zol kebir min Suleiman wuo ini. ³² Rijal ta Ninawe bi wogif fok fi hukum ma jeil ta nas wa bi hukumu huwo, la anu huwomon tub ma bushara a Younana, wa ayenu, zol kebir min Younan huwo ini. ³³ Ma fi zol, bi wala lamba, wa bi dusu aw bi kutu tihit gufa, lakin fok, ashan del al bi dakalu bi ayenu al nor. ³⁴ Ena taki huwo lamba ta gesim. Kan ena taki kwes. gesim taki kulu bi mala ma nor. Lakin kan ena taki bataal, gesim taki kulu bi mala ma duluma. ³⁵ Ashan keda, kun haris inu nor al fogo inta ma duluma. ³⁶ Fa iza gesim kulu maliyan ma nor, mafi tani fogo duluma, biga gesim taki kulu bi kun ze lamba al wala bi lama fogo inta.'' ³⁷ Wokit huwo kalasu wonusu, Firisee asalu huwo ashan bi akulu ma huwo fi beit tuo, fa Yesua ruwa wa geni. ³⁸ Al Firisee kan mustagarab inu Yesua ma kasulu awel gabli ghada. ³⁹ Lakin Rabuna kelimu le huwo, ''Itakum, Firiseen bi nedifo cubaya wa zir min bara, lakin dakil intakum maliyan ma shar wa tamma. ⁴⁰ Itakum rijal al beleteen! Hal al sala bara ma yau sala bi dakil? ⁴¹ Wodi le al meskiin haja al fi dakil, wa hajat kulu bi kun nedif le inta. ⁴² ''Lakin woe le itakum Firiseen, la anu intakum limu nana wa asf wa bagi gesh ta jinena, lakin itak msibu adala wa muhaba ta Allah. Huwo muhim ashan itakum bi amulu adala wa hibu Allah, bidun waga fi amulu hajat tanin kaman. ⁴³ Woe le itakum Firiseen, la anu itakum hibu karasi al gidam al fi kenisa wa salam al ma ihteram fi mahal suk. ⁴⁴ Woe le itakum, la anu itakum ze turubat al dusu al nas bi doworu min ras tuo huwomon ma arufo huwo.'' ⁴⁵ Wahid min nas ta ganuun kelimu le huwo, ''Mo alim, haja al ita kelimu de shitima le anina.'' ⁴⁶ Yesua kelimu, ''Woe le itakum, mo alimin ta ganuun! La anu itakum kutu nas tiglla al sab ashan bi shilu, lakin itakum ma bi lemesu tiglla ma wahid min dufur takum. ⁴⁷ Woe le itakum, la anu itakum abinu turubat le anbia, wa kan de judud takum yau katulu huwomon. ⁴⁸ Fa itakum shuhudin wa itakum rudu shokul ta judud takum, la anu sei katulu huwomo wa itakum abinu turubat tuomon. ⁴⁹ L e sabab de kaman, hikmma ta Allah kelimu, 'Ana bi rasulu le huwomon anbia wa rusul, wa huwomon bi azibu wa katulu tanin,' ⁵⁰ Jiel de, bi kun mosul le dom ta anbia al kubo min zaman alam bada, ⁵¹ min dom ta Habil le dom ta Zechariah, al katulu bein mazbah wa beit. Num, Ana kelimu le itakum, Jiel de bi kun mosul. ⁵² Woe le itakum nas ta ganuun, la nau itakum shilu bara muftah ta marifa; itakum ma dakalu bi nfsa takum wa itakum abosu del al bi dkalu.'' ⁵³ Bad Yesua ruwa min inak, al kataba wa Firiseen aridu huwo wa .nagish ma huwo an hajat ketir, ⁵⁴ hawel ashan bi amsuku huwo fi kelimat tuo