¹ Pakuti uChala alaghisya ukuti tukuya pakwingilamo mutubusyo , po sa tuchebe ukutii nayumo umundu uwakuti akaptwe pakwingilamo mubutusyo bo uChala akatulaghisya. ² Pakuti nubwesu tukifwa amasyu amasyu amisa ngati bobabo. Loli amasyu gho bakifwa bataba nagho nimbombo nayimo yimo, pachifukwa chakuti bo bakaghifwa bataghapokela nulwitiko. ³ Uswe twe tukusubila, tukwingilamo mubutusyo bula. Loli uChala akababusya abandu bo batakasubila akati, "Ngakalala ngani nukulapa ukuti, 'Tabakaye bingilemo lumo muchisu changu icha butusyo chila'". ⁴ Ichisu icha butusyo ichi chikabako kale, pakuti isya lisiku ilyakutusya pabuyo bumo amasyu ghakuti, "UChala akatusya imbombo syake syosi pisiku ilyakutusya." ⁵ Pafundo yiyi akayugha sona akati, "Tabakingilemo lumo muchisu changu icha butusyo, Cho ngabalaghisya." ⁶ Chapabwelu ukuti abandu abingi bingileghe mubutusyo bula pakutesya ukuti abandu bo bakaba babwandilo pakwifwa amasyu amisa bakapotwa pakwingilamo, pachifukwa chakusita kwifwila. ⁷ Popo uChala akimika sona isiku ilingi lyo likuti, "Umusughu". Po pakale akayugha ukwendela mwa Devedi akati, "Umusughu pala mukwifwa isyu mutakabe nimyoyo imikafu". ⁸ Pakuti pala uYoshwa akabapa abandu ubutusyo ubwenecho, panyuma pake uCHala ngali atayughite ilisiku ilingi. ⁹ Po ulu kusyeteko ubutusyo ubwisa ngani bo buli ngati butusyo be Chala. ¹⁰ Pakuti umundu wesi yo akwingila mubutusyo bwa Chala ub, wepebu akutusya imbombo syake ukuyana namo uChala akatusikisya imbombo syake isya bupeli. ¹¹ Po satughele ngani pakwingila mu butusyo bula, ukuti atakabepo yumo umundu mumwitu uwakupotwa ukuyana namo abene bakapotwela pachifukwa chakusita kwifwila. ¹² Pakuti amasyu gha Chala mumi sona gha kubombabomba. Ghakwete ngani ukukila upanga yo akwete kosikosi. Upanga akulasa mupaka po pakomanite imbingu namafuta gha mwifupa. Ukuyanabu, amasyu gha Chala ghakulasu mupaka po pakomanite umoyo nu mbepo wa mundu. Ghakulonga inyinong'ono sya band, sona nafyo imyoyo yabo yikunyenywa. ¹³ Pandasi paChala katalipo nakamu ko kafifiwe. Ifindu fyosi fili pabwelubu, sona fili ngule pandasi papake yo tubaghile tumulinganie fyosi fyo twabomba. ¹⁴ Po loli pakuti tuli muputi usongo sona umukulu yo akakwela mupaka ukufika kumwanya, yo we Yesu umwana wa Chala, po sagha tukolelesye ngani ulwitiko lwitu lo lukwitika. ¹⁵ Nama uswe tuta nu MUputi usongo ngani yo angapotwa pakutupelela ichisa pachifukwa cha butetebwale bwitu. LOli tuli nawe wekabu yo akagheliwa mufyosi ukuyana namo nuswebu tukugheliwila, loli umwene atakanangapo lumo. ¹⁶ Po ulu sagha tupalamile ku chitengo cha bunyafyale bwa Chala uwachisa ngani umwakusita bogha, ukuti nuswe tupokele ichisa, sona nukutwafwa pakabalilo kitu akabupotwe.