¹ Ze Buturus wa Yuhana kan gi wunuso le nas, kahana wa gaid ta asakir ta Kenisa Sadukin ja le umun. ² Umun kan ma Murtahin ashan Buturus wa Yuhana kan gi derisu nas wa bi beshiru fi Yesua be giyama ta amuat. ³ Umun gubudu umun wa kutu umun fi sigin lakadi saba, ashan zaman dat kan asiya. ⁴ Lakin ketirin min nas al asuma risala de amin; wa adatta nas al amin kan tegriben kamsa alif. ⁵ Wa hasil fi yam al tani inu hukam tumun, shiyuk wa kataba limu sawa fi Urshelim. ⁶ Hannan al kahin kan fi hinak, wa Giyafa, wa Yuhana, wa Alexander, awa kulu delin al kan ahal ta kahin al kebir. ⁷ Zaman umun jibu Buturus wa Yuhana fi nus tumun, umun asalu umun, ''Be yatu gowa, wele yatu isim, itakum amulu de?'' ⁸ Twali Buturus, mala be Roho al Kudus, uwu wunuso le umun, ''Itakum hukam ta nas, wa shiuk, ⁹ kan yom de biga bi asalu be kusus haja kues amulu le zol al ayan - be yatu teriga al zol de tala kues? ¹⁰ Kede kalam de kun maruf le itakum wa le nas ta Israel kulu, inu be isim ta Yesua al Messih al Nasiri, al itakum selibu, Allah guomu min mutu- yau be isim tuo rajil de wegif hini be saha kues gidam takum. ¹¹ Yesua al Messih yau hajer al itakum ze banien alisu lakin uwu yau biga hajer al zawiya. ¹² Mafi kulsa fi ayi zol tani, ashan mafi isim tani tehid sama al wedi le nas al inna bi ageder ligu kulasa be wasat tuo.'' ¹³ Zaman umun ayinu le shuja ta Buturus ma Yuhana, umun lahisu inu umun kan nas adien, rujal ma mutaalimin, umun istagrab, umun ja aruf inu Buturus wa Yuhana kan ma Yesua. ¹⁴ Ashan umun ayinu rajil al aliju de gi wegif ma umun, umun ma indu ayi haja did kalam de. ¹⁵ Lakin baat ma umun wedi awamir le rusul ashan kede sibu ijtima ta mejeles, umun wunuso ma badon tumun. ¹⁶ Umnu kelim, '' Inna bi amulu shunu le nas de? Ashan de hagiga inu mujiza al wadih amulu be wasat tumun maruf le ayi zol al ge geni fi Urshelim; Inna ma bi agder anguru. ¹⁷ Lakin ashan ma bi wazau ketir fi nus ta nas, kede inna anziru umun kede ma wunuso le ayi zol be isim de.'' ¹⁸ Umun nadi Buturus wa Yuhana wa hadidu umun kede ma wunuso ta kulu kulu wele derisube isim ta Yesua. ¹⁹ Lakin Buturus wa Yuhana juwabu wa kelim le umun, ''Kan de hagiga fi Ena ta Allah ashan bi tii itakum aktar min uwu, kede itakum hajinu. ²⁰ Inna ma bi ageder wegifu wunuso an hajat al inna ayinu wa asuma.'' ²¹ Baat ma umun hadidu Buturus wa Yuhana, umun sibu umun ruwa. Umun kan ma ageder ligu ayi uzur ashan be wedi le umun uguba, ashan nas kulu kan bi sabihu Allah le haja al amulu. ²² Rajil al iktebir mujiza ta shifa umur tuo kan aktar min arbain sena. ²³ Zaman fiku umun hur, Buturs wa Yuhana ja le nas tumun wa weri kulu hajat al rais ta kahana wa shiuk kelim le umun. ²⁴ Wekid umun asuma kalam de, umun arfa sout tumun saw le Allah wa kelim, ''Rabana, Ita kalagu samawat wa arth wa bahar, wa kulu hajat al fugu. ²⁵ Ita wunuso be Roho al Kudus be wasat ta kasma ta kadam taki, abu ta nina Daoud, 'Le Umamin kafu, wa nas fekir fi hajat al ma indu faida?' ²⁶ Ita kelim, 'Muluk ta arth limu badum sawa, wa ruasa limu sawa did Rabana, wa Messih tuo.' ²⁷ Hagigaten, Hirudus wa Bilatus al bunty, sawa ma umamin wa nas ta Israel, limu sawa fi medina did Kadam taki al Kudus Yesua, al ita masaua. ²⁸ Umun limu sawa ashan bi amulu kulu haja al iden wa kuta taki kariru min bediri ashan bi hasil. ²⁹ Hasa, ya Rabana, ayinu le tahdidat tumun wa wedi le kudam taki ashan bi wunuso kalam taki be shuja. ³⁰ Midu Ida taki le shifa, wa kede ajaib wa mijizat hasil be isim ta kadam taki al mukadas Yesua.'' ³¹ Zaman umun kalasu salawat, makan al umun kan limu sawa fugu hizu, wa umun kulu mala be Roho al Kudus wa umun wunuso kalam ta Allah be shuja. ³² Adat kebir ta nas al amin kan indu geliba wahid wa nefsa wahid. Mafi zol al bi kelim inu ayi haj al uwu indu de ta tuo baraw, lakin umun kan bi shariku kulu haja. ³³ Be gowa azim rusul kan bi alinu shihada tumun an giyama ta Rabana Yesua, wa naima azim kan le umun kulu. ³⁴ Mafi zol al fi nus tumun kan muhtaj ayi haja, ashan kulu delin al indu biyut wa mahal zira umun tebiyu umu wa jubu gurush ta hajat al kan tebiyu ³⁵ wa kutu gidam ta kura ta rusul wa kan gesimu le kulu zol be hasab ihtiyaj tumun. ³⁶ Yusuf, al Lawi, zol min Gubrus al rusul gi nadi isim tuo Barnaba (al mana tuo Ibni al waz), ³⁷ tebiyu wata tuo wa jibu gurush wa kutu gidam kura ta rusul.