¹ Zaman kan kariru gali nina kalas kede safir le Italia, umon kutu Bulis wa juzu min mosjunin tanin te musulia ta kait al mia ismu Julius min al ketiba ta jes min Italia. ² Nina arkab sefina min Adramyttium, al kan azu safir abri bahar ta Asia. Kida nina rua le bahar. Aristarchus min Thessalonica fi Macedonia rua ma nina. ³ Yom nimra itniin nina nezil fi medina ta Sidon, inak Julius itaamal ma Bulis kuwes wa asma le uwo kede rua le asdika tou le akudu ihtimam min umon. ⁴ Min inak nina rua le bahar wa safir be wasat ta jezira ta Kubrus, gerib le al jezira, ashan al hawa kan dit anina. ⁵ Biga nina kalas safir abri al bahar wa kan gerib ma al mina ta Silica wa Bambhylia, nina nezil fi Myra, medina ta Lycia. ⁶ Inak, al dabit ligo sefina min Iskandaria al kan gi safir le Italia. Uwo kutu nina fogo. ⁷ Zaman nina kan safir bira le ayom ketir wa kan akiran wosulu ma taab gerib Snidus, al hawa ma agder sibu nina le rua sika dak, kida nina safir be wasat tija al kuwes ta Krete, be gidam Salmone. ⁸ Nina safir be wasat al difa ma sobat, lakadi nina ja le mahal tani ismu Sama Naziha, al uwo gerib ma medina ta Lasea. ⁹ Nina kan ma silu zaman ketir, al zaman siam ta al Yahud kaman kan futu, wa kan biga katar le safar. Bulis anziru umon kida, ¹⁰ wa kelim, "Ya rujal, Ana ayinu gal al mamoria nina al nina der rua fogo bi kun ma moaugat wa kasara shedid, ma bes le al sendel wa sefina, lakin kaman le haya tanina." ¹¹ Lakin al dabit kan kutu bal aktar le al said al mosaul wa sidi al sefina min kalamat de kulu al kan wonusu ma Buluis. ¹² Ashan al safar fi bahar kan ma sahil le gedi karanga fogo, ketir ta al musafirin arsidu le safar min inak, iza ma ayi teriga nina kede wosulu le medina ta Bhonix, le gedi al karanga inak. Bhonix uwo mina fi Krete, wa uwo gidam samalserik wa junubserik. ¹³ Zaman al hawa min junub bada hubu bira, al musafirin fekir gali umon indu sunu al umon deru. Kida umon juru dugara wa safir abri Krete, gerib le al difa. ¹⁴ Lakin bat zaman guser hawa ta guwa harricane, gi nadi al sumalsergia, bada dugu tehet min al jezira. ¹⁵ Zaman al sefina kan gobudu ma amuaj wa ma bi agder kalas rua le al hawa, nina kan sibu sika le al morj wa kan sugu ma al hawa. ¹⁶ Nina rua abri mahal kuwes ta jezira suker ismu Kauda, wa ma tab nina agder le ankisu al haya ¹⁷ Zaman umon kan arfa sefina haya fok, umon istagdimu hubal tou le rubutu gisim ta sefina. Umon kan kaifin gali umon kalas jere fi mahal guser ta Syrtis, kida umon nezilu dugara ta bahar wa kan sugu ma hawa. ¹⁸ Nina istemir be tab zede al moj hata yom ninra itniin umon bada jadau hajat al fi sedel bara. ¹⁹ Fi yom nimra talata al musafirin jada hajat ta sefina bara ma idenat tomon. ²⁰ Zaman al semis wa nujum biga ma gi wala le nina ayom ketir, wa al moj kebir lisa gi dugu fogo nina, ayi raja aktar gali nina kalas bi ankisu kan sibu. ²¹ Zaman umon kan geni aktar bidun akil, biga Bulis wogif fok fi nus ta al musafirin wa kelim , "Rujal, itakum kan bi asma le ana, wa ma gum safir min Krete, kan kida ma ja ligo awaja wa kasara. ²² Hasa Ana gi seja itakum le silu suja, ma gi rua kun fukdan ta haya fi nus takun, lakin bes le fugdan ta al sefina. ²³ Lianu bilel umbari malaika ta Allah al Ana tabi le uwo, Ana kaman gi abidu uwo_malaika tou wogif jambu ²⁴ ana wa kelim, 'Mata geni be kafu, Bulis. Ita lazim bi wogif gowi gidam Kaesar, wa ayinu, Allah fi kuwes tou kalas wodi le ita kulu delin al musafirin ma ita.' ²⁵ Ashan kida kelik rajil! , farhan Ana bi sik Allah gali bi hasil bes ze kan wori le ana. ²⁶ Lakin nina lazim gi rua wosulu le jezira tani." ²⁷ Zaman kan wosulu arbatasr yom, ze nina kan rua fi sika de wa gali fi al bahar Adriatic, gerib bilel al musafirin fekir gali umon kan wosulu fi mahal tani. ²⁸ Umon silu metir wa jerbu wa ligo isirin amtar; bat fetera guser, umon silu amtar ketir wa ligo kamis tasasar amtar. ²⁹ Umon kan kaifin gali nina bi sedimu fi hajer, biga umon nezilu arba dugarat min al wara wa seli gali saba kede ja guam. ³⁰ Al musafirin kan gi ayinu le teriga le sibu al sefina wa kan nezilu murkab ta ankisu haya fi jua al bahar, wa mesil gali umon gi rua jada al dugarat tehet min al kos. ³¹ Lakin Bulis kelim le al dabit wa le asakir, "Ille kan rujal del geni fi al sefina, ita mabi kun hai." ³² Biga al asakir gata hubal ta murkab wa sibu kede silu bara ma moyo. ³³ Zaman wata gi tala nahar, Bulis asalu umon kulu kede akulu akil. Uwo kelim, "De hasa arba tasar yom al itakum istena wa ma akulu; itakum ma akulu ayi haja. ³⁴ Ashan kida Ana gi asalu itakum le sariku akil tani, lianu uwo mohim le itakum ashan bi iss. Mafi wahid min itakum bi woduru hata sar min ras tou." ³⁵ Zaman uwo kan kelim zede, uwo silu ess wa uwo shukuru Allah fi uyon ta kulu wahid. Biga uwo kasuru al ess wa bada akulu. ³⁶ Biga umon kan kulu itsega wa umon akulu akil. ³⁷ Nina kan 276 nas fi al sefina. ³⁸ Zaman umon kalas akulu kifaya, umon kafifu sefina ma jadau bara sualat ta geme/dura fi jua al bahar. ³⁹ Zaman kan wata nahar, umon ma agder aruf de yatu wata, lakin umon aiynu bahar tani fogo al jezira, wa umon biga wonusu kan umon bi agder sugu al sefina fogo. ⁴⁰ Kida umon gata wa fiko al dugarat wa sibu fi al bahar. Fi nefsa zaman umon fiku al hubal ta al ladarat wa arfa al gumas le hawa; wa kida umon rua le al jezira. ⁴¹ Lakin al sefina sedimu rumla wa jere fi wata. Al murkab kan lesegu inak wa fadulu sabid, wa al wara tou kan kasuru ma gua ta moj. ⁴² Al asakir kan katitu le katulu al mosjunin ashan gali kede wahid min umon ma hawil humu bara wa zuk. ⁴³ Lakin al dabit der ankisu Bulis, kida uwo wogifu kuta tomon; wa uwo amiru delin al bi agder humu le nutu bara awel wa rua le wata. ⁴⁴ Yela al bagi nas bi rua, juzu fok lohat, wa juzu fok hajat tanin min al sefina. Be teriga de nina kan kulu agder ja kuwes le wata.