¹ Po ghakindapo amashiku ghangonde, muputi songo uAnaniya isile poka nabasongo bangi, sona mumanyandaghilo yumweywene ingamu yake Teletulo, yo akayughagha fyo bakamuyughagha uPaulosi pandashi pa linyafyale uFeliki. ² Pala uPaulosi akitishibwa, Teletulo akanda pamuyugha atile, "Uluwindiko, uFelike, ulongoshi bwako bwamahala twabikibwa mulusekelo akabalilo akatali, po ifindu fyingi fyanyokela kuluku bwisa mu chisu chitu. ³ Musila yosi, nu kosakosa, ichi tukupokela nukupalisya kosa. ⁴ Lole manye tubataghile akabalilo ngukusuma ukuti muchisa chako, utupulike fyo tuli nafyo mwakudumula. ⁵ Umundu uyu twamwagha ukuti mutamye naloli. Mu chisu chosa, akusosya ichongo mukati mwa baYuda bosi, sona yo muloshi bwa kachipanga ko kafumiteko akaba Nazaleti. ⁶ Sona akalondagha ukunyalisya inyumba ya Chala, lole tukamukola, (tukalondagha pamulonga kufwana ni ndaghilo syitu. ⁷ Lole usongo wa bwite uLusiya akamusosyako kumwitu namaka aghakulu. ⁸ Sona akati bo bamwaghite ni nongwa bise kukwako.) Pala timumulalusye umundu uyu timwaghe ichifukwa chicho twamwagha nacho." ⁹ AbaYuda bope bakamwitikisya uTetetulo pakuyugha ukuti naloli mo fyali. ¹⁰ Po usongo wa chigaba wakamuwula uPaulosi kuti ayughe, po uPaulosi akati, "Pakuma ukuti mwali mulongi wa luko ili kwafinya ifingi, ngwifikilila mubuhoboke. ¹¹ Po timuleke mwebene, ubwanaloli ukuti patakinditepo amashiku kumi na ghabili papo ngabuka ku Yelusalemu pakwiputa. ¹² AbaYuda batakanagha ukuti nguyughisania nu mundu, pamo ukuti nali pakufulungania abandu, pamo munyumba ya Chala, pamo munyumba syabo sya kwiputilamo,pamo mu musumba. ¹³ Batangababula nachimo cho une ngakomania. ¹⁴ Chocho une ngwitika pandashi pinyu cho chakuti, ngwiputa uChala wa basekulu pakukonga isila yiyo abene bakuti ko kachipanga ko kapatukite. Lole sona ngwitika fyoshi fyo fisimbiwe mu ndaghilo sya Mosesi na basololi. ¹⁵ Pa lwitiko uChala yuyo abene bope bakumwitika ukuti abandu boshi abisa na babibi tibakasyuke kubufwe. ¹⁶ Po akabalilo koshi ngughela ngani pakoghopa pandashi pa Chala na pandashi pabandu. ¹⁷ Popo yikakindapo imyaka yinyabo, ngisa ngabatwalila abaluko lwangu ifyachisa hi fyabupe pamupene munyumba ya Chala. ¹⁸ Papo ngabombagha imbombo yiyo, bababo bakanagha munyumba ya Chala pala ngamalisya imbombo ya kwighosya. Patakaba abandu bingi, pamo ichongo. ¹⁹ Lole abaYuda balumilile ukufuma ku Asiya ngali bisile pandashi pinyu, ukuti bayughe pala bali nacho ichakuyugha ichakukindana nune. ²⁰ Pamo abo bo bali pano bayughe ububibi bo bakanyagha nabo, po ndimiliye pandashi pa balongi babo. ²¹ Ukupatula chimochene, pala ngakolela ukuti, 'Ngulongibwa pandashi pinyu ilelo, popo ndi nu lwitiko ukuti, abafwe tibakasyuke."' Ngayugha amashu gha pamwanya popo ndimiliye umukati mwabo. ²² Sona uFeliki akamanya ubwisa nisya isila yiyo, alekisye inongwa. Akababula ukuti, "Ti ngadumule inongwa yiyiyi pala Lusiya ubwasongo wa bwite afika." ²³ Po akalamula usongo wa bwite ukuti, baye bamusunge uPaulosi munjela. Lole bakamupa mwabi sona atakabalesye abamanyani bake kumubombela fyo akulonda. ²⁴ Po ghakindile amashiku ghangi, uFeliki akisa pamupene nu mukashi wake bwachi Yuda ingamu yake Adulsila. Akamwitisya Paulosi akamupulika pala akayughagha nisya lwitiko mwa Kilisitu Yesu. ²⁵ Po uPaulosi akaba akali ukuyugha nifya bwisa kwikola, ubulongi bo ukwisa, uFeliki akatetema, po akamula akati, "Bukagha tasi tasi tingwitisya sona pakabalilo kangi." ²⁶ Sona pakabalilo kalakala, Felike akasubila ukuti takamupe ndalama, cho chifukwa akamwitisya papipi papipi nukuyughisyana nawe. ²⁷ Bo bakindite ifyinja fibili, Polokiyo Fesito akanyokela pamalo gha Felike ukuba songo wa chighaba. Lole Felike pakulonda ukuhobosya abaYuda akamuleka Paulosi munjela.