¹ Pala kukadumulibwa ukuti tikabolokele ku Italiya, Paulosi pamupene na bapinyibwa bamwake babikibwe munyobe sya Yuliyo, usongo wa chitha chakwitisyibwa ichitha cha Kalonga. ² Po twati twingila mungalaba yo yikafuma ku Adilamitiyo, yo yikikala panandi ukubolokela kudowoko gha mumbali wa Asiya, tukanda ubulendo pamupene nu Alisitaliko mu Makedoniya waku Tesalonika. ³ Pangelo pake, twafikite pa Sidoni, uYuliya wakamupangila ichisa Paulosi, amwitikisye ukuti abuke ukuketa abakamu bake ukuti bamusamalile. ⁴ Twakindile kusoka pala, pachifukwa imbepo yakubagha ukupatikana nuswe, tukenda kula twasikisyibwe nichilwa cha Kipro. ⁵ Pala twati twaboloka iya ku Kilikiya ni Pamufuliya, tukisa ku Mila mu Lisiya. ⁶ Kulakula usongo wa babwite bayaghite ingalaba yo yikafumagha ku dowoko lya Alekizandala, yo yiyo yikabukagha ku Italiya, po bakatwingisya mulamula. ⁷ Kwa mashiku mingi tukenda panandi panandi po na bulutamyo ghakulu tukafika pamusumba wa Kinidu. Pala imbepo yikatwighalila nukututamya ngani, tukenda uku uku po twasimika nu chilwa cha Kelete, kukinda umalilo wa Salamone. ⁸ Tukendagha mumbali mwa nyanja po pala na mundamyo ikulu tukafika pamalo ghakwitisyibwa amadoboko ghisa, ghogho ghali papipi bulo nu musumba wa Laseya. ⁹ Po tukikalako akabalilo katali, ubulendo bwali kale bwakoghofya, pakuti akabalilo kakusala fyakulya yope yikakinda, Paulosi wakabasuma abandu wakati, ¹⁰ "Mwe bandu, nguketa ukuti pabulendo ububwa panyanja tiukabe bwakubaba nu wakoghofya nu kutaghibwa kwa fililo mu ngalaba hagha, lole namabumi gha bandu bope." ¹¹ Lole usongo wa bwite akapulika ngani kumulongoshi na kwa mwene ngalaba akukinda fyo Paulosi akayughagha. ¹² Po pakuti amadoboko ghala ghatakaba ghisa ukuti bandu bakalindepo pakabalilo is mbepo, abandu bingi bakayugha kuti, kwali kwisa kutilapo, ukuti pamo mwa bwisa bakuya pakufika kudoboko lya Fonikisi, lyo doboko lya chilwa cha Kelete, kumupoto ukulifumilisuba nu ko likwingila, ichakwifumilisuba nukwikala kulakula akabalilo ka ka mbepo. ¹³ Pala mbepo ya kumwela yikwanda pakwiputa panandi panandi, abandu bakwinoghona ukuti umwabi bobubo wakubombela fyo bakalondagha, akwesisye unyangulu po bakenda mumbali mwene mwa chilwa icha Kelete. ¹⁴ Lole mulubilo kukawuka ichimbepo cho chikwitisyibwa ukuti Yulakula, cho chikaputagha ukufuma ku chilwa. ¹⁵ Ichimbepo chikanda ukukoma ingalaba ukuti yeghibwe bulo, po yikapotwa ukuti yikalumbe kumbepo. ¹⁶ Po tukendagha nu sikishibwa nu is chilwa kanandi ko kakwitisyibwa ukuti Kauda, tukalimbana mwakutamiwa ukubika ubwato, ka ngalaba mumalo ghake. ¹⁷ Po bakwesisye akabwato, bakakunga imikusa ukusi kwa ngalaba nukukosya nganila pamupene. Sona pakuti bakoghopagha ukuti tibakabwamile pa Siliti, bikisye thanga nu kuyileka ingalaba ukuti yendaghe nakalinga. ¹⁸ Po tukaponyeka uku nu kula nu chumphupulu, ningelo syake akanda kutagha fililo mu mishi. ¹⁹ Pa shiku lya butatu, bakatisyamo ifibombelo fya ngalaba ninyobe syabo nukufitagha mumishi. ²⁰ Pakuti pamashiku ghingi, tukapotwagha pakuketa isuba pamo nyenyesi, po ichimbepo chikakindilila kukuba ngani, tukatagha ulwitiko lyoshi ukuti te te tupone. ²¹ Pala abandu batakikala akabalilo katali kwambula ukulya kandu, Paulosi akimilila mukati nukubabula ukuti, "Mwe mwabamwitu mwitikisyaghe fyo ngayugha une nukuleka ukutilamo mu chilwa, ngali tutakumanite nu kukomanika koshi uku pamupene ni fyoshi fyo fyataghibwa. ²² Lole lululu ngubasuma ukuti ghoma mundumbula, pakuti nayumo wa umwe yo yo tiwafwe, lole ingalaba yene tiyikatayibwe. ²³ Popo ningelo bububo ubwandumi yuyo ndi bwake sona yuyo ngumubombela wimilile papipi nune, ²⁴ po atile, 'Utakoghope Paulosi, ubaghile naloli kwimilila pandashi pa Kalonga wa ku Loma. Po uChala akababika munyobe syako abandu bosi aba ukuti ulambe nabo.' ²⁵ Po umwe bandu kima mundumbula, pakuti ndi nulwitiko mwa Chala, ukuti chibe bubo ngati mbabulile. ²⁶ Sona tubaghile pakwima pakachilwa kangi. ²⁷ Mubushiku ubwa kumi nu chinayi, pala twanyamulibwagha kula nu kuno namaghigha munyanja ya Adiliya, pafupi ushiku pakasi abendeshi ba ngalaba bakinong'onagha ukuti baseghelele kumulima. ²⁸ Po bakaghela bakagha ukuti nyanja yila yingile amamita ghabili pamwanya ghangonde na ghabili. ²⁹ Pala bakoghopa ukuti ingalaba ingakoma amabwe, baponyite unyangulu sinayi kunyuma kwa ngalaba, po bakipulagha ukuti kuche nakalinga. ³⁰ Po abendeshi bakalondagha kukindamo mu ngalaba, bakatishila akabwato mu mishi nakalinga, bakaba ngati bakubukagha kundashi ukuti baye bakaponye unyangulu, ³¹ Paulosi wakamubula songo wa basilikali na babwite wakati, "Pala abandu aba batakwikala mu ngalaba, mutangapokibwa." ³² Po abasilikali badumwile ifingwe fya bwato, po bakakaleka ukuti kabukaghe. ³³ Po kwali papipi ukuche, Paulosi akababula bosa ukuti balye ichakulya, wakati, "Ilelo amashiku ghafwana kumi naghanayi, mukwikala bubo ukwambula kulya chakulya. ³⁴ Choni cho tichibape amaka, pakuti patali nayumo wa umwe yo nakamo kasisi tikataghibwe." ³⁵ Akati ayugha chicho, akegha ichibama,po akati iputa kwa Chala pamaso pa bandu bosa, wakamenya nukwanda ukulya. ³⁶ Popapo boshi bakaghoma, po boshi bakanda ukulya. ³⁷ Tweshi pamupene mu ngalaba twali amakumi kumi ghabili, pamwanya makumi ghangonde na ghabili pamwanya bangonde na yumoywene. ³⁸ Pala bakalya nukwikuta, ingalaba yapepwike po bakatagha utiligu munyanja. ³⁹ Bo kuchile, abendeshi ba ngalaba batakachimanya chisu chila,bakaketa bubo ichingondya cho mumbali mwake mwali umusanga. Bapimite ukuti pala kungabombibwa tibayisosye ingalaba palapala. ⁴⁰ Po basatwile unyangulu, basilekite munyanja. Pakabalilo kalakala basatwile sona ifingwe fyo bapinyile isigilo, po bakwesisye mumwanya thanga lya kundashi kuketesya kumbepo ukuti yikangile ingalaba kundashi po yibukeghe kumulima. ⁴¹ Lole ingalaba ikakwela pachibumila icha musanga, nukwima palapala. Ichighaba cha kundashi kwake chapatile, po yilaleka nukwenda, ukunyuma kwapwanyibwe namayigha. ⁴² Abasilikali bakinoghona ukuti baghoghe abapinyibwa bosa, bakoghopagha ukuti tibasyughe mumisi nukukinda. ⁴³ Lole usongo wa bwite pakulonda ukumupokania uPaulosi, akanite ukuti bawombe ngati sisyo. Wakalamula abandu bosi bo bamenye pakusyugha bandane pakudukila mumisi ukusoka mu ngalaba kubuka kumulima. ⁴⁴ Po bo bakikalila, akabalamula ukuti baleme amatabwa, pamo ifipatu fya ngalaba. Sona mwe fyabile ukuti tweshi twafikite akisa kumulima.