¹ Umuputi wesi usongo ngani akusaliwa pakati pabandu ukuti abimile mubuyo bwabo pamaso pa Chala, pakubika ifyakwiyipa pachifukwa cha mbibi. ² Abaghile abe mololo nabandu bo batamumenye, sona abakusobela, pakuti we pebu mutetebafu mufindu ifyingi. ³ Ichi chocho wepe abaghile pakubika icha kwiyipa chake pachifukwa icha mbibi isyake nu lwake, sona ni cha kwiyipa cha mbibi sya bandu. ⁴ Nayumo umundu yo akwiyipa mwene injindi syakuba muputi usongo ngani, loli penepo pala itikisiwa nu Chala ukuyana namo uAloni akitikisiwa. ⁵ Ukuyanabu, wepe uKilisitu atakiyipa mwene injindi syakuba muputi usongo ngani. Loli uChala akamubusya akati, "Uwe, we mwana wangu; umusughu naba ne ghuso." ⁶ Amasyu ghakuyugha sona pabungi ghakuti, "Uwe, we muputi uwa bwile na bwile, mulubatiko lwa buputi bwa Melekizedeki." ⁷ Mumasiku gha bumi bwake mu chisu chapasi ichi, uYesu akiputa nukulambilisya kwa Chala umwakukola ngani, sona sona na masosi pakumulilila yo angamupoka kubufwe. UChala akamupulika pachifukwa cha kwiyisya nukwiyipa kwake. ⁸ Napo akaba mwana wa Chala, pope akamanyila pakupulikila ukwendela mundamio syo akakomana nasyo. ⁹ Bo aba wakuchenja ngani, akaba mbwibwi ya bupoki ubwa bwile na bwile ubwa bandu bosi bo bakumupulikila. ¹⁰ Popo uChala akamwimika ukuba muputi usongo ngani mulubatiko lwa buputi bwa Melekizedeki. ¹¹ Pafundo yiyi tuli nafyo fyingi ifya kuyugha, loli chikafu pakubalingania, chifukwa mukumanyila panandipanandi. ¹² Napo pakabalilo akangali mwaba mwe bamanyisi, loli mukali mukumulonda umundu uyungi ukuti abamanyisye sona ifimanyisyo ifyabwandilo ifya masyu ya Chala. Mukali mukunyenywa pakung'wa sona ulukama mubuyo bwa kulya ichakulya ichikafu. ¹³ Umundu wesi yo akung'wabu ulukama akali we bonda, atangakonga icimanyisyo cho chikulingania isya bugholofu. ¹⁴ Loli ichakilya ichikafu cho cha bandu abasongo, bo ukwendela mukumanyila bamenye pakulesania pakati pachindu cho chisa nichindu cho chibibi.