¹ Kida Agribbas kelim le Bulis,"Ita kede wonusu le nefsak." Biga Bulis arfa iden tou fok wa difa nefsa tou. ² "Ana bi iktabir nefsa tai ze moksut, Melik Agribbas, le amulu gedia tai gidam ita alela dit kulu al tohumat ta al Yahudin; ³ belkas, ashan ita mutkasis fi kulu adaat wa suaalat ta al Yahud. Be kida ana gi asalu ita le asma ana be subur. ⁴ Hagiga, kulu al Yahudin aruf kef Ana gi iis min sababia tai fi beled tai wa fi Urshelim. ⁵ Umon arufu ana min al bidaya wa umon kede akid gali Ana iis ze al Fharisee, al hizib mutsedid ta din ta nina. ⁶ Hasa Ana wogif ini le hukum ashan Ana ayinu le al waad al Allah amulu le abuhat ta nina. ⁷ De yau al waad itnasar gabail ta nina indu raja fogo ze umon jadiin abidu Allah bilel wa nahar. De yau le raja de, Melik Agribbas, gali al Yahudin tahamu ana. ⁸ Le bes ayi wahid min itakum gi fekir inu ma bi amin gali Allah bi gaoma al mait? ⁹ Zamaan Ana fekir le nefsi gali Ana bi amulu hajat ketir dit isim ta Yesua al Nasiri. ¹⁰ Ana amulu del fi Urshelim. Ana bufulu ketir min al mominin fi sigin be al sulta Ana akudu min al rais kahana, wa zaman umumon kan katulu, Ana jada sot tai dit umon. ¹¹ Ana agibu umon ketir marat fi kulu al majame wa Ana hawil le jabiru umon le batal. Ana kan tekeyan shedid dit umon wa Ana azibu umon hata le beled tani. ¹² Ze ma Ana kan gi amulu zede, Ana rua le Dimask ma sulta wa taalimat min rais kahana; ¹³ wa inak fi sika, be nahar, Melik, Ana ayinu nur min sama al kan abiat min al semis wa wala hawuli kulu min ana wa al rujal al kan musafrin ma ana. ¹⁴ Zaman nina kulu waga le al wata, Ana asma al sort wonusu le ana be luga Ibiria gali, 'Saul,Saul, le ita gi azibu Ana? Uwo sab le ita le ashan salutu haja al senin. ¹⁵ Biga Ana kelim, 'Ita yau munu, Said?' Rabana juabu, 'Ana yau Yesua al ita azibu. ¹⁶ Hasa gum fok wa wogif ma kurayin taki; ashan le sabab de Ana zahir le ita, le iktaru ita le yikun al kadam wa al shahid an al hajat al ita aruf an ana hasa wa hajat al Ana bi wori le ita badyin; ¹⁷ wa Ana bi ankisu ita min al sab wa min al Umamien al umon Ana rasulu ita, ¹⁸ le fata uyun tomon wa le gilibu umon min duluma le nur wa min al guwa ta Sitan le Allah, kida yau umon bi akudu min Allah al gufran ta katiat wa al worisa al Ana wodi le umon al kalas nedifu be iman fi ana.' ¹⁹ Lezalik, Melik Agribbas, Ana ma bi aba tii roiya min sama; ²⁰ lakin, le delin fi Dimask awel, wa biga le Urshelim, wa abri kulu al beled ta Yahudia, wa kaman le al Umamien, Ana wodi umon al risala gali umon kede tub wa rija le Allah, amulu amail bi istahik le tauba. ²¹ Le sabab de al Yahudin gobudu ana fi al haikal wa hawil le katulu ana. ²² Allah kan saydu ana lakadi hasa, kida Ana wogif wa sahidu le nas al adiin wa le al uzama an wele haja aktar min sunu al abia wa Musa kelim bi hasil; ²³ gali Mesih lazim bi taabu, wa gali uwo bi kun al awel min al giama ta al maitin del bi gum wa bi ainu nur le nas Yahud wa le al Umamien." ²⁴ Ze Bulis kalasu difa tou, Festus kelim ma sot kebir, ''Bulis, ita mojunun; taalim taki ketir de amulu ita mojunun." ²⁵ Lakin Bulis kelim, "Ana ma mojunun, al akbar Festus; lakin ma suja Ana gi wonusu al hak wa nesia. ²⁶ Li anu al Melik aruf an hajat del; wa kida, Ana gi wonusu be huria le uwo, li anu Ana muktene gali mafi kalam zede bi dusu min uwo; li anu de kan ma amulu fi mahal al dusu. ²⁷ Hal ita amin be al ambia, Melik Agribbas? Ana aruf gali ita amin." ²⁸ Agribbas kelim le Bulis, " Fi zaman guser ita bi agder agnau ana wa geru ana le Mesihia?" ²⁹ Bulis kelim, " Ana bi seli le Allah, gali kan fi zaman guser wele zaman towil, ma ita barau, lakin kaman kulu al gi asma ana alela, bi kun ze ana, lakin ma be genzir ta sigin de." ³⁰ Biga al melik wogif fok, wa al hakim, wa Bernice kaman, wa delin al kan gaidin ma umon; ³¹ zaman umon sibu al ga, umon wonusu le badun tomon wa kelim, "Rajil de ma amulu haja istahik al mut au rubat." ³² Agribbas kelim le Festus, "Rajil de kan bi fiku iza uwo kan ma gedim le Kaesar."