¹ Po ulu tubaghile tukolelesye ngani syo tukifwa, pakuti tutakatilengeko. ² Amasyu gho uChala akayughagha ukwendela mu bandumi ba kumwanya ghakaba ghanaloli, sona abandu bosi bo bataghifwilagha pamu ukughasula bakafundiwagha ukuyana namo sikabaghililagha. ³ Imba uswe tungapona bulibuli pala tutakukolelesya ubupoki ubukulu bubu? Akaba we Malafyale yo akafumusya tasi ubupoki bubu, bo bukasimikisiwa kwitu nabandu bo bakamwifwila. ⁴ UChala wepe akasimikisya ukwendela mufimanyilo, nifiswigho, sona ni fyikafyakulekana lekana pakubagabila ifyabupi fya Mbepo umuswepu ukuyana nubwighane bwake. ⁵ UChala atakabapa abandumi bakumwanya ubulaghili bwa chisu cho chikwisa, ichisu cho tukuchiyugha. ⁶ Loli pabuyo bumo sisimikisiwe namasyu ghakuti, "imba umundu we weni ukuti u ukumbukenge, umwana uwa mundubu, we weni ukuti umusungenge akisa? ⁷ Pakabalilo akapimbabu ukumupela pakuba mupimbapo na kubandumi ba kumwanya; Ukumufwika imbumbu ya bukulu nu njindi, nukumupa ubulaghili pa findu fyosi". ⁸ Ulu umupile ubulaghili pafindu fyosi, uChala atakachilekapo nachimo ukuti chitakabe pasi pabulaghili bwake. Loli ukuyana namo sibelile ulu, tutakutesya ukuti fyosi fili pasi pa bulaghili bwake. ⁹ Loli tutakumubona uYesu, yo pakabalilo akapimbabu akaba munandipo nakubandumi ba kumwanya. Po uou afwete imbumbu ya bukulu ni njindi pachifukwa cha kutamiwa kwake nu bufwe, umwakuti ukwendela muchisa cha Chala, abafwile abandu bosi. ¹⁰ Pakuti chikamubaghila uChala yo mupeli, sona musungilili wa findu fyosi, ukuti amupele uYesu pakuba wakubaghilila ukwendela mu ndamio syake, umwakuti abeghele abana bake abingi pakwingila mubukulu bwake. Pakuti uYesu weyo akubalongosokesya ku bupoki. ¹¹ Pakuti yo akubachenja abandu, sona nabandu bo bakuchenjiwa, bosi babili bali nu wise weka. Ichi chocho chifukwa isoni sitakumukola uYesu pakubitisya ukuti bakamu bake. ¹² Akuyugha kwa Chala ukuti, "Ngwisa pakufumusya ilyita lyako pakati pabakamu bangu; pamaso pachipanga , ngwisa pakwimbila inyimbo sya mapalo". ¹³ Akuyugha sona ukuti, "Ulusubilo lwangu, ngwisa pakulubika mwa Chala". Po akuyugha sona akuti, "Une indi panu, pamupene nabana bo uChala ambile." ¹⁴ Pakuti abana baba bandubu, bo bali mumubili nu banda, uYesu umwenecho akachenja ngati bobabo nukugabana nabo akabele kabo ukwendela mubufwe bwake ukuti amukomanie uSetano, yo ali namaka gha bufwe. ¹⁵ Akabomba bubu ukuti ababuoe abandu bosi bo mubumi bwabo bosi bakaba bazya pachifukwa cha koghopa ubufwe. ¹⁶ Pakuti chili pabwelubu ukuti atakisa pakubafwa abandumi bakumwanya, awe. Loli akisa pakubafwa abaluko lwa Abulahamu. ¹⁷ Pachifukwa chichi, chikalondiwagha pakuti amwene abe ngati bo bakamu bake mufindu fyosi, ukuti aba muputi usingo ngani uwa chisa, sona umusubiliwa mumbombo ya Chala nukuba chakwiyipa chakuhobokela imbibi sya bandu. ¹⁸ Pakuti umwene akagheliwa ukwendela mundamio syake, kokuti umwene angabafwa abandu bo bakugheliwa.