¹ UFesito akafika muchighaba chicho, po ghakindite amashiku matatu, akwelile uku Yelusalemu ukufuma ku Kesaleya. ² Baputi basongo na bakulu-bakulu babo Yuda, bakisa nukumubula fyifyo bamupachike nafyo uPaulosi. ³ Bakamulalusya sona ngati bo umwabi bwa pambali batumisye uPaulosi ku Yelusalemu, lole bapanganite ukumughogha pasila. ⁴ UFesito akamula akati, "Paulosi tiikalile munjela ku Kesaleya, lole une timbuke kulakula lululu. ⁵ Baleke abandu bo bali namasasa mumwinyu babe nanune, ku Kesaleya, pala umundu uyu bali nawe ninongwa tibakamupachike kukuko." ⁶ Pala Fesito akalinda nabo kulakula amashiku ghangonde na ghatatu pamo kumi, akika ukuya ku Kesaleya. Pangelo pake, Fesito akikala mu mphala pamupando wakulongelapo, popo akalamula ukuti bise nawe Paulosi. ⁷ Pala akisa, abaYuda bo bakafuma ku Yelusalemu, bakimilila nukumushungulila po bakamupachika nifyindu fyingi fyakoghofya fyofyo atakaba nu bwakamboni bwake. ⁸ Lole uPaulosi wakivikilila akati, "Nda nakamo kabibi kakubomba kukomania indaghilo sya baYuda, pamo inyumba ya Chala, pamo sona ukulonga wa kubaLoma" ⁹ Fesito pakulonda ukubahobosya abaYuda, akamulalusya uPaulosi akati, "Ukulonda ukubuka ku Yelusalemu, koko tiukalongibwe pandashi pangu pa fyo bakupachike nafyo?" ¹⁰ Lole uPaulosi akamula ukuti, "Une ndimiliye pandashi pa balongi ba kuLoma, popapo mbaghile pkulongiwa, une ndababomblapo akabibi abaYuda, ngali mo numwe mumenye akisa kene. ¹¹ Pala ndi ninongwa, pamo mbombite akandu ko kabaghile ukufwa, ndakukana ukufwa. Lole pala muta bwanaloli pafyindu fyo bakumbacha nafyo, pata numundu yuyo angambikisya kubabo. Inongwa yangu yibuke ukwa Kalonga waku Loma." ¹² UFesito po akati ayughisyana nabo bakamutulagha paulongi wa nongwa, wakati, "Wayugha ukuti inongwa yako yibuke kuba Kalonga baku Loma, po kwa Kalonga waku Loma ko ubukaghe." ¹³ Bo bakindapo amashiku ghangi ukalonga Agilipa nu Belenike bafikite uku Kesaleya, kukuko bakaya pamuleka uFesito. ¹⁴ Pakuti bakalako amashiku ghingi, uFesito akamuyughila ukalonga nongwa sha Paulosi akati, "Alipo umundu yungi yuyo amuekite munjela. ¹⁵ Po nali mu Yelusalemu abaputi basongo na basongo baba Yuda, bakayugha fyake nu kusuma ukuti mulonge ukuti yo monangi. ¹⁶ Sona ngababula ukuti te kaluso kaba Loma ukupeleka mundu bamupachika nunongwa ikuli po atakumana nabo bo bamupachagha pamaso hi maso ukuti amanye ukuyughapo panongwa yake. ¹⁷ Sona pala bakumanagha pamupene kuno, ndakakaba, lole pangelo pake, ngikala pamupando ubwa kulongelapo. Papo ngalamula ukuti bise nawe umundu yula. ¹⁸ Papo bakayughagha shake wimilile, batakayughapo nachimo chikulu chicho une nkhinong'onagha ukuti tibayughe. ¹⁹ Lole basusyanagha ifya nyiputo syabo, nisya umundu yungi Yesu, yuyo afwile sona Paulosi akuti akashuka. ²⁰ Une nsobite napo ninginoghonela pafyoshi fifyo. Po ngamulalusya uPaulosi ukuti pala akulonda ukubuka ku Yelusalemu ukuti baye bakayisyane kulakula pafyo bamupachikagha nafyo. ²¹ Lole pala Paulosi akasumagha ukuti baye bamusunge munyumba ya banongwa, papo akulindilila ubudumulilo wa Kalonga wa chiLoma papo ngamulamula ukuti bamukole tasi pasi mpaka baghile ukumutuma kwa Kalonga wa chiLoma. ²² Po Agilipa akati kwa Fesito, "Une ne ngulonda pamupulika umundu uyu." UFesito akamula atile, "Tiukapulike pa ndabi." ²³ Pangelo pake ukalonga Agilipa nu mukashi wake Belenike, bakisa bakisha namaka ghoshi gha bunyafyale. Bakingila muchipinda cha kulongelamo nongwa pamupene na babwite nabandu baghindikiwa ba mumusumba. po Fesito akalangula ukuti bakisa nabwe. ²⁴ Fesito akati, "Ukalonga Agilipa, na mweshi mwe muli pano, pamupene nuswe, mwamuketa umundu uyu, abaYuda boshi uku Yelusalemu napano bamudandabulagha kukwangu, sona bakakolela ukuti atakabeso wabumi. ²⁵ Lole une ndakamwa nakamo kakonanga ukuti abombe ichilango cha nifwa. Po umwene akayugha ukuti nongwa yake yibuke sona kwa Kalonga wa baLoma, po ngalamula ukuti aye kuko. ²⁶ Lole une ndanako nakamo pamundu uyu, ko kakuti musimbile ukalonga wa chiLoma nifya yuyo. Po namweghela pandashi pinyu, ngani ngani pako uwe ukalonga Agilipa, mwakuti pala twamulalusya ngani pa nongwa yake, po tube nakandu ko kakuti tusimbe. ²⁷ Po kukwangu kutewibwa ngali ukonyofu ukutumisya mupinyibwa, kwambula kumanya ichifukwa icha nongwa yake."