¹ Po ulu sagha twendelele nichimanyisyo cha bwasongo, mukufileka ifimanyisyo fyabwandilo ifya kilisitu. Tutakandisye sona pakwalisya ulufulugha lo lukuyugha isya kusileka imbombo syo sikupela ubufwe nukusubalila mwa Chala, ² isya fimanyisyo fya losyo, nukubika inyobe pa mutu; nisya kusyuka kwa bandu abafwe, sona nisya bulongi bwa bwile nabwile. ³ Pala uChala angitikisya, tukuya pakubomba akisa. ⁴ Chipala ngani nabandu bo bakalukana ulwitiko lwabo pakuti bapinduke sona. Abandu baba bakapokelapo ubwelu bwa Chala, ⁵ nukughesyapo ifyabupi fya kumwanya, sona nukupokelapo ichigaba cha mbepo umuswepu. Abene bakabughesyapo ubwisa ubwa masyu gha Chala, namaka ghakabalilo ko kakwisa mundasi, ⁶ po ulu chipala ngani ukuti bapinduke sona pala bawa, chifukwa bakumukomelela sona umwana wa Chala pachipinjika nukumukosya isoni pabwelu. ⁷ UChala akulisya ilongwi lyosi lyo likupokela ifula yo yikuwa pipipi nukwelesya imbeyu syo sikubafwa abandu bo bakusilima. ⁸ Loli pala likumelesya imwifwa ni sote, lita nimbombo, sona bo lili papipi ukughuniwa. Ubumalilo bwake ko kukosiwa nu mulilo. ⁹ Baghaniwa, napo tungayugha bubu, tukusubila ukuti mul nalo ulusayo lo luli pamupene nubupoki bwinyu. ¹⁰ UChala mugholofu, sona atakuya pakulufya imbombo syinyu nulughano lo mwamulangisyabo mukubafwa bandu bake, sona mukwendelela pakubafwa. ¹¹ Cho tukulonda chakuti, umundu wesi uwa umwe endelele pakubonesya ulweke mupaka pabumalilo, umwakuti ifindu fyo mukufilindilila nulusubilo fikwanilisiwe. ¹² Tutakulonda ukuti mube bakata, loli mweghelele abandu bo bakwingila pa fyo uChala akalaghisya pachifukwa cha lwitiko nu bufifalyoyo. ¹³ Bo uChala akufingana na Abulahamu, akalapila mwilyita ilyake nulwake, pakuti atakabapo nayumo umundu uwa kumukila. ¹⁴ Akati, "Nandi nguya pakukusaya nukubalisya aba luko lwako." ¹⁵ UAbulahamu akalindilila mubufifalyoyo, loli pandasi pake akanda pakupokela syo uChala akafingana. ¹⁶ Pala abandu bakulapa, bakulapila mulyita lya mundu uyungi yo mukulupo ukukila abene, po ichilapo chila chikumala ukutatingana kosi. ¹⁷ Abandu bo bakabaghila pakupyana syo Chala akafinga, uChala akalondagha pakubalangisya pabwelu ngani ukuti atakwisa pakuchenjapo lumolumo inyinong'ono syake. Popo akongelesyapo ulufundo pa lufingo lwake. ¹⁸ Palipo ifindu fibili , fyo fitangachenja, sona mufyo uChala atangapika. Po uswe twe twabagha ubupoki nawe yuyo, atukasya ngani umoyo pakukolelesya ulusubilo, lo atubikile pandasi papitu. ¹⁹ Ulusubilo lo tui nalo cho chipimbili cha bumi bwitu. Lutakuneng'ena sona lusubiliwa ngani, lo lukupululila pa mwenda uwakusighila mu nyumba ya Chala iyakumwanya nukwisimika mubuyo ubuswepu ngani. ²⁰ UYesu akatangilila kale ukwingilamo mulamula mubuyo bwitu, sona nukuba Muputi usongo ngani uwa bwile na bwile mulubati lwa buputi bwa Melekizedeki.