¹ Umundu wesi ifwile abaghile bo bali pamwanya papake :po butaliko nabumo ubulaghi ubu kufuma kwa chala,ubulaghilo bosi ububuliko bu kimikiwa nu Chala. ² Popo loli yo linga akupambana na balaghili bo akulwana nasyo uChala imikite, Abene loli bo bakulwa nabalaghili bo tise bapokele ubulongi. ³ Nama abalaghili bate bakubapelela mtende bo bakubomba inyisa loli bo bakubomba imbibi,imba kali kulonda ukuti manye ube numutende kubulaghili? Ubombe bubu syo nyisa, po tise upokele ulwimiko ku kwake. ⁴ Nama yo akulaghila yo mubombi wa Chala pa kukusenyela uwe inyisa,loli linga ukubomba imbibi po uwe nukutende: Po teghakwangalile amaka agha ali nagho: nama umwe umwe ubombi wa Chala ,po lelo akumufunda yo akubomba imbibi. ⁵ Popo fikuti wilambikeghe ungilambikagha bubu pa chifukwa cha lufundo loli wilambikeghe papo wimenye mumabyebye ghako. ⁶ Chocho chifukwa mukusonga isongo,nama abene bo bakumubombela uChala bakwiyula bubu pa mbombo yiyiyi. ⁷ Popo lelo mubapeghe bosi ifi fyo fibaghile uwa songo mupeghe sona nisongo yosi yo yimikiwe,uwakumoghopa yo mumoghope, wepe nuwa kumwimika yo mumwimikeghe. ⁸ Manye mube bameleliwa numundu loli kwene kokughanana: po yo amughane umunine yo afikile pa lulaghalo. ⁹ Nama isyene ingomelesyo,ulwa kuti utakabe we malaya,utakabe we mulosi,utakabe mwifi,utakabe we wakutotomela,napo lo lukumelesyo lumo ulunine,syo nganite mwisyu lilili lyo likuti umughane umunyako samo wighanile wemwene. ¹⁰ Ulughano lutakumubombela imbibi umunine, po syosi kulumalisya ululaghilo lo lughano. ¹¹ Mubombeghe sisisi bo mukamanye ukuti akabalilo ka kulamusikisya mutulo umwe kisile,Po ubupoki bwa buli papipi bubu,bute ngati po tutakanda bubu ukwitika. ¹² Ubusiku bukuya pakumala umusi ghuli papipi po satusike imbombo sya muchisi tufyale ifykulwila fya bwelu. ¹³ Po tukwenda twiyisye, tuboneka ukuba bapamusi,tutakabe balufu kufya kulya, tutakabe bakung'wa ubwala, tutakabe twe bamalaya,pamo balobelo, tutakabe ba kulwa sona bakabini ¹⁴ Loli mufwaleghe ifilwilo fya Malafyale Yesu kilisiti,Sona mutakabike umoyo kumubili wa finyonywa,nafyo ghukulonda.