¹ Bakamu bangu, uChala abasalite umwe ukuti mube bandu bake abaswepu. Po ulu mwinong'one isya Yesu, yo akatumiwa nuChala ukuti abe Muputi musongo ngani uwa lwitiko lo tukwitika. ² Umwene akaba musubaliliwa kwa Chala yo akamusala, ukuyana namo uMozesi akaba musubaliliwa munyumba ya Chala. ³ Umundu yo akusenga inyumba akupokelapo injindi ukukila inyumba iyenecho. Ukuyanabu, we uYesu apokeleghe ngani injindi ukumukila uMozesi. ⁴ Pakuti inyumba syosi sikusengiwa nu mundu, loli uChala weyo musengi wa findu fyosi. ⁵ UMozesi akaba mubombi umusubaliliwa munyumba yosi iya Chala, pakusimikisya syosi sisyo uChala akalondagha pakuyugha mundasi. ⁶ Loli ukilisitu akaba mwana umusubaliliwa munyumba ya Chala. Uswe twe nyumba yake, pala tukubukilila pakuba bakifu ngani nukusunga ulusubilo lwitu mufindu fyo tukufilindilila. ⁷ Ichi chocho chifukwa uMbepo umuswepu ukuti, "Umusughu pala mukupulika isyu lya Chala, ⁸ Mutakabe bakafu imyoyo yinyu. Umu mo abanyenya binyu bakamusambukilagha uChala pakabalilo ko bakamughelagha mu mungolongo. ⁹ Mulamula abanyenye binu bakangelagha, napo bakafibona fyo ngabomba ifyinja 40. ¹⁰ Ichi chocho chifukwa ngayikalalila ngani ingulilo yilayila. Po ngayugha ngati, 'Imyoyo yabo yakusambukila bwile, sona batakukonga indaghilo syangu'. ¹¹ Po ngakalala ngani nukulapa ukuti, 'Batakuyu kwingilamo lumo muchisu changu icha butusyo chila.'" ¹² Mwe bakamu bangu, muchebeghe ukuti atakabepo yumo umundu mumwinyu uwamoyo umubibi, sona u usita kusubila gho ghungamulesania nu Chala umumi. ¹³ Loli mukasanienge. isiku ni siku, bo tuli na masyu gho ghakuti, "Umusughu," bomba bubu ukuti nayumo mumwinyu uwakuti akasimbuliwe ni mbibi nukuba mukafu mumoyo. ¹⁴ Pakuti twebosi tuli ni mbali mufindu fyo ukilisitu akupa pala twimilile ngani pabumalilo palusubilo lo tukaba nalo pa bwandilo. ¹⁵ Amasyu ghakuti, "U usughu pala mukwifwa amasyu, mutakabe nimyoyo imikafu ukuyana na mo mukabombela pakumusambukila uChala." ¹⁶ Imba bo baweni bo bakifwa isyu lyake nukumusambukila? Imba batakaba bandu bo uMozesi akabati muchisu cha mu Ijiputi? ¹⁷ Imba bo baweni bo akabakalalila ifyinja 40? Imba batakaba bandu bo bakananga, bo imifimba yabo yikabolela mungolongo? ¹⁸ Imba bo baweni bo akabalapila ukuti batakuya pakwingilamo lumo muchisu chake icha butusyo? Imba batakaba bandu bo bakamusambukila? ¹⁹ Po ulu tukutesya ukuti abandu bala bakapotwa pakwingilamo muchisu cha butusyo, pachifukwa cha kusita kusubila kwabo.