¹ Hasa fi rajil isim tuo Hanania, ma mara tuo Safira, umun tebiyu gita min mumtalakat tumun, wa ² uwu nagisu juzu mi gurush al tebiyu ma uwu (mara tuo kaman arufu kalam de), wa jibu juzu ta gurush wa kutu gidam kura ta rusul. ³ Lakin Buturus kelim, ''Hanania, malu shitan mala geliba taki ashan kidibu le Roho al Kudus wa nagisu juzu min ser ta wata? ⁴ Zaman kan lisa ma tebiyu de, uwu kan ma taki, wa baat ma tebiyu, ma kan fi fi saitara taki? Kef ita fekir be haja de fi geliba taki? Ita ma kidibu le insan lakin le Allah' ⁵ Zaman uwu asuma kelimat de, Hanania wa ga tehet wa nefes akir nefes tuo, wa kuof dakalu fi kulu nas al asuma. ⁶ Shabab ja wa lifu uwu be gumash wa arfa uwu bara wa dufuno uwu. ⁷ Tegriben baat talata saat, mara tuo ja joua, ma arufu shunu hasil. ⁸ Buturus kelim le hiya, ''Weri le Ana kan itakun tebiyu wata de be taman de.'' Hiya wunuso, Ayi, be taman de.'' ⁹ Buturus kelim le hiya, ''Kef itakum tifagu sawa ashan bi jeribu Roho ta Rabana? Ayinu kuren ta nas al dufunu rajil taki yau de fi bab, wa umun bi arfa ita bara. ¹⁰ Tuwali uwu waga gidam kura ta Buturus wa nefes akir nefes tuo. Shabab de dakalu jua, umun ligu hiya mait, wa arafa uwu bara wa dofunu hiya jambu rajil tuo. ¹¹ Kuf azim dakalu fi kenisa kulu, wa le kulu nas al asuma hajat de. ¹² Ayat wa mujizat ketir hasil fi nus ta nas bewasat iden ta Rusul. Umun kan kulu sawa fi Haikal ta Siliman. ¹³ Lakin mafi zol tani indu shuja ashan bi duom le umun; lakin kan gi azimu umun ma shaab. ¹⁴ Wa mumminin ketir kan bi duom le Rabana, wa jamahir min rujal wa nuswan, ¹⁵ hata umun kan bi arfa nas al ayaneen fi sarayir wa feresh tumun, ashan kan Buturus gi mururu, dul tuo bi lemesu bat min umun. ¹⁶ Wa nas ketir bardu ja sawa min mudun al haul Urshelim, nas al ayaneen wa delin al indu roho al batal kan aliju. ¹⁷ Wa raise ta Kahana wa kulu nas al ma uwu, gum fuk (al umun ya mujumu ta Sadukien); wa umun mala be Gira ¹⁸ wa midu ida le Rusul, wa kutu umun fi sigin al Aam. ¹⁹ Lakin be bilel Malaika ta Rabana fataabwab ta sigin wa tala umun bara, wa kelim, ²⁰ ''Ruwa takum, wegif takum fi Kenisa wa wunuso takum le nas kulu kelimat ta haya de.'' ²¹ Zaman umun asuam kalam de, umun dakalu jua Kenisa gerib le nahar wa alimu. Lakin raise ta Kahana ja, ma nas al kan ma uwu, nadi majma ta kulu shiuk ta Israel sawa, wa rasul nas fi sigin kede rua jibu Rusul. ²² Lakin jesh al ruwa ma ligu umun fi sigin, wa umun rija wa weri kabara, ²³ ''Inna ligu sigin kufulu tamam wa huras wagifin fi bab, lakin zaman inna fata bab, inna ma ligu zol jua.'' ²⁴ Zaman Musuol ta jesh ta Kenisa ma raise ta Kahana asuma kelimat de, umun kan kafu shedid bekusus tumun wa lw haja al bi hasil. ²⁵ Wa zol tani ja wa weri le umun, ''Rujal al itakum kutu fi sigin umun wagifin fi Kenisa wa bi derisu nas.'' ²⁶ Baat kida Musuol ta jesh rua ma junud, wa rija umun wara, lakin bidun unf, ashan umun kafu nas mumkin jada umun be hujar. ²⁷ Zaman umun jibu umun kutu umun gidam ta majma. Raise ta kahana haggigu ma umun, ²⁸ kelim, ''Inna weri le itakum kede itakum ma derisu be isim de, lakin, itakum mala Urshelim ma talim takum, wa der jibu dum ta zol fi ras ta inna.'' ²⁹ Lakin Buturus wa rusul juabu, ''Inna lazim bi tii Allah aktar min nas. ³⁰ Illah ta abuhat ta nina guomu Yesua, al itakum katulu be aligu tuo fi kashab. ³¹ Allah Arfa uwu le yemin tuo ashan bi kun raise wa mukalis, ashan bi wedi tuoba le Israel, wa gufran ta kataya. ³² Inna shuhud ta hajat de, wa Roho al Kudus, al Allah wedi le delin al bi tii uwu.'' ³³ Zaman ada ta mejeles asuma kalam de, umun zalan wa der katulu Rusul. ³⁴ Lakin ferisi isim tuo Gamaliel, mualim ta namus, al kan bi ihtaramu be nas kulu, wegif fuk wa wedi awamir kede shilu rusul bara le zaman besit, ³⁵ Wa uwu kelim le umun, Rujal ta Israel, kutu takum bala kues le haja al itakum der amulu ma nas de. ³⁶ Ashan gubal kida, Sudas gum fuk wa zahiru badun, wa adad min rujal, ze urbumiya nadar, duom le uwu. Kan katulu uwu, wa kulu delin al kan bi tii uwu fertek wa ma wusul le haja. ³⁷ Baat rajil de, Yahuza al min Jelil zahir fi ayamat ta sejilu nas, wa juru bad min nas wara tuo. Uwu brdu mutu, wa kulu delin al kan bi tii uwu fertek. ³⁸ Hasa Ana bi kelim le itakum, wasa takum min nas de wa sibu takum umun baraw, ashan kan kuta wa shukul de min nas, bi fashil. ³⁹ Lakin kan min Allah, itakum ma bi agder bi gilibu umun; wa itakum bi ligu nufus takum bi shakila did Allah.'' Umun iktene. ⁴⁰ Baat kida umun nadi Rusul jua wa jeledu umun wa amiru umun kede ma wunuso be isim ta Yesua, wa sibu umun ruwa. ⁴¹ Umun tala min majma farhanin inu hasibu umun mustahigin ashan bi ligu taab fi sism tuo. ⁴² Wa umun kan bi istemir kulu yom, fi Kenisa, bait le bait, umun kan be istimrar bi derisu wa beshiru be Yesua al Messih.