¹ Katalipo nakamo akakwilongela we mundu, we ukulonga. Napo ube weweni musyo ukumulonga umunyako ukwikolesya we mwene. ² Bububu potumenye ukuti ubulongi bwa Chala bukutalusya bu kubandula bobakuyugha sisisi. ³ We mundu wekubalonga bobakubomba sisisi, Kali ukwinong'ona ukuti tise upone kubulongi bwa Chala bonuwe ukubomba sisisyo? ⁴ Ndisi ukubusyokela ubwingi bwa bololo bwake nukufifa ilyoyo, napo ukuti nakuhobokela bwile? ukumanya ukuti ubololo bwa Chala bukukutuma uwe kulupinduko? ⁵ Pa chifukwa cha ndumbula ingafu iyisita kupindukwa po bukwisa kuboneka ubulongi ubugholofu bwa Chala. ⁶ Weyo tise amupe amalipilo umundu wesi ukuyana nimbombo syake. ⁷ Kubo bakufifa ilyoyo mumbombo inyisa ukulonda ubwasongo, ubwa pamwanya, nukusita ukufwa, nisya kubapa ubumi ubusita kumala. ⁸ Abene batakwandana, bobakukana isya naloli, loli bakusitika syo sya bunyongane,aba bobo tibakambilile ubukalale nu bukali. ⁹ Tibukabeko ubutolwe bwa kongana kongana ku mundu wesi yo akubomba imbibi umuyuda tasi ingapise umu Griki. ¹⁰ Loli tibukabeko ubukulu nulutenganio kumundu wesi yo akubomba inyisa, kumuyuda tasi inga pise umu Griki. ¹¹ Nama uChala atakusalila umundu mubundu bwake. ¹² Pakuti bosi bo bakutula inongwa bobo batenasyo indaghilo sona bosi bo bakutula inongwa bobali nasyo indaghilo tibakalongiwe momundaghilo. ¹³ Nama tebagholofu kwa Chala, aba bakafwa ko kifwa indaghilo loli bo bakusikonga indaghilo bobo tise bayughiwe bagholoke. ¹⁴ Nama abapanja aba bate nasyo indaghilo bakukonga isya mundaghilo, bobatasimenye bakwipela boba ndaghilo babo, napo batenasyo indaghilo. ¹⁵ Abene bakwilangisya bubu ukuti imbombo sya ndaghilo sisimbiwe mundumbula syabo po umabyebye wabo akubasinikiska, ninyinong'ono syabo sikulongana pamo sikunoghelesya sisyo syene. ¹⁶ Pisiku lililyo ukuyana ninongwa inyisa isi ngufumusya, uChala tise akalongelenisya kubufifamu isya bandu ukwendela mwa Yesu kilisiti. ¹⁷ Loli linga ukwiyaghania wemwene ukuti we muyuda, ukusubila syo syandaghilo, ukwikalilakalila mo mwachala, ¹⁸ Ubumenye ubwighane bwake ukulingania inyisa ni mbibi chifukwa umanyisiwe mo mundaghilo. ¹⁹ Ukwibona wemwene ukuya wemulongosi wa bafwa maso we bwelu bwa bamungisi. ²⁰ We mumanyisi wa bana, we mundaghilo usibwene mo sibelile isya bumanyi isya naloli. ²¹ Uwe we ukumanyisya nuyungi,pochoni utakwimanyisya wemwene? uwebukulumbilila ukuti manye twibe po choni nuwe ukwiba? ²² We ukuti manye tuhule po sona nuwe ukuhula? We ufingite ififwani po sona nuwe ukunyamula munyumba ya Chala? ²³ We ukwitufya mundaghilo po choni ukumuhelula uChala po ukukilania indaghilo? ²⁴ Nama lisimbiwe lyo likuti ilita lya Chala likuheluliwa naba panja chifukwa chinu. ²⁵ Nama ukwelusiwa bo bwisa ubu linga ukukonga indaghilo pobo ukwelusiwa kwako kukwipela kusita kwelusiwa. ²⁶ Po linga umusita kwelusiwa akusikonga syo silaghiwe mundaghilo kamukwelusiwa kwake kungisa kuyughiwe komkwelusiwa? ²⁷ Loli popo umundu uyu atakaba wakwelusiwa ukufuma pa bwandilo, loli akusikonga indaghilo ti akakulonge we uli namasimbo nukwelusiwa loli ukusikilania indaghilo. ²⁸ Nama atangaba mu Yuda yo linga mu Yuda kunyuma bubu, sona kutangabako kwelusiwa ko kuli kunyuma bubu hagha. ²⁹ Loli yo linga mu Yuda mukati bo mu Yuda naloli sona ukwelusiwa kwa naloli kwa mundumbula kwa mwa mbepo te bwa mumasimbo mundu yuyu bo ubughindikiwa bukufuma mubandu loli lukufuma kwa Chala.