¹ Paulosi akabaketesya abalongi basongo ba baYuda, po akati, "Mwe bamwitu, fyosa fyisa pandashi pa Chala ukufika ilelo." ² Muputi songo Ananiya akayugha na bo bimilile papipi nu Paulosi ukuti bamukome pa mulomo. ³ UPaulosi akayugha ku babo kukwake, "Naloli uChala tiwakukome, we wabuta ngati cho ichiliba icha lyongo lyelu, wikile pakundonga une nga kufwana nilyongo, po ukukomanya indaghilo pakubalamula abandu ukuti bangome?" ⁴ Sona abandu bo bakimilila papo bakamuwula Paulosi ukuti, "Ukutukana umuputi songo wa Chala." ⁵ Paulosi wakati, "Bamwangu, ndamumenye ukuti we muputi songo, pakuti masimbo ghakuyugha, manyi ukayughe ububibi pa bakulamula babandu ba kukwinyu." ⁶ Pala uPaulosi asimikishe ukuti bamo bamo bakaba abaSaduki, bamo abaFalisayi, wakakolela mukati mumbala atile, "Abamwangu, ne muFalisayi, mwana wa muFalisayi, ngulongiwa pano, pachifukwa ndi nu lwitiko ukuti bo bafwile tibakashuke." ⁷ Sona po akayugha sisisi, (baFalisi sona na baSaduki, bakaba pakuyughisyana, po ichilundilo chikanda pakughabikana. ⁸ Pakuti abaSaduki bakuyugha ukuti, kuta chisyuka, kuta bandumi, kuta sona Umbepo. Lole abaFalisi basongo, sona nabamanya ndaghilo bakwitikisya mufyoshi.) ⁹ Po kwali ichongo chikulu, po abamanya ndaghilo bamo bamuchighabo icha baFalisi bakimilila numkususyana ngani, batile, "Tukakwaghamo nakandu akabibi mu mundu uyu, tutakumanya pamo we wandumi, yo ayughite nawe?" ¹⁰ Po ukuyughisanya kukakula ngani, usongo wa bwite pakoghopa ukuti tibamupalule, po akalamula abasilikali ukuti bakilile kuyakamwegha mukati mu chilundilo nukumutagha munjela lyabo. ¹¹ Ubushiku bulabula Malafyale akimilila papipi na yuyo akati, "Goma mundumbula, nga mo wali ukamboni wangu mu Yelusalemu muno, mo ukabe wakamboni wangu nu muba Loma." ¹² Po kuchile, abaYuda bapangite ubibi, Paulosi bakafunga ukuti manye tibalye pamo ukunwa mpaka tibamughoghe. ¹³ Bo bakosyekile chicho bali amakumi ghanayi. ¹⁴ Bandu aba bakabuka ku muputi songo nu kubasongo ba ba Yuda bakati, "Tufungite ukuti, tetulye pamo ukunwa pamo kughela kandu mpaka tukuya pamughogha uPaulosi. ¹⁵ Lole umwe nabambala ikulu, mutume amasyu kuwasongo wa bwite ya ba Loma, ukuti bise nayo uPaulo kukwinyu, po umwe mukabe ngati pamo mukulonda pamulonga bwisa fya nongwa yake, sona tukosyike pamughogha po atafikite nu kupipi." ¹⁶ Lole umwipwa wa Paulosi apulikite fyoshi, po akingila mulinga nukumubula uPaulosi. ¹⁷ Papo uPaulosi akamwitisya musilikali wa bwite nukumubula ukuti, "Umwana uyu akamupeleke kwa songo wa bwite ali na kamo kakumubula." ¹⁸ Po umulongosyi wa bwite yula akamwegha akabuka nawe kubwasongo wabo, po akati, "Umupinyiwa yula, Paulosi anyitisye, po ambula ukuti nise nu mwana uyu kukwinyu, pakuti ali nako ka kubabula." ¹⁹ Po usongo yula akamukola panyobe nukubuka nayo pambali, po akalalusya akati, "Ukulonda umbuleki?" ²⁰ Umwipwa wa Paulosi akayugha, "Pangelo abaYuda bapanganite kwisa pabasuma ukuti Paulosi mubuke nawe kumbala, ukabe ngati bakulonda pakulonganisya nongwa yake. ²¹ Pachifukwa balipo bandu bamo bakukinda amakumi ghanayi, bo banosyike pamupokelela. Abandu aba bafunga ukuti, manye tibalye pamo ukunwa mpaka bamughoghe uPaulosi. Sona banosyike pakukwanilisya, bakulindilila chicho timulangule." ²² Usongo yula akamunyosya umunyamata yula, pakumubula ukuti, manye akamubulepo nayumo ukuti amubula usongo. ²³ Po usongo wa bwite akitisya basongo babili mwa babwite, akababula ukuti, "9 koloko nubusiku munosyike na babwite makumi kumi ghabili, ukuya ku Kesaleya pamupene babwite bakwela pa mahachi amakumi ghangonde na ghabili, sona namo aba bakolela ifilwilo amakumi ghabili. ²⁴ Po abakavalo sona abangi ukuti uPaulosi akwelepo, po muye mumubike bwisa ukwa Feliki umukulu wa chisu chila." ²⁵ Po usongo wa bwite akasimba ukalata ngati ulu, ²⁶ 'Ne Ukaludiyo Lisiya, uluwindiko kwa we Feliki, songo wa chigaba. Ngubalamuka. ²⁷ Umundu uyu abaYuda bakamukola, sona bali papipi nukumughogha, po menye ukuti we mwenechisu uwa chiLoma, ngabuka na basilikali bangu pakuya ukumupokania. ²⁸ Ngalondagha ukuti menye cho abene abonangile, po nisile nawe ukumbala yawo. ²⁹ Nkhagha ukuti bakuyugha nisyandaghilo syabo, lole patali nakamo angaghoghibwa nako pamo nukupinyibwa nako. ³⁰ Pala ngati napulika ukuti abaYuda balondagha ukumughogha umundu uyu, popo mutumite kukwako. Ngalangula bo bakuyugha fya yuyo, ukuti bise bayughe fifyo onenge pamaso pako." ³¹ Abasilikali bakamwegha uPaulosi, namosongo wa bwite yula akalamula, nukubuka nayo paushiku ku Antipatala. ³² Pangelo pake, bakanyokela bakakwelela kukaya ko abasilikali bakikalagha nukubaleka abasilikali bamahachi kubuka nayo. ³³ Po bakafika ukuKesaleya nukubika ukalata kusongo wa chisu chila, bakamubika Paulosi munyobe syake. ³⁴ Pala akabelenga ukalata, usongo yula akalalusya ukwa Paulosi, kuchigaba cho afumile. Bwo amenye ukuti afumile ku Kilikiya akati, Tinise pakupulika po bo balonda kukughogha bisile." ³⁵ Sona usongo wa chigaba akalangula ukuti, Paulosi baye bamusunge munyumba ya Kalonga uHelodi.