¹ Hasa, Festus dakalu le Wolaia, wa bat talata ayom, uwo rua le Kaesarea lakadi Urshelim. ² Al rais al kahana wa al Yahudin al marufin jibu tohumat dit Bulis, wa umon talabu uwo ³ wa asaslu uwo le rudu al bi kutu Bulis fi kutura gali kede Festus kede nadi Bulis le Urshelim kida gali umon bi katulu uwo fi sika. ⁴ Lakin Festus juabu gali Bulis kan mosjun fi Kaesarea, wa gali uwo nefsa tou kan grib rija le inak. ⁵ "Lezalik, del al bi akder,"uwo kelim,"kede rua inak ma umon. Iza inak fi haja tani batal le rajil de, itakum bi taamu uwo." ⁶ Festus geni ma aktar min tamania au asara ayom wa biga uwo ua lakadi Kaesarea, wa fi yom nimra itiniin uwo geni fi kursi ta hukum wa nadi Bulis kede jibu le uwo. ⁷ Zaman uwo wosulu, al Yahudin min Urshelim wogifin grrib, wa umon jibu tohumat ketir al katar al um zadu ma bi azbto. ⁸ Bulis difa nefsa tou wa kelim,"Ana ma amulu haja batal dit al ganun ta al Yahudin au dit al haikal au dit Kaesar." ⁹ Lakin Festus der ligo rida ta al Yahudin, wa uwo juabu Bulis kida wa kelim, "Ita der rua lakadi le Urshelim wa ana bi hukumu an hajat de inak?" ¹⁰ Bulis kelim, " Ana wagif gidam korsi ta hukum ta Kaesar mahal al Ana lazim bi hukumu. Ana ma amulu galat le Yahudin, bes ze ita kaman bi aruf kuwes. ¹¹ Hata lu Ana kalas amulu galat wa iza Ana kalas amulu sunu al bi istahik al mut, Ana ma bi aba le mutu. Lakin iza tohumat tomon wele haja, mafi wahid bi selim ana le umon. Ana bi gedim le Kaesar." ¹² Bat Festus wonusu ma al mejles, uwo juabu, " Ita kalas gedimu le Kaesar. Le Kaesar ita bi rua!" ¹³ Hasa bat ayom besid, Melik Agribbas wa Bernice wosulu le Kaesarea le ziara resmia le Festus. ¹⁴ Bat uwo kan inak le ayom ketir, Festus gedimu gedia ta Bulis le jalalat al melik; uwo kelim, "Fi rajil tani kan sibu wara ini ma Felix ze mosjun. ¹⁵ Zaman Ana kan fi Urshelim, al rais al kahana wa shiuk ta al Yahudin jibu tuham dit al rajil de le ana, wa umon talabu le al hukum ta tedmir dit uwo. ¹⁶ Ana juabu umon gali de ma kan sakafa ta al Romanien le selimu ayi wahid gabli uwo wajihu al mustakien tou wa indu fursa le difa nefsa tou dit al toham. ¹⁷ Lezalik, zaman umon ja sawa ini, Ana ma istena, lakin fi yom nimra itiniin Ana geni fi kursi ta hukum wa ana talabu al rajil de kede jibu jua. ¹⁸ Zaman al mustakien wogif fok wa tahamu uwo, Ana fekir gali wele wahid min al tuham al umon jibu dit uwo kan katir. ¹⁹ Aslan, umon indu nikas tani ma uwo an din tomon wa an Yesua tani al kan mat, al Bulis gi kelim gali uwo hai. ²⁰ Ana kan ma bi akder kef bi hagigu modu de, wa kida Ana asalu uwo iza uwo kan bi rudu rua le Urshelim ashan bi rua hukumo inak an tuham del. ²¹ Lakin zaman Bulis gedim kede hafisu tehet harasa zema gi istena le karar ta al imbrator, Ana amiru uwo kede geni fi hirasa lakadi Ana ja rasulu uwo le Kaesar." ²² Agribbas wonusu le Festus, "Ana der kaman asma le rajil de." "Bukura," Festus kelim, "ita bi asma uwo." ²³ Kida fi yom nimra itniin, Agribbas wa Bernice ja ma muzika shedid; umon ja le jua al gaa ma la dubat ta jes wa ma rujal al marufin ta al medina. Zaman Festus wonusu al amur, jibu Bulis le umon. ²⁴ Festus kelim,"Melik Agribbas, wa kulu itakum rujal al ini ma nina, itakum ayinu rajil de; kulu al jamahur ta Yahudin sawiru ma ana fi Urshelim wa ini kaman , wa umon kore le ana gali kede uwo ma geni hai. ²⁵ Ana ja aruf gali uwo ma amulu haja al bi isahik al mut; lakin ashan uwo gedimu le Imbrator, Ana kariru rasulu uwo. ²⁶ Lakin Ana ma indi haja wadi katibu le al imbrator. Le sabab de, Ana kalas jibu uwo le itakum, belkas le ita, Melik Agribbas, kida ashan ana bi kun indi haja aktar le katibu an gedia de. ²⁷ Lianu uwo ma sah wa aklagi le ana le rasulu mosjun wa le kaman ma zekiru al tuhumat dit uwo"