¹ Wagha yo monywa ulwitiko yo mumwambilile: koma ukukaningana nawe pa syo akwinong'ona umwe. ² Yumo mulwitiko lyake akulya fyosi bubu,uyungi mubonywa bwake akulya yene yo nyani ya mami. ³ Umwene yo akulya ya manye a musyokele yo atakulya,loli wepe yo akulya manye amulonge yo akulya,bo uChala amupokelite umwene. ⁴ Weni yo atighi amulonge umubombi uyungi? napo akwimilila pamo akuwa,syosi sili momwamalafyale wake: loli tise imilike papo umalafyale yo amenye ukumupelela ukwimilila. ⁵ Yumo akulyimika isiku lumo ukukinda ilingi, uyungi akughimika amasiku ghosi akuti ghayanite bubu; fikuti umundu wesi simukole nyani munyinong'ono syake yuyo. ⁶ Yo linga ikulyimika isiku yo akumwimika we malafyale: nayo akulya yo akulila momwa Malafyale,po akawa ulupi kwa Chala,umwene yo atakulya yo akuleka ukulya momumalafyale wepe akuwa ulupi kwa Chala. ⁷ Po ataliko nayumo mumwitu yo ubumi bwake mwene,sona ataliko nayumo yo akwifwila mwene. ⁸ Nama po tuli kubumi napo tukufwa tuli ba yo Malafyale. ⁹ Nama syosyo ukilisiti afwile nukuba mumi, ukuti aye Malafyale wa bafwe na bumi. ¹⁰ Loli umwe choni cho mukumulonga umunyinu? nuwe wemunine choni cho ukusyokela umunyako? Po twebosi mubelile tukuya pa kwimilila pandasi pa chitengo cha bulongi bwa chala. ¹¹ Nama lisimbiwe ilya kuti "Umalafyale akuti bwile bondiko abandu tise bafughame pandasi papangu,po mundu wesi tise a njughe une ukuti ne Chala. ¹² Popo lelo twebosi bubu motubelile,titukiyughe kwa chala uyu isyake uyu iskake. ¹³ Popo lelo tuleke ukulongana: isyene inyisapo ukulonga syosyo kuti, nayumo angamupelela uwamwabo simo isya kumufula mundumbula isya kumuwisya. ¹⁴ Une manye, sona singolite mu Malafyale Yesu,ukuti fitaliko nafimo fyo finyali pa fyene bubu,fyene fyo we mundu ukufinong'ona ukuba finyali fyofyo fikuba finyali. ¹⁵ Loli linga uwamwinu fikumupelela ukufulala mundumbula fyo ukulya,bo alekite ukwenda mulughano, utakamunangeghe nifyakulya fyo ukulya yo ukilisiti amufwilile. ¹⁶ Popo lelo akandu akisa akomulinako kungayughiwa ububibi. ¹⁷ Popo ubunyafyale bwa Kumwanya tebwafyakulya pamo ifyakung'wa lole ubwene bo bugholoke,nukusekela,nukutengana mo mwa mbepo umuswepu. ¹⁸ Nama yo akumubombela ukilisiti sisisi yo akumubombela wa Chala bubu,bo wepe nabandu tisebamwitikile. ¹⁹ Popo lelo tusikongaghe isyamupela ulutenganio,na syo sya kuzengana twe benebene ²⁰ Koma ukupaghula imbombo ya Chala nifyakulya fyo ukulya,naloli ifyulya fyosi fisa bubu,loli fikuba fibibi linga fikumupelela yumo ukufulala mundumbula. ²¹ Kwisa ukusila ukulya inyama,nukusita kung'wa ubwalwa bwa mafilu,nafyosi ifi linga fikumupelela uwamwinu ukufulala mundumbula. ²² Ulwitiko lo uli nalolo lo uyenalo wemwene pandasi pa Chala,musangalale yo linga atakwibona ububibi,Po akwibona isi akusubila ukuba nyisa. ²³ Loli yo akulya akukayikila yo uChala amutobesisye ukuba mubibi chifukwa atakulila mu lwitiko: loli kosi ko linga kate mulwitikiko bo butulanongwa bubu.