¹ Loli utwe twetwe bakafu mundumbula fikuti tubatuleghe bo bonywa ukunyamula ubonywa bwabo,tutakihowosye twebene. ² Loli twebosi weka na weka fikuti tubahowosye abanyitu, ukuti babwaghe ubwisa uku basekiweghe. ³ Nama wepe ukilisiti atakihowosya mwene,loli bo lyo lisimbiwe ukuti "Amahelu ghobakuhelula uwe,gho ghangwilile une. ⁴ Loli syosi syo sya simbiwe kale mumasimbo syo sya simbiwe luye love lumanyisko ku kwitu, ukuti tuye nulusubilo mubufisa lyoyo nu lusubisyo lwa mumasimbo ghaghagha. ⁵ Umwene loli uChala umwene nabo ubufisa lyoyo abwkusubisya yo abape inyinong'ono syoka mwebene bene,bo nukukonga akakutesekesyamo mwa Yesu kilisiti. ⁶ Ukuti mwebosi poka mumutufyeghe indumbula yoka,numulomo ghoka uChala wa Malafyale witu Yesu kilisiti. ⁷ Po lelo pa chifukwa bukulu bwa Chala po mupokelelane mwebene po wepe ukilisiti abapokelite umwe. ⁸ Popo nguyugha une nguti ukubusisimikisya ubwa naloli bwa Chala , ukilisiti akipela we bubombeli bwa kufifiwa, ukuti asimalisye ifingo syo bapeghiwe abatata. ⁹ Kokuti abapanja bamwimikeghe uChala pa chifukwa cha chisa chake samo lisimbiwe ili likuti, "syosyo ngukutufya uwe mubanja,sona ngukwimbila uwe." ¹⁰ Lisimbiwe Sona likuti, "musekeleghe mwebapanja poka nabandu ba Chala"! ¹¹ Sona likuti, "mumupale Umalafyale mwe bosi mwe bapanja." Mupale mwebandu mwebosi. ¹² Sona wepe u Yesaya akuyugha akuti, "Yo we lusamba lwa mwa yese,tise akabengeko,yotise anyamukeghe pa kulaghila abapanja: mumwake mo abapanja tise basubileghe. ¹³ Umwene loli uChala umwene lusubilo yo abisusye umwe nulusekelo losi sona nulutengano mulwitiko lo muli nalo mumwake: Po ukuti mumaka gha mbepo umuswepu ulusubilo lwinu lubukilile ukukula. ¹⁴ Mwe banyitu,nune menye bubu mwiswile nubwisa,mwiswile nubumanyi bosi,mumenye ukusokana mwebene. ¹⁵ Loli mwa kalata uyu nemukifu ukubasimbila amaghagha, ukuti mbakumbusye,Ngibite bubu,pa chifukwa cha chisa cha Chala cho ambile une. ¹⁶ Ukuti imbe mubombi wa Yesu kilisiti kubapanja, akumubombela uChala ngat muputi, ngufumusya amasyu amisa:ko kuti abapanja babe likemo ilyisa lyo lisukiwenu mbepo umwisa. ¹⁷ Mwa Yesu kilisiti une loli indinasyo isya kuyughilamo mumbombo ya Chala. ¹⁸ Po tise imbe mukifu pa kuyugha simo isingi,loli syene syo u kilisiti abombite mumwangu ukubapelela abapanja ukukwifwa amasyu na mumbombo. ¹⁹ Mumaka gha mufika nifisigho na mumaka mbepo umuswepu: Chobene mumalisisye bubu ukulumbilila amasyu amisa gha kilisiti ukufuma mukaya ka Yelusalemu na mufisu fya mumbali nukufika na ku chisu cha Iriliki. ²⁰ Po ngwiyula ukulumbilila amasyu amisa,moma mo ukilisiti atalitite ukuyugha, ukuti ndeke ukusenga po yumo andipo ukusenga. ²¹ Loli bo po lisimbiwe ukuti, "Bo batabusiwemo lumo amasyu tisebasibone bope nabo bakusipuli tise basibonaghe bope nabo batifwilemo lumo tise bifweghe. ²² Chobene nanyokelegha kabilikabili ukwisa kukwinyu. ²³ Ipano loli po naghite malisye imbombo yangu mufisu fyosi fififi, sona nanyenywa ifinja fyofingi ukwisa kukwinyu. ²⁴ Ngusukwendagha mumwinu bo ngukinda ukubuka ku chisu cha Speni: Nama ngusubila ukubatesya po ngukinda, nukuti ise munyamusyeghe po ngubuka kuko,bo twangile tubukite. ²⁵ Loli ipano nyamukite ukubuka ku Yelusalemu, ngubabombela aswepu. ²⁶ Nama abaku Makedonia, aba ku Akaya sibahowosisye, ukupangula fimo ifya kubapa abapotwe mubikemo ba kaya ka Yelusalemu. ²⁷ Nama syabahowosisye sona bipelite ukuya bakumeleliwa kukwabo, nama linga abapanja bakulilana nabo isya mwa mbepo, po bipelite bakumeleliwa bakubabombela Fyope night mumubili. ²⁸ Lole ponjile nasimalisya sisisi, bo bambile mubwisa munyobe iseke sisisi,po ngusukwendagha mumwinu ukubuka ku chisu cha Sipeni. ²⁹ Loli menye ukuti po kwisa ku kwinu,tise nisile mulusayo lwa kilisiti losi mo luyilile. ³⁰ Mwe banyitu,ngubapyelekesya mu Malafyale Yesu kilisiti na mulughano lwa mbepo, nguti, Ndumbula ya lughano muye poka nune mulwiputo ulwakunyiputila kwa Chala. ³¹ Ukuti mbokiweghe ku bo bakufuya aba chisu cha Yudayi: nukuti imbombo yangu yo ngubukila mu Yelusalemu yikitisiwe na bikemo. ³² Popo lelo mubwighane bwa Chala isifike kukwinu nulusekelo,ise howokeghe ukwangala numwe. ³³ Umwene loli uChala umwene lutengano,yo aye numwe mwebosi Ameni.