¹ Hasa bad hajat del, Rabuna azilu sabein tanin, wa rasulu huwomon bara etnin etnin gidam tuo le kulu medina wa mahal al huwo bi nefsa tuo kan bi ruwa fogo. ² Huwo kelimu le huwomon, ''Al hasad ketir, lakin nas ta shokol besid. Ashan keda asalu Rabuna ta hasad ashan bi rasulu nas ta shokol le hasad. ³ Ruwa fi sika taki. Ayenu, Ana rasulu itakum ze koruf fi nus ta zi ab. ⁴ Ma ta kum shilu shenta gurush, aw shenta ta safar, wa gizmat, wa ma takum aye zol fi sika. ⁵ Aye bet itakum dakalu, awel kelimu,'Salam kede kun fi bet de!' ⁶ Kan zol ta salam fi inak, salam taki bi kun fogo huwo, lakin kan ma fi huwo bi rija le ita. ⁷ Geni fi nefsu bet de, akulu wa asurubu haja al huwomon wodi, la anu al amil bi istahik ujura. Ma takum doworu min bet le bet. ⁸ Aye medina al itakum dakalu, wa huwomon rahibu itakum, akulu haja huwomon jahizu gidam taki ⁹ wa aliju al ayan al fi inak. huwo kelimu le huwomon, Malakuut ta Allah ja gerib le itakum.' ¹⁰ Aye zaman itakum dakalu medina wa huwomon ma rahibu itakum, ruwa bara le sika wa kelimu, ¹¹ 'Hata gubar ta medina takum al amusuku fi kura tanina anina nedifo ded itakum! Lakin arufu kede: Al malakuut ta Allah biga ja grib. ¹² Ana kelimu inu fi yom ta hukum huwo bi kun kwes le Sodom min al bi kun le medina dak. ¹³ Woe le inta, ya Corizin woe le inta, ya beit Seida! Lo guwa al kan amulu le intakum kan amulu fi Sur wa Seida, huwomon kan tub min zaman, gayidin fi keys wa rumaat. ¹⁴ Lakin huwo bikun ahsen ihtimal le Sura wa Seida fi wokit ta hukum aktar min al le inta. ¹⁵ inta Capernahum, inta bi fekir inta bi arufawo le sama.? La, inta bi jibu tihit le gubuur. ¹⁶ Al wahid al bi asuma le itakum bi asuma le ana, wa wahid al aba itakum aba ana, wa al wahid al aba ana aba al wahid rasulu ana.'' ¹⁷ Al sebeyiin rija ma fara, kelimu ''Rabuna, hata al shayateen denger le anina fi isim taki.'' ¹⁸ Yesua kelimu le huwomon, ''Ana kan bi ayenu shetan bi waga min sama ze saga. ¹⁹ Ayenu, Ana wodi le itakum sulta ashan bi dusu debeba wa agariib, wa guwa fok le adu wa ma fi haja bi awugu itakum. ²⁰ fa keda ma takum afra bes, inu al aruwah bi denger le itakum, lakin afra ketir inu isim takum katibu fi sama.'' ²¹ Fi nefsu zaman huwo afra ketir fi al roho,wa kelimu, ''Ana mejido inta, Rabana abu ta sama wa ard, la anu inta dusu hajat del min fihim ta hakim wa zahir le del al huwomon beliteen, ze iyal sokeriin. Num, Abu, la nu huwo kan fara fi gidam taki. ²² Kulu hajat selimu le ana min abu tai, wa ma fi zol bi arufo al Ibin illa Abu, wa mafi zol bi arufo Abu illa al Ibin wa del al huwo iktaru ashan bi zahiru le huwomon.'' ²³ Bad dak huwo gelibu le talamiz wa kelimu le huwomon barwo, ''Baraka le del al huwomon ayenu hajat al itakum ayenu. ²⁴ Ana kelimu le itakum, anbia ketir wa muluk indu nia ashan bi ayenu hajat del, wa huwomon ma ayenu huwomon, wa ashan bi asuma hajat del al itakum bi asuma, wa huwomon ma asuma huwomon.'' ²⁵ Zol ta ganuun wogif fok ashan bi jeribu huwo, kelimu ''Mo alim, sunu ana bi amulu ashan bi ligo haya al abadiya?''' ²⁶ Yesus kelimu le huwo, ''Sunu yau katibu fi ganuun? Inta bi agara huwo kef?'' ²⁷ Huwo juabu wa huwo kelimu, ''Inta bi hibu, Rabuna Allah taki ma kulu gelba taki, ma kulu nefsa taki, ma kulu guwa taki, wa ma kulu fekira taki, wa jeraan taki ze nefsa taki, ²⁸ Yesus kelimu le huwo, ''Ita juabu saa. Amulu keda, wa ita bi ish.'' ²⁹ Lakin niya tuo ashan bi beriru nefsa tuo, kelimu le Yesua, ''Munu yau jeraan tai?'' ³⁰ Yesua juabu huwo wa kelimu, ''Zol tani kan bi ruwa min Uruselim le Ariha. Huwo waga fi nus ta haramiya, agella min huwo hajat tuo kulu, wa dugu huwo, wa sibu huwo bein haya wa mutu. ³¹ Bi sutfa abuna tani kan mashi bi sika dak, wa zaman huwo ayenu huwo, huwo ruwa bi sika tani. ³² Lawi kaman, zaman ja le mahal wa ayenu huwo, ruwa bi sika tani. ³³ Lakin Samiri, musafir, ja le mahal. Zaman huwo ayenu huwo, huwo kan hariik ma hiniya. ³⁴ Huwo ja le huwo wa masa jarah tuo, kubo zeit wa merisa fogo. Huwo arfa huwo fi himar tuo, wa jibu huwo fi mushtesfa, wa ayenu wara tuo. ³⁵ Yom al tani huwo shilo etnin denar, wa dafa le sidu mahal, wa kelimu, 'Ayenu wara tuo, wa aye haja al ita amulu ziyada, kan ana rija, ana bi dafa le ita. ³⁶ Yatu min talata ita bi fekir kan jeraan le huwo al waga fi nus ta haramiya?'' ³⁷ Huwo kelimu, ''Al wahid al beinu rahma le huwo. '' Yesua kelimu le huwo, ''ruwa wa amulu ze de.'' ³⁸ Ze ma huwomon kan musafiriin, huwo dakalu fi beled tani, wa mara tani isimu Martha rahibu huwo fi juwa ta hiya. ³⁹ Hiya indu ukut isimu Mariam, al geni fi kura ta Rabuna ashan bi asuma kelimat tuo. ⁴⁰ Lakin Martha kan moshkul ma jahizu akil. Hiya ja le Yesua wa kelimu, ''Rabuna, ita ma bi fekir ukut tai sibu ana barwo fi shokul? Ashan keda wori le hiya ashan bi sadu ana. '' ⁴¹ Lakin Rabuna juabu wa kelimu le hiya, ''Marthae , Martha, ita bi kafo wa zalan min hajat ketir, ⁴² lakin ''.bes wahid haja yau mohim. Mariam azilu haja al kwes, al ma bi shilu min hiya