¹ Po ukalonga Agilipa atile ukwa Paulosi, "Witikisyibwa ukuti uyughe wemwene." Papapo uPaulosi akanyamusya inyobe yake nukwandako ukwiyughila wakati, ² "Ngwipima ukuba mwabi ngani pakuyugha nemwene pano musyubu pandashi pinyu umwe ukalonga Agilipa, mu fyoshi fyo abaYuda bakumbacha nafyo. ³ Pakuti umwe mughamenye ngani amaluso gha baYuda ghoshi, nafyo bakulekana nafyo. Po ngusuma ukuti, mumbulikisye nukwikola koshi. ⁴ Ubumi bwangu mwo bwali kwandu ku ukilano bwangu, namo ngikalila ukufuma pa bwandilo pala ngikalagha pamupene na bamanyani bangu numu baluko lwangu namu Yelusalemu, baumenye aba Yuda boshi. ⁵ Bamenye pakabalilo akatali ngani, sona pala bakulonda bangisa bayughile bwakamboni ukuti, paumoyo bwangu nali muFalisi ubwa kipani cho chimiliye nganganga pakukonga akabalilo ka nyiputo yitu. ⁶ Po ndimilile pano ukuti ndongibwe pachifukwa ngwitikisya mu pangano lyo uChala apangite nu sekulu bwitu. ⁷ Yo ndaghilo yiyo uluko lwitu kumi na ghabili bakusubila akabilo ka nyiputo yitu paushiku na pamusi, mwe baghindikibwa cho chifukwa chakusubila hicho cho abaYuda bakumbacha nacho. ⁸ Pachifukwa bule bule mwe boshi ba umwe mukwinoghona ukuti chitangabombibwa ukuti uChala atangashusha abandu kubafwe? ⁹ Nanine ndi nulwitiko ukuti mbombe ifindu fyingi ifyalimbana ni ngamu ya Yesu munazaleti. ¹⁰ Po ngafibomba naloli mu Yelusalemu, ngapoka amaka kufuma kubaputi basongo nukubighalila munjela abandu ba Chala bingi. Pala kukalamulibwa ukuti baghogheke, une ngitikisya. ¹¹ Pakabalilo mingi ngabatamyagha munyumba shoshi sya kwiputilamo. Ngaghelagha ngani ukubakanisya ukuti batukane uChala wabo. Ngabakalalila ngani mwakuti ngabakisya mpaka nu mumisumba iya chihesya. ¹² Po ngabuka uku Damaseko na maka gha gha muputi songo. ¹³ Numusanya pakasi, mwe Kalonga, papo nali pasila, ngaketa ubwelu ukufuma kumwanya, bo bwali bwakukinda ubwelu wa lisuba, po wandisyungulile une nu boshi abo bali papo nune. ¹⁴ Tweboshi tukawa pashi po ngapulika amashu ghakuyugha nune mu chiHebeli ghakuti, "Sauli, Sauli, ukundamyilaki? Ukwikoma wemwene pakwikoma pa lunganjo.' ¹⁵ Po ngalalusya ukuti, 'Mwe bawini, Malafyale.' Po uMalafyale akati, 'Ne Yesu nene ukundamya. ¹⁶ Lole sumuka imilila, pakuti chicho ngukubika ukuba mubombibwa bwangu, nu bwakamboni wa fyifyo wangetelamo nafyo tiungetelaghemo ku uwe. ¹⁷ Po tingakupoke ukubandu bakwinyu nu baghanibwa bulo ku babo ngukutumiteko. ¹⁸ Ukuti ukighule amaso ghabo ukuti banyokeko ukungisi nukwisa kubwelu, sona ukufuma ku maka gha Setano nukwisa kwa Chala, mwakuti bapokele luhoghokelo lwa mbibi nukupokela sona amalo pamupene na babo batubisyibwe pachifukwa cha lughano mumwangu.' ¹⁹ Po umwe Kalonga Agilipa, ndakaba wandamyo ukufiloto fya kumwanya. ²⁰ Nganda pakufumusya ku bo bali mu Damaseko, panyuma mu Yelusalemu, nu muchigabo cha Yudeya, sona nubamanyanibwa boshi, ukuti babaghile ukunyomoka mundumbula, nukwisa kwa Chala, nukubomba mbombo yakunangisya ukung'anamuka kwabo. ²¹ Cho chifukwa abaYuda bakangola une munyumba ya Chala, po bakalonda kungogha. ²² Lole nofwibwagha nu Chala ukufika musyubu sona ndimiliye pano ukubika bwakamboni kuboshi, baghindikibwa na bo bataba baghindikibwa. Nkuyugha fyo abasololi nu Mosesi bakayughagha ukuti fibombibwaghe, ²³ Ukuti Mesiya abaghile kukomwa , nukuba wakwanda pakusyuka kubufwe, mwakuti afumusye ubwelu wa bupoki kuba Yuda nukubamanyanibwa." ²⁴ Popo uPaulosi akifikililagha lululu, Fesito akakolela atile, "Paulosi, upenite, ukumanyila kwako ukwapamwanya koko upenite nako." ²⁵ Lole uPaulosi akamula akati, "Ba luwindiko ba Fesito, une ndapenite, lole nguyugha amasyu gha bwanaloli. ²⁶ Bakalonga Agilipa bamenye findu cho chifukwa chake nguyugha namaka pamaso. Ngusubila lole ukuti patali nakamo pa findu fifyo, cho batakakumanya pakuti ichindu chicho chitakabombiwa kumbali. ²⁷ Umwe Kalonga Agilipa, ka mukusubila abasololi? Menye ukuti mukusubila." ²⁸ Agilipa akati kwa Paulosi, ukwinoghona ukuti mukabalilo akanandi, ungandegha ukuba mu Kilisiti?" ²⁹ Paulosi akamula watile, "Napo kali kabalilo akanandi, pamo akabalilo akatali, cho ngusuma kwa Chala cho chakuti. umwe mwebene ayi, lolenaboshi bo bakupulika musyubu babe ngati nune, ukupatula mabunyolo agha." ³⁰ Popapo ukalonga, mukulu wa chigaba, Belenike na bandu boshi babukite. ³¹ Pala wakafumamo bakayughisyana bakati, "Mundu uyu atakubombapo nakamo ko kamubaghile ukufwa pamo kumwighalila munjela." ³² Agilipa akayugha kwa Fesito, "Umundu uyu abaghile kusutulibwa, po takayughe ukuti inongwa yake yibuke kwa Kalonga wa kuLoma."